Dinamalar

சென்னை: முன்னாள் தி.மு.க., அமைச்சர் வீரபாண்டி ஆறுமுகம் பறவைக்காய்ச்சல் காரணமாக இறந்திருக்கலாம் என உறுதி செய்யப்படாத தகவல்கள் தெரிவிக்கின்றன. இதனிடையே, அவரது உடலுக்கு தி.மு.க., தலைவர் கருணாநிதி அஞ்சலி செலுத்தினார்.

சேலம் மாவட்ட தி.மு.க. செயலாளரும், முன்னாள் அமைச்சருமான வீரபாண்டி ஆறுமுகம் (75) நுரையீரல் பிரச்னை காரணமாக சென்னையை அடுத்த போரூர் ராமச்சந்திரா மருத்துவமனையில் கடந்த 17ம் தேதி அனுமதிக்கப்பட்டார். அவருக்கு தொடர்ந்து ஆக்சிஜன் செலுத்தப்பட்டு வந்தது. இந்நிலையில், இன்று காலை 10 மணியளவில் அவரது உடல்நிலை மோசமானது. டாக்டர்கள் கடும் முயற்சி செய்தும், இன்று காலை 11.30 மணியளவில் அவர் உயிர் பிரிந்தது. வீரபாண்டி ஆறுமுகம் உடலுக்கு தி.மு.க., தலைவர் கருணாநிதி அஞ்சலி செலுத்தினார்.

பறவைக்காய்ச்சல் காரணமா?

இதனிடையே வீரபாண்டி ஆறுமுகம் பறவைக்காய்ச்சல் காரணமாக மரணடைந்ததாக உறுதி செய்யப்படாத தகவல்கள் தெரிவிக்கின்றன.

கடந்த 1957ம் ஆண்டு தி.மு.க.,வில் உறுப்பினரான வீரபாண்டி ஆறுமுகம், 1957 முதல் 70 வரை பூலாவரி ஊராட்சி ஒன்றிய உறுப்பினராக தேர்வு செய்யப்பட்டார். பின்னர் 1970 ஊராட்சி ஒன்றிய தலைவராக தேர்வு செய்யப்பட்டார். அதன் பின்னர் கடந்த 1962,67,71,89,96 மற்றும் 2006ம் ஆண்டில் சட்டசபைக்கு தேர்வு செய்யப்பட்டார். 1978 முதல் 84ம் ஆண்டு வரை சட்டமேலவை உறுப்பினராக பணியாற்றினார். கடந்த தி.மு.க., ஆட்சியில் வேளாண் துறை அமைச்சராக பணியாற்றினார்.

3 நாள் துக்கம்:

வீரபாண்டி ஆறுமுகம் மரணமடைந்ததைத் தொடர்ந்து, தி.மு.க., சார்பில் மூன்று நாட்கள் துக்கம் அனுசரிக்கப்படும் என அக்கட்சி அறிவித்துள்ளது. மேலும் கட்சிக்கொடி அரைக்கம்பத்தில் பறக்கவிடப்படும். கட்சி நிகழ்ச்சிகள் அனைத்தும் 3 நாட்கள் ரத்து செய்யப்படும் எனவும் அறிவிக்கப்பட்டுள்ளது.

சேலத்தில் கடையடைப்பு:

வீரபாண்டி ஆறுமுகம் காலமானதையடுத்து, சேலத்தில் கடைகள் அடைக்கப்பட்டுள்ளன.

ஸ்டாலின் இரங்கல்:

வீரபாண்டி ஆறுமுகம் மரணடைந்ததை தொடர்ந்து, தி.மு.க, பொருளாளர் ஸ்டாலின் இரங்கல் தெரிவித்துள்ளார். வீரபாண்டி ஆறுமுகம் மரணம் தி.மு.க.,விற்கு இழப்பு என கூறியுள்ளார்.