சென்னை : டாஸ்மாக் பணியாளர்கள் சம்பள உயர்வு, உள்ளிட்ட கோரிக்கைகளை வலியுறுத்தி, சென்னையில் இன்று அ.தி.மு.க., சார்பில் உண்ணாவிரதம் நடக்கிறது. அ.தி.மு.க., பொதுச் செயலர் ஜெயலலிதா வெளியிட்டுள்ள அறிக்கை: அரசின் வருமானத்தை உயர்த்த மதுபான விலையை கடுமையாக உயர்த்தும் அரசிற்கு, ஊழியர்களின் வருமானத்தை உயர்த்த மனமில்லாதது வேதனை அளிக்கிறது. டாஸ்மாக் ஊழியர்களின் சம்பளத்தை உயர்த்த வேண்டும் என, அ.தி.மு.க., ஆர்பாட்டம் நடத்தியது. போராட்டம் நடத்துவது முறைதானா என்று முதல்வர் மிரட்டல் அறிக்கை விடுகிறாரே தவிர, சம்பளத்தை உயர்த்த நடவடிக்கை எடுக்கவில்லை. டாஸ்மாக் ஊழியர்களின் சம்பள உயர்வு உள்ளிட்ட கோரிக்கைகளை வலியுறுத்தி, இன்று சென்னை சேப்பாக்கம் அரசு விருந்தினர் மாளிகை முன் மாநிலம் முழுவதும் உள்ள டாஸ்மாக் தொழிலாளர்கள் பங்கேற்கும் உண்ணாவிரதம் நடக்கிறது. உண்ணாவிரதத்தை தலைமை நிலையை செயலர் செங்கோட்டையன் துவக்கி வைக்கிறார்; எம்.ஜி.ஆர்., மன்ற செயலர் ஜெயக்குமார் முடித்து வைக்கிறார். இவ்வாறு அறிக்கையில் கூறப்பட்டுள்ளது.