Dinamalar

வருகின்ற ஜனவரி மாதம் 12ம் தேதி சுவாமி விவேகானந்தரின் நூற்றைம்பதாவது ஆண்டு விழா நாடு முழுவதும் கொண்டாடப்பட உள்ளது.சென்னை மெரினா கடற்கரையில் உள்ள சுவாமி விவேகானந்தர் இல்லத்தில் இதையொட்டி சிறப்பு புகைப்பட கண்காட்சிக்கும், புதிய முப்பரிமாண காணொளிக்கும் ஏற்பாடாகியுள்ளது. கண்காட்சியில் இடம் பெற்றுள்ள காணக் கிடைக்காத சுவாமி விவேகானந்தரின் விசேஷ படங்கள்.39 வருடங்களே இந்த மண்ணில் இருந்தவர், ஆனால் ஒரு நூற்றாண்டைக் கடந்தும் மக்கள் மனதில் இருப்பவர். பத்தொன்பதாம் நூற்றாண்டின் தலைசிறந்த சமயத்தலைவர்களுள் ஒருவராக திகழ்ந்தவர். ரிஷிகளிடமும், முனிவர்களிடமும் இருந்த ஆன்மிகத்தை சாமன்ய மக்களிடம் கொண்டு சேர்த்தவர். அமெரிக்காவின் சிகோகோ நகரில் "சகோதர சகோதரிகளே' என்ற முன்மொழியுடன் இவர் பேசிய பிறகே உலக நாடுகளின் பார்வையில் இவரும், இந்தியாவும் புனிதமாக பார்க்கப்பட்டனர். சுவாமி ராமகிருஷ்ணரின் தலைசிறந்த சீடர். எழுச்சியுற வேண்டும் என நினைக்கும் இன்றைய இளைய தலைமுறையினர் இவரது கருத்துக்களை இப்போது படித்தால் கூட போதும், வீறு கொண்டு எழுவது திண்ணம்.

1863ம் ஆண்டு ஜனவரி மாதம் 12ம்தேதி கல்கத்தாவில் விசுவநாத் தத்தாவிற்கும், புவனேசுவரி தேவிக்கும் மகனாக பிறந்தவர். பெற்றோர் இட்ட பெயர் நரேந்திர நாத். தாய்மொழி வங்காளம், கல்லூரியில் தத்துவம் படித்தார். சிறந்த விளையாட்டு வீரர், இசையில் நிறைய ஆர்வம் உண்டு. சிறு வயது முதலே தியானத்தில் நாட்டம் கொண்டவர்.

மேல்நாட்டு தத்துவங்கள், ஆன்மிகம் குறித்து நிறைய படித்தார், இவருக்குள் கடவுள் குறித்தும், ஆன்மிகம் குறித்தும் நிறைய சந்தேகங்கள், இதனை நிவர்த்தி செய்து கொள்ள வேண்டி சுவாமி ராமகிருஷ்ணரை சந்தித்தார். அவர் மூலமாக பக்தி மார்க்கம், ஞானமார்க்கம் ஆகிய இரண்டின் அவசியத்தை உணர்ந்தார். துறவறம் பூண்டார். இந்தியா முழுவதையும் நான்கு ஆண்டுகள் சுற்றி வந்தார். நாட்டின் கலாச்சாரம், பண்பாடு, வாழ்க்கை நிலையை அனுபவித்து அறிந்தார்.

பயணத்தின் ஒரு கட்டமாக 1892ல் கன்னியாகுமரி சென்றவர் கடல் நடுவில் உள்ள பாறைக்கு நீந்திச் சென்று அங்கு மூன்று நாள் தியானத்தில் இருந்து திரும்பினார். பின்னர்தான் அமெரிக்கா பயணமாகி உலகப்புகழ் பெற்ற சொற்பொழிவை நிகழ்த்தினார். தொடர்ந்து லண்டன் போன்ற நாடுகளில் பயணம் மேற்கொண்டு நிறைய சொற்பொழிவாற்றினார்.

இந்தியா திரும்பியதும் தனது குருவான ராமகிருஷ்ணர் பெயரில் மடத்தை நிறுவினார். தொடர்ந்து இந்தியா முழுவதும் சுற்றுப்பயணம் மேற்கொண்டு இளைஞர்களை குறிப்பாக வைத்து பேசினார். அவரது பேச்சுக்கள் இளைஞர்களின் நாடி, நரம்பு, ரத்த நாளங்களில் எல்லாம் கலந்து பரவி மிகப்பெரிய ஆன்மிக எழுச்சியை விதைத்தது.

விவேகானந்தர் என்ற வீரத்துறவியினை ஒட்டு மொத்த நாடே திரும்பிப்பார்த்து போற்றி கொண்டாட ஆரம்பித்தபோது , 39 வயதில் 1902ம் ஆண்டு ஜூலை 4ம்தேதி பேலூரில் இறந்தார்.

மனிதர்கள் இயல்பில் தெய்வீகமானவர்கள் அவர்களுக்குள் இருக்கும் தெய்வீகத்தை வெளிப்படுத்துவதே மனித வாழ்க்கையின் சாரம் என்பதே இவரது சொற்பொழிவில் மிகுந்து நிற்கும் உயர்ந்த கருத்தாகும்.

இந்த உயர்ந்த கருத்தினை வாசிப்பதோடு நிறுத்திவிடாமல், வாழ்ந்து காட்டவேண்டும் அதுவே சுவாமி விவேகானந்தருக்கு செலுத்தும் மிகப்பெரிய மரியாதையாகும்.

முக்கிய குறிப்பு: விவேகானந்தர் பற்றிய வித்தியாசமான மேலும் பல புகைப்படங்களைக்காண சிவப்பு பட்டையில் உள்ள போட்டோ கேலரி பகுதியை கிளிக் செய்யவும்.