Dinamalar

கோல்கட்டா: ""நம்பிக்கை இல்லா தீர்மானம் மூலம், மத்திய அரசை கவிழ்க்க நினைக்கும், மேற்கு வங்க முதல்வர், மம்தா பானர்ஜியின் முயற்சிகளை, காங்கிரஸ் முறியடிக்கும். மன்மோகன் சிங் அரசுக்கு, 305 எம்.பி.,க்களின் ஆதரவு உள்ளது,'' என, காங்., செய்தித் தொடர்பாளர், ஷகீல் அகமது கூறியுள்ளார்.பார்லிமென்டின் குளிர்கால கூட்டத்தொடர், வரும், 22ம் தேதி துவங்குகிறது. "இந்தக் கூட்டத்தொடரின் முதல் நாளில், மத்தியில் ஆளும், பிரதமர் மன்மோகன் சிங் தலைமையிலான, ஐக்கிய முற்போக்கு கூட்டணி அரசுக்கு எதிராக, நம்பிக்கை இல்லா தீர்மானம் கொண்டு வரப்படும்' என, திரிணமுல் காங்கிரஸ் தலைவர், மம்தா பானர்ஜி நேற்று முன்தினம் அறிவித்தார்.

ஆதரவு கேட்டார்

இந்த நம்பிக்கை இல்லா தீர்மானம் வெற்றி பெற, ஐ.மு.கூட்டணி கட்சிகளும், இடதுசாரி கட்சிகளும் ஆதரவு தர வேண்டும் என்றும் கேட்டுக் கொண்டார். அத்துடன், பா.ஜ., தலைவர்களிடமும் ஆதரவு கேட்கப்படும் என்றார்.
இந்நிலையில், கோல்கட்டாவில் நேற்று நிருபர்களிடம் பேசிய, பா.ஜ., மூத்த தலைவர், முரளி மனோகர் ஜோஷி கூறியதாவது:
பா.ஜ., மூத்த தலைவரும், லோக்சபா எதிர்க்கட்சித் தலைவருமான, சுஷ்மா சுவராஜை, மேற்கு வங்க முதல்வர்,

மம்தா பானர்ஜி, தொலைபேசியில் தொடர்பு கொண்டு பேசியுள்ளார். அப்போது, பார்லிமென்டில், திரிணமுல் காங்., கொண்டு வர உள்ள நம்பிக்கை இல்லா தீர்மானத்திற்கு, ஆதரவு தர வேண்டும் என, கேட்டுக் கொண்டுள்ளார்.சுஷ்மா சுவராஜ், தற்போது பால் தாக்கரேயின் இறுதிச் சடங்கில் பங்கேற்பதற்காக, மும்பை சென்றுள்ளார். அவர் டில்லி திரும்பியதும், நாங்கள் எல்லாரும் கூடிப் பேசி, மம்தாவின் கோரிக்கை குறித்து முடிவு செய்வோம். இன்றோ அல்லது நாளையோ, பா.ஜ., தலைமையிலான, தேசிய ஜனநாயக கூட்டணி, இது தொடர்பாக முடிவெடுக்கும்.ஆபத்து இருக்காதுமம்தா கட்சியினர்கொண்டு வரும், நம்பிக்கை இல்லா தீர்மானம், பார்லிமென்டில் தோல்வி அடைந்து விட்டால், அடுத்த ஆறு மாதத்திற்கு, அரசுக்கு எந்த ஆபத்தும் இருக்காது. மற்றொரு நம்பிக்கை இல்லா தீர்மானத்தை, ஆறு மாதத்திற்குள் கொண்டு வர முடியாது.அதே நேரத்தில், நம்பிக்கை இல்லா தீர்மானம் வெற்றி பெற்றால், அரசு பதவி விலக நேரிடும். அந்த நேரத்தில், அடுத்த கட்ட நடவடிக்கைகள் பற்றி நாம் ஆலோசிக்க வேண்டும்.நம்பிக்கை இல்லா தீர்மானம் கொண்டு வர வேண்டுமெனில், எம்.பி.,க்கள், 50 பேர் ஆதரவு அளிக்க வேண்டும். அந்த அளவுக்கு, திரிணமுல் காங்.,கிற்கு எம்.பி.,க்கள் இல்லை. அதனால், இதர கட்சிகளை சார்ந்திருக்க வேண்டியது அவசியம்.