Dinamalar

சென்னை: தி.மு.க.,வினரை குண்டர் சட்டத்தில் அடைக்கக் கூடாது என வலியுறுத்தி, வரும் 4ம் தேதி சிறை நிரப்பும் போராட்டம் நடத்த, தி.மு.க., செயற்குழுவில் நேற்று தீர்மானம் நிறைவேற்றப்பட்டது. விலைவாசி உயர்வு மற்றும் தமிழக மீனவர்கள் மீதான தாக்குதலை கண்டித்து குரல் கொடுக்க முன்வராமல், குண்டர் சட்டத்தில் கைது செய்யப்படுவதை கண்டித்து போராட்டம் அறிவித்துள்ளதால், விமர்சனங்கள் கிளம்பியுள்ளன. அரசுக்கு எச்சரிக்கை: தி.மு.க., தலைவர் கருணாநிதியின் தலைமையில் அக்கட்சியின் செயற்குழுக் கூட்டம், சென்னையில் நேற்று கூடியது. அக்கூட்டத்தில் பொருளாளர் ஸ்டாலின், ராஜ்யசபா எம்.பி., கனிமொழி மற்றும் முன்னணி நிர்வாகிகள், மாவட்டச் செயலர்கள் பேசும் போது, "தி.மு.க.,வினர் மீது பொய் வழக்கு சுமத்தி, சிறையில் அடைத்து, பழி வாங்கப் படுகின்றனர். கைது படலத்தை அ.தி.மு.க., அரசு நிறுத்திக்கொள்ளும் வகையில், எழுச்சி மிக்க போராட்டத்தை நடத்த வேண்டும். அந்தப் போராட்டம் சிறை நிரப்பும் போராட்டம் என்றாலும், தொண்டர்கள் மனமுவந்து பங்கேற்க வேண்டும்' என பேசினர். தீர்மானம்: முன்னாள் அமைச்சர்கள் சிலர் பேசும் போது, "தங்களது மாவட்டங்களிலிருந்து ஆயிரக்கணக்கான தொண்டர்களை கலந்து கொள்ள வைப்போம்' என உறுதி அளித்தனர். மதியம் 1.30 மணியளவில் மாவட்டச் செயலர்கள் மட்டுமே தங்களது கருத்துக்களை வெளியிட்டனர். மீண்டும் மாலை 3.30 மணிக்கு ஆரம்பித்த கூட்டம், இரவு வரை நீடித்தது. அக்கூட்டத்தில் முன்னணி நிர்வாகிகள் பேசி முடித்த பின், சிறை நிரப்பும் பேராõட்டம் உள்ளிட்ட தீர்மானங்கள் நிறைவேற்றப்பட்டன. அதன் விவரம்: தி.மு.க.,வினர் மீதும், கருணாநிதி மீதும் மாறாப் பகை, தீராக் காழ்ப்புணர்ச்சி கொண்டு, தி.மு.க.,வின் முன்னணியினர் மீதும் பூர்வாங்க அடிப்படை இல்லாத பொய்ப் புகார்களைப் புனைந்து, கைது, சிறை, அலைக்கழிப்பு, குண்டர் சட்டம், வீடுகளில் சோதனை, குடும்பப் பெண்களிடம் அத்துமீறல் என்ற கொடூரமான அடக்குமுறைகள்,

போலீசார் துணையுடன் ஏவி விடப்படுகின்றன.
கடும் கண்டனம்: தி.மு.க.,வை அழித்து விடலாம் என்ற நப்பாசையில், ஜனநாயகத்திற்கும் சட்டத்திற்கும் புறம்பான நிகழ்வுகள் அரங்கேற்றப்படும் அட்டூழியத்திற்கு தி.மு.க., கடும் கண்டனம் தெரிவித்துக் கொள்கிறது. காவிரி டெல்டா பகுதிகளில் கனவாகிப் போன குறுவை சாகுபடி, கேரளம், கர்நாடகம், ஆந்திரம் போன்ற மாநிலங்களின் ஆரோக்கியமற்ற அணுகுமுறைகளால் நதி நீர்ப் பிரச்னைகள், அரிசி விலை உயர்வு, மளிகைப் பொருட்கள், காய்கறிகள் விலை உயர்வு, பஸ் கட்டண உயர்வு, பால் விலை உயர்வு, மின் கட்டண உயர்வு போன்ற நிர்வாகப் பிரச்னைகள், அனைத்து தரப்பு மக்களின் வாழ்க்கையையும் புரட்டிப் போட்டுக் கொண்டு இருக்கின்றன. திசை திருப்பும் நடவடிக்கை: இந்த நெருக்கடியிலிருந்து திசை திருப்பும் தந்திரமாகவே, கட்சி நிர்வாகிகள் கைது, குண்டர் சட்டம் போன்றவற்றை அ.தி.மு.க., அரசு தொடர்ந்து செய்து வருகிறது. இம் என்றால் சிறைவாசம் என்ற ஜார் மன்னன் ஆட்சியை நினைவுப்படுத்துவது போல் கைது செய்வது, சிறையில் வைப்பது, குண்டர் சட்டத்தை ஏவுவது போன்ற இந்தப் பழி வாங்கும் போக்கை வன்மையாகக் கண்டிக்கிறோம். வரும் 4ம் தேதி, சிறை நிரப்பும் போராட்டம் நடத்தப்படும் உள்ளிட்ட தீர்மானங்கள் அக்கூட்டத்தில் நிறைவேற்றப்பட்டன. மக்கள் வாழ்வாதாரப் பிரச்னைகளான விலைவாசி உயர்வு உள்ளிட்ட பல்வேறு பிரச்னைகள் தலைதூக்கி நிற்கின்றன.