ம.தி.மு.க., பொதுச்செயலர் வைகோ அறிக்கை: இப்போதுள்ள முல்லைப் பெரியாறு அணையில் இருந்து 10 கிலோ மீட்டருக்கு அப்பால், கேரளம் புதிய அணையை கட்டிக் கொண்டால், நாம் எதிர்ப்பதற்கு எந்த முகாந்திரமும் இல்லை. ஆனால், இப்போது கேரளம் ஒரு வஞ்சகத் திட்டத்துடன் புதிய அணை கட்ட வேண்டும் என்கிறது. முல்லைப் பெரியாறு அணையை உடைக்கும் திட்டம் தான் அது.

இந்திய கம்யூ., மாநிலச் செயலர் பாண்டியன் பேட்டி: தமிழக மீனவர்களை இலங்கை கடற்படை கைது செய்யும் போதெல்லாம் குறைந்தது 10 நாட்கள் கழித்து தான் அவர்களை மீட்கும் நடவடிக்கை மேற்கொள்ளப்படுகிறது. இந்த இடைவெளியில் அவர்கள் இலங்கை சிறையில் அதிக துன்பங்களை அனுபவிக்கின்றனர்.

பா.ஜ., மூத்த தலைவர் முரளி மனோகர் ஜோஷி பேட்டி: வந்தே மாதரம் பாடலுக்கு எதிராக ஒரு முஸ்லிம் அமைப்பு நிறைவேற்றிய தீர்மானத்தை ஏற்க முடியாது. சுதந்திரப் போராட்டத்தின் போது, இப்பாடல் உத்வேகத்தை கொடுத்தது. நாட்டுப் பற்றுடைய ஒவ்வொருவரும் பாட வேண்டிய பாடல் இது.

கர்நாடக முதல்வர் எடியூரப்பா பேட்டி: பிரச்னைக்கு தீர்வு காண புதிய திட்டத்தை பா.ஜ., மேலிடம் உருவாக்கியுள்ளது. குழப்பத்துக்கு சட்டசபை தலைவர் ஜெகதீஷ் ஷெட்டார் தான் காரணம். அமைச்சர் பதவிக்காக அவர் இதுபோன்ற குழப்பம் செய்யத் தேவையில்லை.

மறுமலர்ச்சி முஸ்லிம் லீக் நிறுவனத் தலைவர் உமர் பாரூக் அறிக்கை: படைத்தவனை மட்டும் வணங்கி வரும் நாங்கள், எவருக்காகவும், எதற்காகவும் படைப்புகளை வணங்க மாட்டோம். பா.ஜ.,வை பொறுத்தவரை முஸ்லிம்களின் உணர்வுடன் விளையாடி, அதன்மூலம் ஆதாயம் தேடிய காலம் எல்லாம் மலையேறி விட்டது. இனி, அது தன்னை காத்துக் கொள்ள எங்களை சீண்டுவதை ஏற்க முடியாது.

மத்திய வெளியுறவுத் துறை அமைச்சர் கிருஷ்ணா பேச்சு: பாகிஸ்தான் உள் விவகாரங்களில் இந்தியா ஒருபோதும் தலையிட்டது கிடையாது. பலூசிஸ்தான் மட்டுமல்ல, பாகிஸ்தானின் பிற பகுதிகளில் ஏற்படும் நிகழ்வுகளுக்கு அந்நாடே காரணம். அங்கு அரசு ஸ்திரமாக செயல்படவில்லை என்றே தோன்றுகிறது.

தமிழ்நாடு விவசாயிகள் சங்கம் அறிக்கை: மரபணு மாற்று கத்தரிக்காயை சுப்ரீம் கோர்ட் வல்லுனர் குழுவின் கவனத்திற்கு கொண்டு வராமலே அனுமதி வழங்கியது தவறு. பி.டி.பருத்தியை அனுமதித்ததால், ஏற்பட்ட கசப்பான அனுபவத்தை மறந்து விடக்கூடாது. மத்திய அரசின் சட்டத்தை தமிழக அரசு முழுமையாக பின்பற்றவில்லை.