Dinamalar

ஆமதாபாத் : குஜராத்தில் சட்டமன்ற தேர்தலுக்கான ஓட்டு எண்ணிக்கை இன்று காலை துவங்கி நடைபெற்று வருகிறது. ஆளும் பா.ஜ., 121 இடங்களை கைப்பற்றி ஆட்சியை தக்க வைத்துள்ளது. மொத்தமுள்ள 182 இடங்களில், பா.ஜ.,வுக்கு 121 இடங்களும், காங்கிரசுக்கு 57 இடங்களும், மற்ற கட்சிகள் 4 இடங்களையும் கைப்பற்றியுள்ளன. பா.ஜ.,வில் இருந்து பிரிந்த கேசுபால் பட்டேலை மோடி இன்று சந்தித்து பேசினார். இமாசல பிரதேசத்தி்ல் மொத்தம் 68 தொகுதிகளில் காங்கிரஸ் 36 இடங்களை பிடித்துள்ளது. ஆளும் கட்சியான பா.ஜ., 25 இடங்களை பிடித்துள்ளது.
குஜராத்தில் மீண்டும் பா.ஜ., வெற்றி பெற்று நரேந்திர மோடி 3வது முறையாக ஆட்சியை பிடிக்கிறார். மோடி போட்டியிட்ட மணிநகர் ‌தொகுதியில் அவர் எதிர்த்து போட்டியிட்டவரை 70 ஆயிரம் ஓட்டுக்கள் வித்தியாசத்தில் வெற்றி பெற்றார். முன்னேறி செல்லும் காலம் இது, பின்னோக்கி பார்க்க வேண்டிய அவசியமில்லை, மக்கள் சேவை தொடர்கிறது என மோடி தனது வெற்றி குறித்து கருத்து தெரிவித்துள்ளார். இமாச்சால் பிரதேசத்தில் ஆளும் பா.ஜ., தனது ஆட்சியை இழக்கிறது. இங்குள்ள முதல்வர் பதவியை இழக்கும் பிரேம்குமார் துமால் கூறுகையில் மக்கள் முடிவை நான் ஏற்கிறேன் என்றார்.

குஜராத் தேர்தல் :

குஜராத்தில் 182 தொகுதிகளுக்கான சட்டமன்ற தேர்தல் இரண்டு கட்டங்களாக டிசம்பர் 13 மற்றும் 17 ஆகிய தேதிகளில் நடைபெற்றது. இந்த தேர்தலில் 71.32 சதவீதம் ஓட்டுக்கள் பதிவாகி உள்ளன. தேர்தல் தேதி அக்டோபர் 4ம் தேதி தேர்தல் கமிஷனால் அறிவிக்கப்பட்டது. இன்று நடைபெறும் ஓட்டு எண்ணிக்கை 33 மையங்களில் இன்று காலை 8 மணிக்கு துவங்கி நடைபெற்று வருகிறது. பலத்த பாதுகாப்புக்களுக்கு இடையே நடைபெறும் இந்த

ஓட்டு எண்ணிக்கையில் தேர்தலுக்கு பயன்படுத்தப்பட்ட மொத்தம் 44,579 மின்னறு வாக்கு எந்திரங்களில் பதிவாகி உள்ள ஓட்டுக்கள் எண்ணப்படுகின்றன.காலை 11 மணியளவில் தேர்தல் முடிவுகள் வெளியிடப்பட்டு குஜராத்தின் அடுத்த முதல்வர் யார் என தெரிய வரும். தேர்தல் சர்வே : குஜராத் சட்டமன்ற தேர்தல் குறித்து இதுவரை நடத்தப்பட்ட அனைத்து கருத்து கணிப்புக்களும் மோடியின் வெற்றியை உறுதி செய்துள்ளன. பா.ஜ., 2014ம் ஆண்டு நடைபெற உள்ள தேர்தலில் பிரதமர் வேட்பாளராக மோடியை அறிவிக்கும் என்ற நம்பிக்கை அனைவர் மனதில் இருப்பதால் இந்த வெற்றி அவரின் செல்வாக்கை மேலும் அதிகரிக்கும் என கருத்து கணிப்புக்கள் தெரிவிக்கின்றன. இந்த தேர்தலில் மோடி வெற்றி பெற்றால் குஜராத்தில் தொடர்ந்து 5வது முறையாக ஆட்சி அமைத்து பா.ஜ., புதிய சாதனைபடைக்கும்.

மோடியின் வெற்றி வாய்ப்பு:

இரண்டு கட்டங்களாக நடத்தப்பட்ட குஜராத் சட்டமன்ற தேர்தல் குறித்த கருத்து கணிப்பு தேர்தலுக்கு முன் 60 தொகுதிகளில், 239 இடங்களில் நடைபெற்றது. இதில் 3755 பேர் பங்கேற்றனர். கருத்து கணிப்பில் பெரும்பாலானோர் 2002 மற்றும் 2007ம் ஆண்டு தேர்தல்களை விட இம்முறை அதிக ஓட்டு எண்ணிக்கை வித்தியாசத்தில் மோடி வெற்றி பெறுவார் என தெரிவித்துள்ளனர். பா.ஜ., விற்கு ஆதரவாக 48 சதவீதம் பேர் இந்த கருத்து கணிப்பில் வாக்களித்துள்ளனர். மேலும் பா.ஜ., 129 முதல் 141 ‌இடங்களை கைப்பற்றும் என தெரிவிக்கப்பட்டுள்ளது. இதில் காங்கிரசிற்கு ஆதரவாக 36 சதவீதம் பேர் வாக்களித்துள்ளனர். காங்கிரஸ் 37 முதல் 45 இடங்களில் வெற்றி பெறம் என கருத்து கணிப்பு முடிவுகள் தெரிவித்துள்ளன.