கோவை : "டைடல் பார்க்'கை திறந்து வைக்க முதல்வர் கருணாநிதி, ஆக.,2 ம் தேதி கோவை வருகிறார்.தமிழகத்தில் சென்னைக்கு அடுத்ததாக, கோவை உள்ளிட்ட இரண்டாம் நிலை நகரங்களில் தகவல் தொழில் நுட்பப் பூங்கா அமைக்கப்படும் என்று தி.மு.க., ஆட்சிப் பொறுப்பேற்ற புதிதில் முதல்வர் கருணாநிதி அறிவித்தார். அதன்படி, கோவை மருத்துவக் கல்லூரி வளாகத்துக்கு அருகில், அரசின் சார்பில் சிறப்புப் பொருளாதார மண்டல அந்தஸ்துடன் கூடிய தகவல் தொழில் நுட்பப் பூங்கா அமைக்க  அடிக்கல் நாட்டு விழா, 2007 பிப்.,24ல் கோவையில் நடந்தது. முதல்வர் கருணாநிதி, அடிக்கல் நாட்டினார். மொத்தம் 380 கோடி ரூபாய் மதிப்பில், 17 லட்சம் சதுரஅடி பரப்பில் 8 தளங்களுடன் கூடிய பிரமாண்டமான "டைடல் பார்க்' கட்டி முடிக்கப்பட்டுள்ளது.இதன் துவக்கவிழாவை, வரும் ஆக.,2ல் நடத்த தமிழக அரசு திட்டமிட்டிருந்தது. துணை முதல்வர் ஸ்டாலின் இதைத் திறந்து வைப்பதாக இருந்தது. தற்போது, அடிக்கல் நாட்டிய முதல்வர் கருணாநிதியே நேரில் வந்து திறந்து வைப்பதாக முடிவு செய்யப்பட்டுள்ளது. நேற்று இரவு, முதல்வரின் கோவை வருகை உறுதி செய்யப்பட்டது. அதே நாளில், இரவில் கோவையில் பொதுக்கூட்டம் நடத்தவும் திட்டமிடப்பட்டுள்ளது.