சென்னை : "வருமானம் இல்லாமல் கஷ்டப்படுவர்கள், எங்கள் நிறுவனத்தில் உறுப்பினரானால் வீட்டில் இருந்தபடியே கோடிக் கணக்கில் சம்பாதிக்கலாம் என, நூதன முறையில் தங்க காசு மோசடி செய்த நிறுவனத்திற்கு சென்னையில் போலீசார் "சீல்' வைத்தனர். அந்நிறுவனத்தில் இருந்து 71 கிலோ தங்க காசுகள், கம்ப்யூட்டர்கள், முக்கிய ஆவணங்கள் பறிமுதல் செய்யப் பட்டன. இந்நிறுவன பெண் நிர்வாக இயக்குனர் உள்பட, ஏழு பேரை போலீசார் கைது செய்தனர்.

சென்னை பெரம்பூர் ராமசந்திரன் தெருவில் வசிக்கும் வீரராகவன் என்பவரின் மகன் தினேஷ்குமார் (33); வியாபாரி. போதிய வருமானம் கிடைக்காமல் வாழ்க்கையை நடத்திய தினேஷ்குமாருக்கு, திருவான்மியூரை சேர்ந்த ஸ்ரீகாந்த் என்பவருடன் தொடர்பு ஏற்பட்டது. இவரின் கஷ்டத்தை பார்த்த ஸ்ரீகாந்த், ""சேத்துபட்டில் "குவெஸ்ட் நெட் (கோல்ட் குவெஸ்ட்) என்ற மல்டி-லெவல் மார்கெட்டிங்' நிறுவனம் உள்ளது. அந்நிறுவனத்தில் ரூ.31 ஆயிரம் பணத்தை கட்டினால், வீட்டில் படுத்துக் கொண்டே கோடிக் கணக்கில் சம்பாதிக்கலாம்,'' என்றார். இவரின் பேச்சில் நம்பிக்கையில்லாமல் காலம் தாழ்த்தினார். எனினும், அந்நிறுவனம் நடத்திய வாடிக்கையாளர் சந்திப்பு கூட்டத்திற்கு அழைத்து சென்று மூளை சலவை செய்ததில், மயங்கிய தினேஷ்குமார் 2006ம் ஆண்டு ரூ.62 ஆயிரம் கட்டினார். அப்பணத்திற்கு, ஆறு கிராம் தங்க நாணயம் இரண்டு தந்தனர். தான் கட்டிய பணத்திற்கு வெறும் ஆறு கிராம் தங்கமா என அதிர்ச்சியடைந்த தினேஷ்குமார், பணத்தை திரும்ப கேட்டு மேற்படி நிறுவனத்திற்கு நடையாய் நடந்தார்.

"உங்கள் வீட்டு முகவரியை கொடுங்கள், இருதினங்களுக்குள் பணம் வீடு தேடி வரும்' என குவெஸ்ட் நெட் நிர்வாக இயக்குனர் புஷ்பம் கூறினார். அன்று மாலை தினேஷ்குமார் வீட்டிற்கு வந்த இருவர், "பணத்தை கேட்டு எங்கள் நிறுவனத்திற்கு வந்தால் கொலை செய்து விடுவோம்' என மிரட்டிவிட்டு சென்றனர். இதில், மிரண்ட தினேஷ்குமார் நேற்று முன்தினம் செம்பியம் காவல் நிலையத்தில் புகார் கொடுத்தார்.

அப்புகாரின் விவரம்: இன்டர்நெட் மூலமாகவும், நேரிலும் சுலபமான முறையில் வீட்டில் இருந்தபடியே வாடிக்கையாளர்களை சேர்த்து கோடிக் கணக்கில் சம்பாதிக்கலாம் என ஸ்ரீகாந்த் சொன்னார். அவரின் பேச்சை நம்பி அந்நிறுவனத்தில் ரூ.62 ஆயிரம் கட்டினேன். அதற்கு ஆறு கிராம் தங்க காசுகள் இரண்டு கொடுத்தனர். எனக்கு நகை வேண்டாம், கட்டிய பணத்தை திரும்ப கொடுங்கள் என்று கேட்டதற்கு கொலை செய்து விடுவதாக மிரட்டுகின்றனர்' என்று தெரிவித்திருந்தார்.இப்புகாரின் பேரில் போலீசார், நேற்று முன்தினம் சேத்துப்பட்டு மெக்னிக்கல்ஸ் சாலையிலுள்ள "குவெஸ்ட் நெட்' அலுவலகத்திற்கு சென்றனர். அங்கிருந்த கீழ்ப்பாக் கத்தை சேர்ந்த அப்பளநாயுடு என்பவரின் மகளும் நிர்வாக இயக்குநரான புஷ்பம் (40), மேலாளர்கள் அகஸ்டின் (37), தண்டபாணி (33), சுமேஷ் (28) மற்றும் ஊழியர்கள் ஹரி பிரபாகர் (39), சந்திரசேகர ராவ், வித்யா (30) ஆகிய ஏழு பேரை கைது செய்தனர்.

