Dinamalar

சென்னை: இசையின் லாவகத்தினால் கோடிக்கணக்கானவர் உள்ளத்தை கொள்ளை கொண்ட பிரபல கர்நாடக இசை பாடகி நித்யஸ்ரீயின் கணவர் மகாதேவன் இன்று அடையாறு ஆற்றில் விழுந்து தற்கொலை செய்து கொண்டார்.

இசையில் மயக்கும் தன்மை கொண்டவர்:

பிரபல சங்கீத மேதை டி. கே., பட்டம்மாளின் பேத்தி நித்யஸ்ரீ. இவரது தந்தை மிருதங்க வித்வான் ஆவார். தந்தையும் ,மகளும் மேடையில் இருந்தால் கச்சேரி களை கட்டி விடும். அசையாத உள்ளம் கொண்டவர்களின் கைகளும் தாளம் போடத்துவங்கி விடும். உலகம் முழுவதும் உள்ள பிரபல சபாக்களில் கர்நாடக கச்சேரி நடத்தி வந்தார். மேடையில் இவர் அமைந்து ஆலாபனையுடன் தனக்கே உரிய பாணியில் முகத்தை மாற்றி கைகளை உயர்த்தி ராகம் பிடிக்கும் போது மயங்காத உள்ளங்களும் மயங்கி நிற்கும். மேடையில் தனது கச்சேரி முடியும் வரை அனைவரையும் தனது இசை தன்மையால் அசைய விடாமல் கட்டிப்போட்டு விடுவார்.

இவரது கர்நாடக இசை வல்லமைக்கும் மேலாக சினிமாவிலும் அவ்வப்போது பாடி வந்தார். இந்த மாதம் மார்கழி என்பதால் வரிசையாக கச்சேரி புக் ஆகியிருந்தது. இந்நிலையில் கணவர் மகாதேவன் மதியம் ஒரு மணியளவில் தனது காரில் ஏறி வெளியே புறப்பட்டார். கோட்டூர் புரத்தில் இருந்து அடையாறு நோக்கி சென்றார். கோட்டூர்புரம் பாலத்தில் காரை நிறுத்தினார். பின்னர் இந்தஆற்றில் குதித்து அங்கேயே உயிரை மாய்த்து கொண்டார். இவர் ஆற்றில் விழுந்ததை அக்கம் பக்கம் பார்த்தவர்கள் போலீசுக்கு தகவல் கொடுத்தனர். போலீசார் வந்து பிணத்தை மீட்டு மகாதேவன் தான் என உறுதி செய்தனர்.

இந்த தகவல் நித்யஸ்ரீக்கு தெரிவிக்கப்பட்டது. இதனை கேள்விப்பட்ட அதிர்ச்சியில் நித்யஸ்ரீ சம்பவ இடத்திற்கு வந்தார். அங்கு கணவர் பிணத்தை பார்த்து கதறி அழுதார். மகாதேவன் உடல் ராயப்பேட்டை அரசு ஆஸ்பத்திரிக்கு அனுப்பி வைக்கப்பட்டுள்ளது.