Dinamalar

சிங்கப்பெருமாள்;91 வயதிலும் திருவிழாக்களில் உற்சாகமாக பாடி, நடனமாடும் அற்புத கலைஞர்.

தார்ப்பாய்ச்சி வேட்டி, மணிக்கட்டில், முழங்கையில், உச்சிக்குடுமியில் மல்லிகை பூ, உடம்பெங்கும் நாராயணின் திருநாமம், மார்பில் புரளும் வித, விதமான மாலை, நெடு, நெடு உயரத்துடன், பார்த்தவுடனேயே மதிக்கத்தக்க தோற்றத்துடன் ராஜா நடை நடந்து வருபவரை தனியாக அடையாளம் காணலாம்.

கிருஷ்ணகிரி மாவட்டம், கோபிநத்தம்பட்டியைச் சேர்ந்த சிங்கப்பெருமாள், இத்தனை வயதாகியும் இதுவரை உடம்பிற்கு முடியவில்லை என்று ஒரு மாத்திரை, மருந்து சாப்பிட்டது கிடையாது, கண்ணாடி போட்டுக் கொள்ளாமலே தெளிவாக படிக்குமளவு பார்வை உள்ளது.

ஊரில் மளிகை கடை வைத்து சம்பாதித்த பணத்தில் பிள்ளை குட்டிகளை கரையேற்றிய பிறகு பெருமாளின் பெரும் பக்தனாக மாறிவிட்டார். திருமலை துவங்கி ஸ்ரீரங்கம் வரை உள்ள எந்த வைணவ கோயிலில் விழா விசேஷம் என்றாலும் மஞ்சள் பையில் ஒரு ஜோடி ஆடையுடன் கிளம்பிவிடுவார், கிடைத்த இடத்தில் தூங்கி, கிடைத்ததை சாப்பிட்டுக் கொண்டு ஆங்காங்கு நடக்கும் உற்வங்களின் போது பங்கேற்று ஆடுவதும், பாடுவதும், வரும் மக்களை ஆசீர்வாதிப்பதுமாக இவரது வாழ்க்கை போய்க்கொண்டு இருக்கிறது.

மனதில் கவலைகளையும், ஆசைகளையும் ஏற்றிக்கொள்ளாமல், இருக்கும் வாழ்க்கையை இயல்பாக வாழ்ந்தால் போதும் இந்த வயது என்றில்லை , எந்த வயதிலும் என்னைப் போல ஆட்டம், பாட்டம், உற்சாகமாக இருக்கலாம் எனும் சிங்கப்பெருமாள், பெருங்குரலெடுத்து பாட ஆரம்பிக்கிறார்.

இவரது பாடல் வரிகளைக் கேட்டு, கூட்டம் கூட ஆரம்பிக்கிறது. அடுத்த சில நிமிடங்களில் அங்கு உற்சாகமும், சந்தோஷமும் பொங்கி பிரவாகமெடுக்கிறது.

இவருக்கு எந்த குழுவும் கிடையாது, இவரும் எந்த குழுவிலும் இல்லை, எப்போதும் சிங்கிளாகவே வரும் சிங்கம் இவர். ஆனால் எந்த குழுவுடனும் சேர்ந்தும் ஆடுவார், யாருடனும் சேராமல் தனியாகவும் நடனமாடுவார். இவரை பார்த்துவிட்டாலே போதும் வந்துட்டாருய்யா நம்ம சிங்கப்பெருமாள் என்று இவரை அன்பும், உற்சாகமும் பொங்க மக்கள் சூழ்ந்து கொள்வார்கள்.

ஏதோ ஒரு பழைய படத்தில் இடம் பெற்ற பாடல்தான், அந்த படத்தில் இந்த பாடல் எப்படி பாடப்பட்டதோ, இவர் பாடும்போது தனக்கேற்ற ராகத்தில் கேட்பவர் உற்சாகம் அடையும்படி பாடுகிறார், பாடல்களைக் கேட்டால் நமக்கும் உற்சாகம் தொற்றிக்கொள்கிறது.

தேடிநின்ற கண்களிலே கண்ணன் வந்தான்
தீபம் ஒன்றை கையில் கொண்டு கண்ணன் வந்தான்
கேட்டவர்க்கு கேட்டபடி கண்ணன் வந்தான்
கேள்வியிலே பதிலாக கண்ணன் வந்தான்
தருமம் எனும் தேரிலே ஏறி கண்ணன் வந்தான்
தாளாத துயர்தீர்க்க கண்ணன் வந்தான்
கண்ணன் வந்தான் மாயக்கண்ணன் வந்தான்
கண்ணன் வந்தான்....

பாடல் தொடர்கிறது...பாராட்டுக்கள் குவிகிறது.