அவர்களிடம் போலீசார் நடத்திய விசாரணையில், ஹாங்காங்கை தலைமையிடமாக கொண்டு செயல் படும் இந்நிறுவனத்திற்கு, உலகம் முழுவதும் 220 கிளைகள் உள்ளன. தமிழகத்தில் சென்னையை தலைமையிடமாக கொண்டு செயல்படும் "குவெஸ்ட் நெட்'டிற்கு ஈரோடு, சேலம், மதுரையில் கிளை அலுவலகம் உள்ளது. வரும் 22ம் தேதி 10வது ஆண்டு விழாவை கொண்டாட முடிவு செய்துள்ளனர். இந்நிறுவனத்தில், தமிழகத்தில் மட்டும் ஒரு லட்சத்திற்கும் மேற்பட்டவர்கள் உறுப்பினர்களாக உள்ளனர். இங்கு கட்டும் பணத்திற்கு தங்க காசு, உள்ளூர் மற்றும் வெளிநாட்டு சுற்றுலா, உடற்பயிற்சி சாதனங்கள் என ஐம்பது விதமான பொருட்கள் தரப்படுகின்றன. உதாரணமாக, தங்க காசு திட்டத்தில் சேருபவர்கள் முதலில் ரூ.31 ஆயிரம் பணம் கட்ட வேண்டும். அவருக்கு "தலைவர்களின் உருவம்' பதித்த ஆறு கிராம் தங்க நாணயம் கொடுக்கப்படும். அவர் இரண்டு பேரை இத்திட்டத்தில் சேர்க்க வேண்டும். அந்த இரண்டு பேரும், ஆளுக்கு இரண்டு பேரை சேர்க்க வேண்டும். இப்படி சங்கிலித் தொடராக உறுப்பினர்கள் சேர்க்கப்பட்டனர்.

இப்படி தொடர்ந்து, ஆறு பேர் வாங்கினால் முதலில் சேர்ந்தவருக்கு ரூ.2 ஆயிரத்து 300 முதல் 11 ஆயிரத்து 500 ரூபாய் வரை கமிஷன் கிடைக்கும்.இதில், யாராவது ஒருவர் இரண்டு பேரை சேர்க்க முடியாவிட்டால் கமிஷன் கிடைக்காது; கட்டிய பணமும் திரும்ப வராது. இதுபோல, இவர்களிடம் ஆயிரக்கணக்கில் பணத்தை கட்டிவிட்டு, "ஆறு கிராம்' தங்கத்துடன் நொந்தவர்கள் பட்டியலில் ஐ.பி.எஸ்., ஐ.ஏ.எஸ்., அதிகாரிகள் முதல் சாதாரண தொழிலாளி வரை உள்ளனர் என தெரியவந்தது. போலீசார் நேற்று அந்நிறுவனத்திற்கு பூட்டுப் போட்டு "சீல்' வைத்தனர். அங்கிருந்து 71 கிலோ தங்க காசுகள், 12 லேப்-டாப் கம்ப்யூட்டர்கள் மற்றும் முக்கிய ஆவணங்கள் பறிமுதல் செய்யப் பட்டன. இதுகுறித்து, செம் பியம் குற்றப்பிரிவு போலீசார் வழக் குப் பதிந்து மேற்படி ஏழு பேரையும் நேற்று கோர்ட்டில் ஆஜர்படுத்தி சிறையில் அடைத்தனர்.

கமிஷனர் அலுவலகம் முற்றுகை : "குவெஸ்ட் நெட்' (கோல்ட் குவெஸ்ட்) நிறுவனத்தின் நிர்வாக இயக்குனர் உள்ளிட்ட ஏழு பேரை தங்க காசு மோசடி வழக்கில் போலீசார் கைது செய்தனர். இதையறிந்து, நூற்றுக்கும் மேற்பட்ட உறுப்பினர்கள், "நிறுவனத்தின் ஊழியர்களை கைது செய்யக் கூடாது; இந்நிறுவனத்தை நம்பி லட்சக்கணக்கான உறுப்பினர்கள் உள்ளனர்' என கமிஷனர் அலுவலகத்தை முற்றுகையிட்டனர். இச்சம்பவத்தால், கமிஷனர் அலுவலக நுழை வாயில் மூடப்பட்டது. இதையடுத்து, எழும்பூர் உதவி கமிஷனர் அசோக், இன்ஸ்பெக்டர் சுப்பிரமணி மற்றும் ஐம்பதுக்கும் மேற்பட்ட போலீசார் பாதுகாப்பு பணியில் ஈடுபட்டனர். நேரம் செல்லச் செல்ல கூட்டம் கட்டுக் கடங்காமல் போனது. இக்கூட்டத்தினர், நிறுவனத்திற்கு ஆதரவாக கோஷங்கள் எழுப்பியும், ஆர்ப்பாட்டத்தில் ஈடுபட்டனர். சம்பவ இடத்திற்கு விரைந்து வந்த துணை கமிஷனர் ராமசுப்பிரமணி மற்றும் போலீசார் கூட்டத்தை தடியடி நடத்தி கலைத்தனர். ஆர்ப்பாட்டத்தில் ஈடுபட்ட 34 பேரை எழும்பூர் போலீசார் கைது செய்தனர். இதனால், அப்பகுதியில் பெரும் பரபரப்பு ஏற்பட்டது.

தங்க காசுகள் மோசடி செய்த "குவெஸ்ட் நெட்' நிறுவனம் இதே போன்ற மோசடி வழக்கில் கடந்த 2003ம் ஆண்டு சிக்கியுள்ளது. அப்போது, ஐந்து கிலோ தங்க காசுகள் பறிமுதல் செய்யப்பட்டன. அவ்வழக்கில், தற்போது சிக்கியுள்ள நிர்வாக இயக்குனர் புஷ்பம் உட்பட பலர் கைதாயினர். இதுதொடர்பான வழக்கு ஐகோர்ட்டில் நிலுவையில் உள்ளது. நான்கு ஆண்டுகள் இடைவெளிக்குப் பிறகு மீண்டும் இந்நிறுவனம் பிரச்னையில் சிக்கியுள்ளது. தற்போது, 71 கிலோ தங்கம் பறிமுதல் செய்யப்பட்டது; இதன் மதிப்பு ஒன்பது கோடி ரூபாய்.