மலப்புரம்: கேரளா, மலப்புரம் மாவட்டத்தில் படகு கவிழ்ந்து விபத்துக்குள்ளானதில், எட்டு மாணவர்கள் தண்ணீரில் மூழ்கி பலியாயினர். கேரள மாநிலம் ஏரிக்காடு பகுதியிலிருந்து ஊர்கட்டிரி கிராமத்துக்கு செல்வதற்காக, மாணவர்கள் பலர் உட்பட 35 பேர் நேற்று படகு மூலம் சாலையார் ஆற்றில் சென்றனர். ஆற்றின் நடுவில் படகு சென்றபோது, எதிர்பாராதவிதமாக கவிழ்ந்தது.

இதில், படகில் பயணம் செய்த பள்ளி மாணவர்கள் எட்டு பேர் அதே இடத்தில் தண்ணீரில் மூழ்கி பலியாயினர். மற்றவர்கள் நீந்திக் கரை சேர்ந்தனர். இறந்த மாணவர்கள் எல்லாம் மூர்க்கநாடு மேல்நிலைப் பள்ளியில் படித்தவர்கள். 16 முதல் 17 வயதிற்கு உட்பட்டவர்கள். இறந்த எட்டு பேரில் ஒருவர் மாணவி. சம்பவ இடத்தில் மீட்புப் பணிகளை  பொதுமக்கள் உதவியுடன் போலீசார்  மேற்கொண்டனர். கேரள மாநிலம் தேக்கடியில் கடந்த செப்டம்பர் 30ம் தேதி சுற்றுலாப் பயணிகள் சென்ற படகு கவிழ்ந்ததில், 45 பேர் தண்ணீரில் மூழ்கி பரிதாபமாக இறந்தனர். அந்தச் சம்பவத்தின் சோகச்சுவடு மறைவதற்குள் இச் சம்பவம் நிகழ்ந்துள்ளது. அதாவது 35 நாட்களுக்குள் அடுத்த சம்பவம் நிகழ்ந்துள்ளது.

விபத்து நடந்தது எப்படி?: மலப்புரம் மாவட்டம், அரிக்கோடு அடுத்துள்ள மூர்க்கநாடு பகுதியில் உள்ளது எஸ்.எஸ்.மேல்நிலைப் பள்ளி. இப்பள்ளியில் படித்து வரும் மேல்நிலைப் பள்ளி மாணவ மாணவிகள் வழக்கமாக, அரிக்கோடு செல்லும் சாலையின் குறுக்காக உள்ள சாலியாறு ஆற்றை படகில் கடந்து சென்றுள்ளனர். 35 மாணவ, மாணவிகள் படகில் பயணம் செய்தனர்; படகோட்டி இல்லாதததால் மாணவர்களே படகை செலுத்தியுள்ளனர். படகு சிறிது தூரம் சென்றதும் நிலை தடுமாறிய படகு ஒருபுறமாகச் சாய்ந்துள்ளது. அப்போது படகில் பயணம் செய்த மாணவ, மாணவிகள் அனைவரும் ஆற்றில் தலை குப்புற கவிழ்ந்தனர்; ஒரு சில மாணவர்கள் நீந்தி கரை சேர்ந்தனர்.

ஆழமான பகுதியில் சிக்கிய மாணவர்கள் சுகைப், முஷரப், செமீர், தொய்பா, சாய்தலி, சவுபீக், சிகாபு, சிராஜ் ஆகிய எட்டு பேரும் சம்பவ இடத்திலேயே உயிரிழந்தனர். அருகிலிருந்தவர்கள், ஆற்றில் தவித்துக் கொண்டிருந்த மாணவ, மாணவிகளை மீட்டு கள்ளிக்கோட்டை, அரிக்கோடு மற்றும் மலப்புரம் அரசு மருத்துவமனைகளில் சேர்த்தனர்.  சம்பவ இடத்தை, கேரள கல்வித்துறை அமைச்சர் பேபி, சுகாதாரத்துறை அமைச்சர் ஸ்ரீமதி, மாவட்ட கலெக்டர் மோகன்தாஸ் ஆகியோர் நேரில் பார்வையிட்டனர்.