Dinamalar

புதுடில்லி:சில்லரை வர்த்தகத்தில், நேரடி அன்னிய முதலீட்டை அனுமதித்த பிரச்னையில், தப்பிக்கப் பார்த்த மத்திய அரசுக்கு, எதிர்க்கட்சிகள் கடிவாளம் போட்டுள்ளன. "ஓட்டெடுப்புடன் கூடிய விவாதமே நடத்த வேண்டும்' என, ஒரே குரலில், நேற்று எதிர்க்கட்சிகள் வலியுறுத்தியதால், பிரச்னையை எப்படி கையாள்வது என, ஆளும் காங்கிரஸ் கலக்கம் அடைந்துள்ளது. எதிர்க்கட்சிகளின் ஒற்றுமையை உடைக்க, புதிய வியூகம் வகுத்து வருகிறது.

பார்லிமென்ட் குளிர்கால கூட்டத் தொடரின் முதல் நாளான நேற்று முன் தினம், பா.ஜ.,வும், இடதுசாரி கட்சிகளும், சில்லரை வர்த்தகத்தில், நேரடி அன்னிய முதலீட்டு பிரச்னையை எழுப்ப, முலாயம் சிங்கின் சமாஜ்வாதி மற்றும் மாயாவதியின் பகுஜன் சமாஜ் கட்சிகள், வேறு சில பிரச்னைகளை எழுப்பி, அமளியில் ஈடுபட்டதால், பிரச்னை திசை திரும்பியது.அத்துடன், மேற்கு வங்க முதல்வர், மம்தா பானர்ஜியின், திரிணமுல் காங்கிரஸ் கொண்டு வந்த நம்பிக்கை இல்லா தீர்மானமும் நிராகரிக்கப்பட்டதால், ஆளும் காங்கிரஸ் நிம்மதி அடைந்து.

ஆனால், இந்த நிம்மதிக்கு, நேற்று எதிர்க்கட்சிகள் அனைத்தும், வேட்டு வைத்தன. காலையில், லோக்சபா கூடியதும், வேறு எந்த அலுவல்களும் நடக்க, எதிர்க்கட்சிகள் அனுமதிக்கவில்லை. "சில்லரை வர்த்தகத்தில், நேரடி அன்னிய முதலீட்டை அனுமதித்தது தொடர்பாக, சபை விதி எண்184ன் கீழ், ஓட்டெடுப்புடன் கூடிய விவாதம் நடத்த வேண்டும்' என, ஒற்றைக் காலில் நின்றன. எதிர்க்கட்சிகளின் இந்த ஒருமித்த குரலால், ஆளும் தரப்பு சற்றே அதிர்ந்தது. முதலில், திரிணாமுல் காங்., - எம்.பி.,க்கள் அனைவரும், சபாநாயகர் இருக்கையை முற்றுகையிட்டனர். "ஓட்டெடுப்புடன் கூடிய விவாதம் நடத்த வேண்டும்' என, கோஷமிட்டனர்.உடன், பா.ஜ., மற்றும் இடதுசாரிகள், அ.தி.மு.க., சந்திரபாபு நாயுடுவின் தெலுங்கு தேசம், பீகார் முதல்வர் நிதிஷ் குமாரின்

ஐக்கிய ஜனதா தளம், முன்னாள் பிரதமர் தேவகவுடாவின் மத சார்பற்ற ஜனதா தளம், ஒடிசா முதல்வர் நவீன் பட்நாயக்கின் பிஜு ஜனதா தளம் என, அனைத்து எதிர்க்கட்சி எம்.பி.,க்களும் எழுந்து, ஓட்டெடுப்புடன் கூடிய விவாதத்திற்கு அனுமதிக்க வேண்டும் என, தொடர்ந்து குரல் கொடுத்தனர்."சில்லரை வர்த்தகத்தில், அன்னிய முதலீடு தொடர்பாக, ஒத்திவைப்பு தீர்மானம் கொண்டு வர, சமாஜ்வாதி கட்சி நோட்டீஸ் கொடுத்துள்ளது. அது என் பரிசீலனையில் உள்ளது' என, நேற்று முன் தினம், சபாநாயகர் மீரா குமார் தெரிவித்திருந்தார்.

அந்த நோட்டீஸ் ஏற்கப்படுவதாக அவர் அறிவித்து விட்டால், ஓட்டெடுப்புடன் கூடிய விவாதத்திற்கு வாய்ப்பே இல்லாமல் போய் விடும் என்பதால், எதிர்க்கட்சிகள் தங்கள் கோரிக்கையில், நேற்று உறுதியாக இருந்தன. இதனால், கடும் அமளி நிலவி, நண்பகல், 12:00 மணி வரை, சபை ஒத்திவைக்கப்பட்டது.மீண்டும், சபை கூடிய போதும், சபையில் ரகளை தொடரவே, வேறு வழியின்றி, சபை நாள் முழுவதற்கும் ஒத்தி வைக்கப்பட்டது.சபையில், நேற்று அமளி