சென்னை: சந்தனக் கட்டையின் தேவை சந்தையில் சரிந்ததால் விற்பனை குறைந்து, வனத்துறைக்கான மொத்த வருமானம் பெருமளவு குறைந்துள்ளது. தமிழகத்தின் 2006-07 மற்றும் 2007-08ம் ஆண்டுக்கான பொருளாதார நிலவரம் பற்றிய அறிக்கை வெளியிடப்பட்டுள்ளது.

அதில், கால்நடை, மீன்வளம் மற்றும் வனத்துறை பற்றி கூறப்பட்டுள்ளதாவது: தேசிய அளவில், பால் உற்பத்தியில் தமிழகம் எட்டாவது இடத்தில் உள்ளது. 2005-06ல் 54.74 லட்சம் டன்னாக இருந்த பால் உற்பத்தி, 2006-07ல் 55.60 லட்சம் டன்னாகவும், 2007-08ல் 55.86 லட்சம் டன்னாகவும் உயர்ந்தது. தனி நபர் பால் அளவு நாள் ஒன்றுக்கு 233 கிராம் என உள்ளது. கால்நடைகளை கவனிக்க, தமிழகத்தில் 1207 மருந்தகங்களும், 139 மருத்துவமனைகளும், 55 நடமாடும் கால்நடை மையங்களும், 22 மருத்துவ மையங்களும், ஆறு பாலிகிளினிக்குகளும் செயல்படுகின்றன.

கறி உற்பத்தி 2005-06ல் 499.11 லட்சம் கிலோவில் இருந்து 2006-07ல் 586.64 லட்சம் கிலோவாகவும், 2007-08ல் 638.23 கிலோவாகவும் உயர்ந்துள்ளது. முட்டை உற்பத்தி 2005-06ல் 62 ஆயிரத்து 230 லட்சத்தில் இருந்து 2006-07ல் 80 ஆயிரத்து 440 லட்சமாகவும், 2007-08ல் 83 ஆயிரத்து 940 லட்சமாகவும் உயர்ந்தது. மொத்த மீன் உற்பத்தியும் 2005-06ல் 5.46 லட்சம் டன்னாகவும், 2006-07ல் 5.52 லட்சம் டன்னாகவும், 2007-08ல் 5.58 லட்சம் டன்னாகவும் உயர்ந்தது. உள்நாட்டு மற்றும் கடல்மீன் ஆகியவற்றின் உற்பத்தி விகிதாச்சாரம் 30:70 என்ற அளவில் உள்ளது. தனிநபர் மீன் நுகர்வு 2005-06ல் 13.52 கிலோவில் இருந்து, 2006-07ல் 13.70 கிலோவாக உயர்ந்துள்ளது.

வனத் துறையின் மொத்த வருமானம் 2005-06ல் 144 கோடியே 48 லட்சம் ரூபாயாக இருந்தது. இது, 2006-07ல் 82 கோடியே 34 லட்சமாக குறைந்தது. 2007-08ல் மேலும் குறைந்து வெறும் 46 கோடியே 85 லட்சம் ரூபாயானது. இதற்கு முக்கிய காரணம், சந்தையில் சந்தனக் கட்டை வாங்குதல் குறைந்தது, விற்பனை குறைந்தது மற்றும் பாதுகாப்பு சார்ந்த வனம் என்பதை பின்பற்றுவதால், வனப்பகுதியில் இருந்து தொழிற்சாலைகளுக்கான மூலப்பொருட்களின் சப்ளை மிகவும் குறைந்தது ஆகியவை தான். இவ்வாறு அறிக்கையில் கூறப்பட்டுள்ளது.