புவனேஸ்வர்: மாணவியை கடத்தி, கற்பழித்து நிர்வாணமாக மொபைல் போனில் வீடியோ படம் எடுத்த, எம்.பி.ஏ., மாணவர் உட்பட இருவர் கைது செய்யப்பட்டனர். ஒரிசா தலைநகர் புவனேஸ்வரில் இந்த சம்பவம் நடந்துள்ளது. நயபள்ளி என்ற இடத்தில், இரவு ஒன்பது மணி அளவில் இந்த கல்லூரி மாணவி கடத்தப்பட்டாள்.

வீடு திரும்பிக் கொண்டிருந்தபோது, காரில் வந்த இருவர் கத்தியைக் காட்டி மிரட்டி கடத்தியுள்ளனர். சில கிலோமீட்டர் தூரம் காரை ஓட்டிச்சென்று, ஜெயதேவ் விகார் என்ற பகுதியில், ஒரு உணவு விடுதிக்கு அந்த பெண்ணை அழைத்துச்சென்றனர். அங்கு, இருவரும் கற்பழித்தனர். பின், நிர்வாணமாக மொபைல் போனில் வீடியோ படமும் எடுத்துள்ளனர். ஒரு மணி நேரத்துக்கு பின், அந்த பெண்ணை விரட்டி விட்டனர்.

 வெளியே வந்த அந்த மாணவி அழுவதை பார்த்து பக்கத்தில் உள்ள சிலர் போலீசுக்கு தகவல் அளித்தனர். போலீசார் விரைந்துவந்து விசாரணை செய்து, விடுதியில் இருந்த இருவரையும் கைது செய்தனர். விசாரணையில் ஒருவர் பெயர் சுவாஸ்தி மகபாத்ரா; இன்னொருவர் சஞ்சய் சுகாசியா. இவர்களில் மகபாத்ரா, எம்.பி.ஏ., மாணவர். சுகாசியா, உணவு விடுதியை நடத்தி வருபவர்.

இது தொடர்பாக போலீசார் கூறுகையில், "பெண்ணுக்கு இந்த இருவரையும் தெரியுமா என்பது விசாரிக்கப்பட்டு வருகிறது. மொபைல் போனில் நிர்வாண வீடியோ எடுத்த இவர்கள், அதை "லேப்டாப்' கம்ப்யூட்டரில் நகல் எடுத்து வைத்துள்ளனர். அதனால், நீலப்படம் தயாரிக்கும் கும்பலுடன் தொடர்பு உள்ளதா என்றும் விசாரணை நடக்கிறது' என்று தெரிவித்தனர்.