Dinamalar

புதுடில்லி : புதிதாக அரசியல் கட்சி துவங்கி கிட்டதட்ட 2 மாதங்களுக்கு பிறகு தனது கட்சியின் புதிய பெயரை அரவிந்த் கெஜ்ரிவால் இன்று அறிவித்தார். சாதாரண மனிதனின் கட்சி என பொருள்படும் வகையில் ஆம் ஆத்மி கட்சி என அவர் தனது கட்சிக்கு பெயரிட்டுள்ளார். முன்னதாக, பிரசாந்த் பூஷன் மற்றும் கட்சியின் 300 க்கும் மேற்பட்ட தொண்டர்கள் கலந்து கொண்ட ஆலோசனை கூட்டம் நடந்தது. இக்கூட்டத்தில் கட்சியின் பெயர் மற்றும் எதிர்கால நடவடிக்கைகள் குறித்து ஆலோசிக்கப்பட்டது. பின்னர் தனது கட்சிக்கு ஆம் ஆத்மி கட்சி என அவர் பெயரிட்டுள்ளார். எனினும் இந்த அறிவிப்பு முறைப்படி இன்று மாலை அறிவிக்கப்படவுள்ளது.

பெயர் மாற்றம் ஏன்?:

"ஊழலுக்கு எதிரான இந்தியா" என்ற பெயரில் தனது புதிய அரசியல் கட்சியை அக்டோபர் 2ம் தேதி கெஜ்ரிவால் முறையாக துவங்கினார். இருப்பினும் சமூக சேவகர் அன்னா ஹசாரே, ஊழலுக்கு எதிரான இந்தியா என்ற இயக்கம் தனது தலைமையிலான குழு என்றும், அப்பெயரை அரசியல் கட்சியின் பெயராக அறிவிக்க கூடாது தெரிவித்ததை அடுத்து தனது கட்சியின் பெயரை மாற்ற அரவிந்த் கெஜ்ரிவால் தீர்மானித்தார். இதனால் அக்டோபர் 2ம் தேதி கட்சி துவங்குவது தொடர்பான ஆவணங்களை மட்டும் தயார் செய்த கெஜ்ரிவால் கட்சியின் பெயரை அறிவிக்காமல் இருந்து வந்தார். தனது ஆவணங்களை தேர்தல் ஆணையத்திடம் சமர்ப்பிக்கும் முன் மக்களின் கருத்துக்களையும் அவர் கேட்டு வந்தார்.

முறைப்படி பதிவு:

அரவிந்த் கெஜ்ரிவால் தனது கட்சியை நவம்பர் 26ம் தேதி டில்லியில் உள்ள ஜன்தர் மந்திரில் துவக்க உள்ளதாக ஏற்கனவே அறிவித்திருந்தார். இதற்கான வீடியோடேப் உள்ளிட்ட ஆவணங்களை இன்று நடைபெறும் கட்சி கூட்டத்தில் அவர் சமர்ப்பிக்க உள்ளார். கட்சி தொடர்பான 300 உறுதிச் சான்றுகள் உள்ளிட்ட முறைப்படியான நடவடிக்கைகளுடன் கட்சி பெயரையும் அடுத்த வாரம் தேர்தல் ஆணையத்திடம் கெஜ்ரிவால் சமர்ப்பிக்க உள்ளார்.

மக்கள் ஆதரவு:

அரவிந்த் கெஜ்ரிவாலின் புதிய கட்சிக்கு நாடு முழுவதிலும் அமோக ஆதரவு எழுந்துள்ளது. கடந்த 2 மாதங்களில் நாடு முழுவதிலும் இருந்து சுமார் 35,000 கருத்துக்கள் அரவிந்த் கெஜ்ரிவாலுக்கு வந்துள்ளது. அவற்றில் பெரும்பாலானவை கெஜ்ரிவாலின் அரசியல் கட்சியின் பெயர் குறித்த கருத்துக்கள் என்பது குறிப்பிடத்தக்கது. மற்றவைகள் லோக்பால் குறித்த அடுத்தகட்ட நடவடிக்கைகள், அதற்கான உறுப்பினர்கள் தேர்வு குறித்ததாகும்.