Dinamalar

புதுடில்லி :லோக்சபா தேர்தலுக்கு, இன்னும், 18 மாதங்களே உள்ள நிலையில், ஐக்கிய முற்போக்கு கூட்டணியை பலப்படுத்துவதற்கான நடவடிக்கைகளில், காங்கிரஸ் கட்சி இறங்கியுள்ளது. அடுத்த மாதம் நடக்கவுள்ள, காங்கிரஸ் சிந்தனையாளர் கூட்டத்தில், கூட்டணியில் புதிய கட்சிகளை வலைக்குள் இழுக்கவும், ஏற்கனவே இருக்கும் கட்சிகளை தக்க வைத்துக் கொள்வதற்குமான, செயல் திட்டத்தை உருவாக்க, காங்., மேலிடம் முடிவு செய்துள்ளது.

மத்தியில் ஆளும், காங்கிரஸ் தலைமையிலான ஐக்கிய முற்போக்கு கூட்டணியில், காங்கிரசுக்கு அடுத்தபடியாக, பிரதான கட்சியாக, மம்தாவின் திரிணமுல் காங்கிரஸ் அங்கம் வகித்தது. அந்த கட்சிக்கு, லோக்சபாவில், 19 எம்.பி.,க்கள் உள்ளனர்.ஆனால், சில்லரை வர்த்தகத்தில் அன்னிய முதலீட்டை அனுமதித்த விவகாரத்தில், காங்கிரசை கடுமையாக குற்றம் சாட்டிய மம்தா பானர்ஜி, கூட்டணியிலிருந்து வெளியேறுவதாக, அதிரடியாக அறிவித்தார்.இதனால், காங்கிரஸ் மேலிடம் ஆடிப் போனது. மம்தா கட்சி எம்.பி.,க்களின் ஆதரவுடன் தான், பல முக்கிய மசோதாக்களை, காங்கிரஸ் கட்சி, பார்லிமென்டில் தைரியமாக நிறைவேற்ற முடிந்தது. இதனால், மீதமுள்ள பதவிக் காலத்தை, எந்த பிரச்னையுமின்றி கழிக்க முடியுமா என்ற பயம், காங்., மேலிடத்துக்கு ஏற்பட்டது.

மோதல்:

அடுத்ததாக, சரத் பவாரின் தேசியவாத காங்கிரஸ் கட்சியுடனும், மகாராஷ்டிராவில், காங்கிரசுக்கு, முட்டல் மோதல்கள் தொடருகின்றன. மகாராஷ்டிரா காங்., கட்சியினரின் குற்றச்சாட்டு காரணமாகவே, தேசியவாத காங்., கட்சியை சேர்ந்த, அஜீத் பவார், துணை முதல்வர் பதவியிலிருந்து விலக நேர்ந்தது. தற்போதுள்ள நிலையில், இரு கட்சிகளுக்கும், சுமுகமாக உறவு இருப்பது போல் தென்பட்டாலும், லோக்சபா தேர்தல் வரை, இந்த உறவு நீடிக்குமா என்பது சந்தேகமே.ஐக்கிய முற்போக்கு கூட்டணியில் உள்ள, மற்றொரு முக்கிய கட்சியான, தி.மு.க.,வுக்கு, ஸ்பெக்ட்ரம் போன்ற விவகாரங்களில், காங்கிரஸ் கட்சியுடன் கருத்து வேறுபாடு உள்ளது. மத்திய அரசின் சில்லரை வர்த்தகத்தில் அன்னிய முதலீட்டு அனுமதி முடிவுக்கு, தற்போது தி.மு.க., கைகொடுத்தாலும், லோக்சபா தேர்தலில், அந்த கட்சியின் நிலை, மதில் மேல் பூனையாகவே உள்ளது. இந்நிலையில், இன்னும், 18 மாதங்களில் லோக்சபா தேர்தல் நடக்கவுள்ள நிலையில், கூட்டணியில் தற்போது இருக்கும் கட்சிகளை தக்க வைத்துக் கொள்ளவும், கூட்டணிக்கு புதிய கட்சிகளை இழுக்கவும், காங்கிரஸ் மேலிடம் தயாராகி வருகிறது. கூட்டணி இல்லாமல், தனித்து ஆட்சி அமைக்க முடியாது என்பதும், காங்கிரஸ் மேலிடத்துக்கு நன்றாகவே தெரிந்திருக்கிறது.

வலை:

தற்போது, ஐக்கிய முற்போக்கு கூட்டணிக்கு, வெளியில் இருந்து ஆதரவு அளிக்கும், சமாஜ்வாதி, பகுஜன் சமாஜ் ஆகிய கட்சிகளை, கூட்டணிக்குள் இழுப்பதற்கான முயற்சி மேற்கொள்ளப் பட்டுள்ளது. ஆனாலும், இந்த இரண்டு கட்சிகளும், உ.பி.,யை மையமாக வைத்து, அரசியல் நடத்துவதாலும், இரண்டுமே, எதிரெதிர் அணுகுமுறைகளை உடைய கட்சிகள் என்பதாலும், இந்த இரண்டில், ஏதாவது ஒரு கட்சியை மட்டுமே, கூட்டணியில் சேர்க்க முடியும் என்ற சிக்கலான நிலையும், காங்கிரசுக்குள் உள்ளது.இதில், சமாஜ்வாதி கட்சி, லோக்சபா தேர்தலுக்கான, முதல் கட்ட வேட்பாளர் பட்டியலை ஏற்கனவே அறிவித்து விட்டதும், பிரச்னையை பெரிதாக்கியுள்ளது. இதுதவிர, இடதுசாரி கட்சிகள், பிஜு ஜனதா தளம், ஐக்கிய ஜனதா தளம் போன்ற கட்சிகளை, தங்கள் வலைக்குள் இழுப்பதற்கான திட்டத்தையும், காங்கிரஸ் வைத்துள்ளது.

செயல் திட்டம்:

அடுத்த மாதம், 18லிருந்து, 20ம் தேதி வரை, ராஜஸ்தான் மாநிலம் ஜெய்ப்பூரில், காங்கிரஸ் கட்சியின், உயர்மட்டக் குழுவினர் பங்கேற்கும், சிந்தனையாளர் கூட்டம் நடக்கவுள்ளது. இதில், கூட்டணிக்குள், புதிய கட்சிகளை சேர்ப்பதற்கான செயல் திட்டங்கள் உருவாக்கப்படவுள்ளன.தேர்தலுக்கு பிந்தைய கூட்டணியை விட, தேர்தலுக்கு முந்தைய கூட்டணியே, ஆட்சி அமைப்பதற்கு, சாதகமான சூழ்நிலைக்கு வழி வகுக்கும் என, காங்கிரஸ் மேலிட தலைவர்கள் உணர்ந்துள்ளனர். இதனால், காங்கிரஸ் கட்சியின் சிந்தனையாளர் கூட்டத்தில் எடுக்கப்படும் முடிவுகள், எதிர்பார்ப்பை ஏற்படுத்தியுள்ளதாக, அரசியல் வட்டாரங்கள் தெரிவிக்கின்றன.