புதுடில்லி: ஆந்திரா மாநில முன்னாள் முதல்வர் ராஜசேகர ரெட்டியின் மகன் ஜெகன் மோகன் ரெட்டி, அதிகளவு வருமான வரி செலுத்துபவர்கள் வரிசையில் முதலிடத்தில் உள்ளதாக செய்திகள் வெளியாகி உள்ளன. ஆந்திர மாநில முன்னாள் முதல்வர் ராஜசேகர ரெட்டியின் மகன் ஜெகன் மோகன் ரெட்டி. இவர், 2008-09ம் நிதியாண்டிற்கான மொத்த வருமான வரியாக 2.92 லட்சம் ரூபாய் செலுத்தியிருந்தார். ஆனால், இந்தாண்டு முதல் ஆறு மாதங்களில்,  வருமான வரி முன்பணமாக 6.6 கோடி ரூபாய் செலுத்தி உள்ளார். இதன் மூலம் 2009-10ம் நிதியாண்டிற்கான இவரது வருமானம் 70 கோடி ரூபாயை தாண்டும் என எதிர்பார்க்கப்படுகிறது.

அரசியல் வாதிகளில் அதிக வருமானவரி செலுத்துவோர் 100 பேர் பட்டியலில் ஜெகன் இடம்பெற்றுள்ளார். மேலும்,  உ.பி.,முதல்வர் மாயாவதியை விட அதிக வரிசெலுத்தி, அவரை பின்னுக்கு தள்ளியுள்ளார். கிரிக்கெட் வீரர்கள் மத்தியில், சச்சின் டென்டுல்கர் அதிகளவு வருமான வரி செலுத்துபவர்கள் வரிசையில் முதலிடத்தில் உள்ளார். இவர், கடந்தாண்டு எட்டு கோடி ரூபாய் வருமான வரி செலுத்தினார். இந்தாண்டு, 1.5 கோடி ரூபாய் வருமான வரி முன்பணமாக செலுத்தி உள்ளார். இவருக்கு அடுத்த இடத்தில் இந்திய கிரிக்கெட் அணி கேப்டன் மகேந்திர சிங் தோனி உள்ளார். இவர் கடந்தாண்டு 4.6 கோடி ரூபாய் வருமான வரி செலுத்தினார். இந்தாண்டு முதல் ஆறு மாதத்தில், இரண்டுகோடி ரூபாய் வருமான வரி முன்பணமாக செலுத்தி உள்ளார்.

சினிமான நடிகர்களில்,அதிகளவு வருமான வரி செலுத்துபவர்களில் நடிகர் ஷாருக்கான் முதலிடத்தில் உள்ளார். இவர் கடந்தாண்டு 34.45 கோடி ரூபாய் வருமான வரி செலுத்தி உள்ளார். இவருக்கு அடுத்த இடத்தில் நடிகர் அக்ஷய் குமார் உள்ளார்.  இவர் கடந்தாண்டு 33 கோடி ரூபாய் வருமான வரி செலுத்தி உள்ளார். ஆனால், இந்த நிதியாண்டு, அக்ஷய் குமார் வருமான வரி முன்பணமாக 4.5 கோடி ரூபாயும், ஷாருக்கான்  3.5 கோடி ரூபாயும் செலுத்தி உள்ளனர்.  சல்மான் கான் கடந்தாண்டு 14 கோடி ரூபாய் வருமான வரி செலுத்தி மூன்றாவது இடத்தில் உள்ளார்.