ராமநாதபுரம்: ஆருத்ரா தரிசன விழாவையொட்டி, உத்திரகோசமங்கையில் மரகத நடராஜருக்கு சந்தனம் களையப்பட்ட நிலையில் , மீண்டும் சந்தனம் பூசப்பட்டு சர்வ அலங்காரத்தில் பக்தர்களுக்கு அருள் பாலித்தார்.ராமநாதபுரம் மாவட்டம், உத்திரகோசமங்கை மங்களநாதசுவாமி கோயில், மரகத நடராஜருக்கு ஆரூத்ரா தரிசனம் நேற்று முன் தினம் தொடங்கியது. சந்திரகிரகணம் காரணமாக தரிசன நேரத்தில் மாற்றம் செய்யப்பட்டு, அன்று அதிகாலை 5 மணிக்கு நடை திறக்கப்பட்டு , சந்தனக்காப்பு களையப்பட்டது.

தொடர்ந்து சுவாமிக்கு பல்வேறு அபிஷேகங்கள் செய்யப்பட்டன. தொடர்ந்து இரவு 8 மணிக்கு சந்தனக்காப்பு சாற்றப்பட, இரவு 9 மணிக்கு நடை சாத்தப்பட்டது. இரவில் சந்திர கிரகணம் முடிந்தபின் , நேற்று அதிகாலை 4.15 மணிக்கு நடை திறந்து பரிகார பூஜைகள் செய்யப்பட்டன. இதன் பின் காலை 5 மணிக்கு ஆரூத்ரா தரிசனம், பஞ்ச பூஜை நிகழ்ச்சிகள் நடந்தன. இதை தொடர்ந்து 6 மணிக்கு மேல் பொதுமக்கள், தரிசனத்துக்கு அனுமதிக்கப்பட்டனர். நேற்றும் ஏராளமான பக்தர்கள் கலந்து கொண்டனர்.