Dinamalar

புதுடில்லி: நிலக்கரி பேரத்தில் நடந்த முறைகேட்டின் மூலம் நாட்டிற்கு 1 . 86 லட்சம் கோடி இழப்பை ஏற்படுத்தியதாக எழுந்திருக்கும் சர்ச்சை காரணமாக பிரதமர் பதவியில் நீடிக்க தகுதி இல்லையென்றும், அவர் தார்மீக பொறுப்பேற்று ராஜினாமா செய்ய வேண்டும் என்றும் பார்லி.,யில் பா.ஜ., உள்ளிட்ட எதிர்கட்சியினர் கடும் அமளியில் ஈடுபட்டனர். இதனால் சபை நடவடிக்கை பாதிக்கப்பட்டன. தொடர்ந்து கூச்சல் குழப்பம் நிலவியதால் பார்., இரு அவைகளும் ஒத்தி வைக்கப்பட்டன.அவையில் கூச்சல் நிலவியபோது இந்த விவகாரம் குறித்து விவாதிக்க மத்திய அரசு தயாராக இருப்பதாகவும், பிரதமர் அறிக்கை வழங்குவார் என்றும் அரசு தரப்பில் தெரிவிக்கப்பட்டது. ஆனால் எதிர்கட்சிகள் இதனை ஏற்க மறுத்து விட்டன. மேலும் பிரதமர் ராஜினாமா செய்ய வேண்டும் என்று தொடர்ந்து பிடிவாதமாக வலியுறுத்தினர்.

மவுனம் காக்கும் தி.மு.க., :

மத்திய அரசுக்கு எதிரான, 1.86 லட்சம் கோடி ரூபாய் ஊழல் விவகாரத்தில், காங்கிரசின் கூட்டணி கட்சியான, தி.மு.க., இதுவரை எந்தக் கருத்தையும் தெரிவிக்காமல் மவுனம் காக்கிறது. இதற்கிடையில் தி.மு.க, எம்.பி.,க்கள் இன்று பிரதமர் மற்றும் சோனியாவை சந்தித்து பேசினர். இந்த சந்திப்பின் போது டெசோ மாநாட்டில் நிறைவேற்றப்பட்ட தீர்மானங்களின் அடிப்படையில் நடவடிக்கை எடுக்க வேண்டும் என கேட்டுக்கொண்டனர்.

அதேநேரத்தில், விடுமுறைக்குப் பின், இன்று மீண்டும் கூடும் பார்லிமென்ட் கூடியது. இந்த இமாலய ஊழல் விவகாரத்தை, பெரிய அளவில் கிளப்பி, சபைகளை கிடுகிடுக்கச் செய்ய, பா.ஜ., உட்பட, சில எதிர்க்கட்சிகள் திட்டமிட்டுள்ளன.சனி, ஞாயிறு மற்றும் ரம்ஜான் பண்டிகைக்காக திங்கள் என, மூன்று நாட்கள் விடுமுறைக்குப் பின், பார்லிமென்ட் இன்று மீண்டும் கூடியது. மழைக்கால கூட்டத் தொடரான இதில், முக்கிய மசோதாக்கள் பலவற்றை, எப்படியாவது நிறைவேற்ற வேண்டும்

என்ற எண்ணத்தில், மத்திய அரசு உள்ளது.இந்நிலையில், மத்திய தணிக்கை ஆணையமான, சி.ஏ.ஜி., மூன்று முக்கிய அறிக்கைகளை சமர்ப்பித்துள்ளது. அதனால், "நிலக்கரி சுரங்கங்களை ஏலத்தில் விடாமல், தனியாருக்கு விட்டதில் ஊழல், அல்ட்ரா மெகா மின்சார உற்பத்தி நிலையம் அமைப்பதில் மிகப் பெரிய ஊழல் மற்றும் டில்லி விமான நிலையம் கட்டும் திட்டத்தில் ஊழல்' என, பரபரப்பான குற்றச்சாட்டுகள் கிளம்பியுள்ளன. மக்களின் வரிப் பணம், இந்தளவுக்கு வீணடிக்கப்பட்டுள்ள விவகாரத்தை, பா.ஜ., தலைமையிலான தேசிய ஜனநாயக கூட்டணி, தீவிரமாக எழுப்ப திட்டமிட்டுள்ளது. குறிப்பாக, நிலக்கரி ஒதுக்கீடு செய்யப்பட்ட விவகாரத்தில், பிரதமர் நேரடியாக சம்பந்தப்பட்டுள்ளார். எனவே, "நடந்துள்ள மிகப் பெரிய ஊழலுக்கு, தார்மீக பொறுப்பேற்று பிரதமர் பதவியில் இருந்து மன்மோகன் சிங் விலக வேண்டும்' என, தே.ஜ.கூட்டணி கோரிக்கை வைக்கிறது.

நியமன முறையில் நிலக்கரி வழங்கல்

:நிலக்கரி ஊழலைப் பொறுத்தவரை, 28 தனியார் நிறுவனங்களுக்கு ஒதுக்கீடுகள் வழங்கப்பட்டுள்ளன. இவை அனைத்துமே, ஏல முறையில் அளிக்கப்படாமல், நியமன முறையில் வழங்கப்பட்டுள்ளன. இதனால், அரசுக்கு, 1.86 லட்சம் கோடி ரூபாய் வரை இழப்பு ஏற்பட்டுள்ளது. அதேபோல், அல்ட்ரா மெகா மின் உற்பத்தி நிலைய திட்டங்களிலும், ஊழல் நடந்துள்ளதாக, மற்றொரு அறிக்கையில், சி.ஏ.ஜி., தெரிவித்துள்ளது. அதன்படி, அனில் அம்பானியின் ரிலையன்ஸ் நிறுவனம், தனக்கு ஒதுக்கப்பட்ட நிலக்கரியை, பிற தனியார் நிறுவனங்களுக்கு அளித்துள்ளது. இவ்வாறு நிலக்கரியை தந்ததால், அந்த ரிலையன்ஸ் நிறுவனம், 30 ஆயிரம் கோடி ரூபாய் வரை லாபம் பார்த்துள்ளது.இதுதவிர, டில்லி விமான நிலையம் கட்டும் திட்டத்தை ஏற்று நடத்திய, ஜி.எம்.ஆர்., நிறுவனத்திற்கு, 4,800 ஏக்கர் நிலம் வழங்கப்பட்டுள்ளது. ஒரு ஏக்கர் வெறும், 100