Siege Anna arivalayam : Hindu maga sabhai threat | அறிவாலயத்தை முற்றுகையிடுவோம் : இந்து மகா சபை அறிவிப்பு| Dinamalar

பொது செய்தி

தமிழ்நாடு

அறிவாலயத்தை முற்றுகையிடுவோம் : இந்து மகா சபை அறிவிப்பு

Added : ஜன 10, 2013
Advertisement
அறிவாலயத்தை முற்றுகையிடுவோம் : இந்து மகா சபை அறிவிப்பு

தி.மு.க., வாரிசு அரசியலை, சங்கர மடத்திற்கு ஒப்பிட்டு, மத்திய அமைச்சர் அழகிரி பேசியதை கண்டித்து, சென்னை, திருச்சி உள்ளிட்ட இடங்களில், தி.மு.க., வுக்கு எதிராக, கண்டன போஸ்டர்கள் ஒட்டப்பட்டுள்ளன.
தன் பேச்சுக்கு அழகிரி வருத்தம் தெரிவித்து, வாபஸ் பெறவில்லை என்றால், அறிவாலயம் முன், முற்றுகை போராட்டம் நடத்தப்படும் என, தமிழ்நாடு இந்து மகா சபை அறிவித்துள்ளது. பா.ம.க.,வை சேர்ந்த சிலர், தி.மு.க.,வில் இணையும் நிகழ்ச்சி, சமீபத்தில் சென்னை அறிவாலயத்தில் நடந்தது. இந்நிகழ்ச்சியில் பேசிய, தி.மு.க., தலைவர் கருணாநிதி, "என் ஆயுள் முழுவதும், தமிழ் சமுதாய மேன்மைக்காக பாடுபடுவேன்; எனக்கு பின் ஸ்டாலின் பாடுபடுவார்' என்றார். தன் பேச்சில், தனக்கு பின் அடுத்த தலைவர் ஸ்டாலின் என்பதை, கருணாநிதி மறைமுகமாக தெரிவித்தார்.

இது குறித்து மத்திய அமைச்சர் அழகிரி, நிருபர்களிடம் கூறுகையில், "தி.மு.க., ஒன்றும் சங்கரமடம் அல்ல. கட்சி பதவிக்கு யார் வரவேண்டும் என்பதை பொதுக்குழு, செயற்குழுக் கூடி முடிவு செய்யும்' என்றார். இந்நிலையில் சென்னை, திருச்சி உள்ளிட்ட இடங்களில், தமிழ்நாடு இந்து மகா சபை சார்பில், தி.மு.க., வுக்கு எதிராக கண்டன போஸ்டர்கள் ஒட்டப்பட்டுள்ளன.

சென்னை நகரில் ஒட்டப்பட்டுள்ள போஸ்டரில், "சங்கரமடம் ஒரு புனிதமான இடம். கடவுள் இல்லை என்று சொல்லும் கருணாநிதி குடும்பத்திற்கு, சங்கரமடத்தை பற்றி பேசுவதற்கு, என்ன அருகதை இருக்கிறது. வன்மையாக கண்டிக்கிறோம்' என்ற வாசகங்கள் இடம் பெற்றுள்ளன.

இது குறித்து தமிழ்நாடு இந்து மகாசபை தலைவர் ஸ்ரீகண்டன் கூறியதாவது: தமிழகத்தில், 75 சதவீதம் இந்துக்கள் உள்ளனர். அவர்களின் மனம் புண்படும்படி, "இந்துக்கள் திருடர்கள்' என்ற வார்த்தையை கருணாநிதி ஏற்கனவே பயன்படுத்தினார். தற்போது, அவரது மகன் அழகிரி, தி.மு.க., குடும்ப வாரிசை, சங்கரமடத்துடன் ஒப்பிட்டு பேசியுள்ளார். சங்கர மடத்தில் வாரிசு அரசியல் நடக்கவில்லை. பாரம்பரியமிக்க, புனிதமான இடத்தை, அரசியலாக்கி பேசியது கண்டிக்கத்தக்கது. அழகிரி, தன் பேச்சுக்கு வருத்தம் தெரிவித்து, வாபஸ் பெற வேண்டும். இல்லையென்றால், அடுத்தக் கட்டமா, அறிவாலயம் முன் முற்றுகை போராட்டம் நடத்துவோம். இவ்வாறு அவர் கூறினார்.

-நமது நிருபர்-

Advertisement

இதையும் தவறாமல் படிங்க ...



Advertisement

வாசகர் கருத்து

முதல் நபராக கருத்து தெரிவியுங்கள்!

உங்கள் கருத்தைப் பதிவு செய்ய

(Press Ctrl+g or click this   to toggle between English and Tamil)
Login :
New to Dinamalar ?
கருத்து விதிமுறை