Tiruppavai-Tiruvempavai | மார்கழி வழிபாடு : திருப்பாவை- திருவெம்பாவை| Dinamalar

பொது செய்தி

தமிழ்நாடு

மார்கழி வழிபாடு : திருப்பாவை- திருவெம்பாவை

Added : டிச 27, 2012
Advertisement
மார்கழி வழிபாடு : திருப்பாவை- திருவெம்பாவை

மார்கழி மாதத்தில் ஆண்டாள் பாடிய திருப்பாவையையும், மாணிக்கவாசகர் பாடிய திருவெம்பாவையையும் உங்கள் இனிய குரலில் பாடி மகிழுங்கள்.

திருப்பாவை

பாடல் - 13


புள்ளின்வாய் கீண்டானைப்பொல்லா அரக்கனைக்
கிள்ளிக் களைந்தானைக் கீர்த்திமை பாடிப்போய்
பிள்ளைகள் எல்லாரும் பாவைக் களம்புக்கார்
வெள்ளி எழுந்து வியாழம் உறங்கிற்றுப்
புள்ளும் சிலம்பின காண் போதரிக் கண்ணினாய்!
குள்ளக் குளிரக் குடைந்துநீர் ஆடாதே
பள்ளிக்கிடத்தியோ! பாவாய்! நீ நன்னாளால்
கள்ளம் தவிர்ந்து கலந்தேலோர் எம்பாவாய்.

பொருள்: பறவை வடிவம் கொண்ட பகாசுரனின் வாயைப் பிளந்தும், ராவணனின் தலையைக் கொய்யவும் அவதாரம் எடுத்த நாராயணனின் புகழை பாடியபடியே, நம் தோழியர் எல்லாரும் பாவை விரதம் இருக்கும் இடத்திற்கு வந்து விட்டனர். வெள்ளி முளைத்து, வியாழன் மறைந்து விட்டது. பறவைகள் பாடுகின்றன. பெண்ணே! விடியலை உணர்த்தும் அறிகுறிகள் தெரிந்தும், குளிர்ந்த நீரில் குளிக்க வராமல் என்ன செய்கிறாய்? அந்தக் கண்ணனை நினைக்கும் ஒவ்வொரு நாளும் நன்னாள் அல்லவா! மார்கழியில் அவனை நினைப்பது இன்னும் சிறப்பல்லவா! எனவே, தூக்கம் என்கிற திருடனைத் தவிர்த்து எங்களுடன் நீராட வா.


திருவெம்பாவை

பாடல் - 13


பைங்குவளைக் கார் மலரால் செங்கமலப் பைம்போதால்
அங்கங் குருகினத்தாற் பின்னும் அரவத்தால்
தங்கள் மலங்கழுவு வார்வந்து சார்தலினால்
எங்கள் பிராட்டியும் எங்கோனும் போன்றிசைந்த
பொங்கு மடுவிற் புகப்பாய்ந்து பாய்ந்து நம்
சங்கஞ் சிலம்பச் சிலம்பு கலந்தார்ப்பக்
கொங்கைகள் பொங்கக் குடையும் புனல் பொங்கப்
பங்கயப் பூம்புனல் பாய்ந்தாடு ஏலோர் எம்பாவாய்.

பொருள்: கரிய குவளை மலர்கள் குளத்தின் நடுவிலே உள்ளன. அருகில் சிவந்த நிறத்தில் தாமரை முளைத்துக் கிடக்கிறது. நீர் காக்கைகள் நீரில் மிதக்கின்றன. (செந்தாமரை சிவனையும், கரிய குவளை மலர் அம்பாளையும் குறிக்கிறது)
இந்தக் குளத்தில் தங்கள் அழுக்கை களைய மக்கள் வருகிறார்கள். அவர்கள் "நமசிவாய' என சொல்லி சப்தம் எழுப்புகிறார்கள். இந்தக் காரணங்களால், இந்த குளம் எங்கள் சிவனையும், பார்வதியையும் போல் தோற்றமளிக்கிறது. சங்கு வளையல்கள் சலசலக்க, கால் சிலம்புகள் ஒலியெழுப்ப, மார்புகள் விம்ம, தாமரை மலர் நிறைந்த இந்த தெய்வீக குளத்தில் நீராடுவோம்.

Advertisement

இதையும் தவறாமல் படிங்க ...



Advertisement

வாசகர் கருத்து

முதல் நபராக கருத்து தெரிவியுங்கள்!

உங்கள் கருத்தைப் பதிவு செய்ய

(Press Ctrl+g or click this   to toggle between English and Tamil)
Login :
New to Dinamalar ?
கருத்து விதிமுறை