Dinamalar

புதுடில்லி: டில்லியில் மருத்துவ மாணவி கற்பழிக்கப்பட்ட விவகாரம் தற்போது விஸ்வரூபம் எடுத்துள்ளது. இன்று காலை டில்லியின் முக்கிய பகுதியான இந்தியா கேட் பகுதியில் ஆயிரக்கணக்கான மாணவ, மாணவிகள் திரண்டனர். ஜனாதிபதி மாளிகையை நோக்கி ‌செல்ல முற்பட்டபோது, போலீசார் அனுமதி மறுத்தனர்.
கலைந்து செல்லுமாறு வலியுறுத்தியபோதும் மறுத்ததால் மாணவ, மாணவிகள் மீது போலீசார் தண்ணீர் பீய்ச்சி அடித்தனர். கண்ணீர் புகை வீசப்பட்டது. தடியடி பிரயோகமும் நடந்தது. இதனையடுத்து நாலாபுறமும் மாணவ, மாணவிகள் சிதறி ஓடினர். பலர் கைது செய்யப்பட்டுள்ளனர் . போலீசார் மீது மாணவர்கள் கல் வீசித் தாக்கினர். போராட்டக்களம் வன்முறைக்களமாக மாறியது. இதனால் டில்லியில் பதட்டம் தொற்றிக்கொண்டுள்ளது. தொடர்ந்து அமைதி ஏற்பட்டு மாணவ, மாணவிகள் இன்னும் கலைந்து செல்லாமல் கோஷங்கள் எழுப்பியபடி நிற்கின்றனர். மாலையில் மீண்டும் 6 வது முறையாக போலீசார் தடியடி நடத்தினர். இதில் பலர் காயமுற்றதாக தெரிகிறது. தொடர்ந்து பதட்டம் நீடிக்கிறது.

கடந்த வாரத்தில் ஓடும் பஸ்சில் ஒரு கும்பல் இரவில் மருத்துவ மாணவியை கற்பழித்தனர். இதில் சுயநினைவு இழந்தார். தீவிர சிகிச்சைக்கு பின்னர் தற்போது உடல் நலம் தேறி வருகிறார். , இந்த வழக்கில் இதுவரை 6 பேர் கைது செய்யப்பட்டுள்ளனர்.

ஜனாதிபதி மாளிகை முற்றுகை :

குற்றவாளிகள் தூக்கிலிடப்பட வேண்டும் என்று டில்லியில் மாணவிகள் போராட்டம் நடத்தி வருகின்றனர். நேற்று டில்லி மாணவிகள் மற்றும் மகளிரணியினர் ஜனாதிபதி பிரணாப் மாளிகை நோக்கி பேரணியாக புறப்பட்டு சென்று முற்றுகையிட்டனர். தொடர்ந்து ஆங்காங்கே சாலை மறியலிலும் ஈடுபட்டனர். இதனால் இங்கு போக்குவரத்து கடுமையாக பாதிக்கப்பட்டது. ஜனாதிபதி மாளிகைக்கு வந்த அதிகாரிகள் மற்றும் முக்கிஸ்தர்கள் காரை மறித்ததால் அங்கு பரபரப்பு ஏற்பட்டது. தொடர்ந்து அங்கு ஆயுதம் தாங்கிய போலீசார் குவிக்கப்பட்டுள்ளனர்.

இன்று இந்தியா கேட் பகுதியில் திரண்டு ஆர்ப்பாட்டம் நடத்திய போது போலீசார் தடியடி நடத்தி கலைத்தனர். தொடர்ந்து அங்கு பதட்டம் நிலவுகிறது.

நாராயணசாமி விளக்கம்:

இந்த சம்பவம் தொடர்பாக ஒரு தொலைக்காட்சிக்கு பேட்டி அளித்த மத்திய அமைச்சர் நாராயணசாமி கூறுகையில்: கற்பழிப்பு சம்பவம் மிக கொடூரமானதுதான். இதே நேரத்தில் குற்றவாளிகளை உடனே தூ்க்கிலிட முடியாது. விசாரணை மற்றும் கோர்ட்தான் முடிவு செய்யும். இன்றைய போராட்டத்திற்கு மாணவர்கள் அனுமதி பெறவில்லை. குறிப்பாக ஜனாதிபதியை சந்திக்க வேண்டுமானால் முன்கூட்டியே அனுமதி கேட்க வேண்டும். இதற்கு சில பிரதிநிதிக‌ளை மட்டும் சந்திக்க அனுமதி அளிக்க முடியும். ஒட்டு மொத்தமாக யாரும் ஜனாதிபதி மாளிகைக்குள் செல்ல முடியாது. என்வே போலீசார் கலைந்து செல்ல வலியுறுத்தினர். இதனையடுத்து தள்ளுமுள்ளு ஏற்பட்டது. என்றார்.

அமைதி காக்க வேண்டுகோள்:

இது தொடர்பாக உள்துறை செயலர் ஆர்.கே.,சிங் மாணவர்கள் வன்முறையில் குதிக்க கூடாது, எதிர்ப்பை காட்டுவதில் அமைதி காக்க வேண்டும் என்றும் வேண்டுகோள் விடுத்துள்ளார்.

பிரதமர் அவசர ஆலோசனை:

இந்த விவகாரம் தொடர்பாக உள்துறை அமைச்சர் சுசீல்குமார் ஷிண்டே பிரதமரை சந்தி்த்து அவசர ஆலோசனை நடத்தினார். பாதுகாப்ப விஷயங்கள் குறித்து ஆலோசிக்கப்பட்டன.

மக்களிடம் பேச வேண்டும் :

பா.ஜ., செய்தித்தொடர்பாளர் ரவி சங்கர் பிரசாத், டில்லியில் உள்ள பெண்கள், குழந்தைகள் ஏன் வயதானவர்கள் கூட தாங்கள் பாதுகாப்பாக இல்லை என உணர்கிறார்கள். அதே வேளையில் கற்பழிப்புக்கு எதிராக போராட்டம் நடத்திய மாணவர்கள் மீது கண்ணீர் புகை குண்டு வீச்சு, தடியடி நடத்தப்பட்டுள்ளது. இளம் பெண்களும், இளைஞர்களும், நாடும், தங்களது பாதுகாப்பு தொடர்பான உறுதிமொழியை பிரதமரிடமிருந்து எதிர்பார்க்கிறது. இன்றாவது உங்களது மவுனத்தை கலையுங்கள் என்று தெரிவித்துள்ளார்.இதே போல், காங்கிரஸ் தலைவர் சோனியாவும் தனது மவுனத்தை கலைத்து மக்களிடம் பேச வேண்டும் எனவும் ரவிசங்கர் பிரசாத் தெரிவித்துள்ளார்.