தன்பாத் : "ஜார்க்கண்டில் நக்சலைட்கள் பிரச்னை, மிக முக்கிய பிரச்னையாக உள்ளது' என, காங்., தலைவர் சோனியா கூறினார்.

ஜார்க்கண்டில் சட்டசபை தேர்தலில் போட்டியிடும் காங்கிரஸ் வேட்பாளர் களை ஆதரித்து, நேற்று காங்., தலைவர் சோனியா பிரசாரம் செய்தார்.

தன்பாத்தில் நடந்த பிரசாரக் கூட்டத்தில் அவர் பேசியதாவது:ஜார்க்கண்டில் ஏராளமான பிரச்னைகள் உள்ளன. இருந்தாலும், நக்சலைட்கள் பிரச்னை தான் மிகப் பெரிய பிரச்னையாக உள்ளது. வன்முறையை எந்த வகையிலும் ஏற்றுக்கொள்ள முடியாது. அனைத்து பிரச்னைகளுக்கும் பேச்சு வார்த்தை மூலம் தீர்வு காண முடியும். ஜனநாயகத்தில் வன்முறைக்கு இடமில்லை. ஜார்க்கண்டில் நிலையான ஆட்சி அமைய வேண்டுமெனில், காங் கிரஸ் கூட்டணிக்கு மக்கள் ஓட்டளிக்க வேண்டும். ஜார்க்கண்ட் மாநிலத்துக்கு தொலைநோக்கு பார்வையுள்ள தலைவர்கள் தேவைப்படுகின்றனர். இவ்வாறு சோனியா பேசினார்.

இதற்கிடையே, ஜார்க்கண்டில் நடந்த ரயில் தண்டவாளம் தகர்ப்பு தொடர்பாக, மத்திய உள்துறைச் செயலர் ஜி.கே.பிள்ளை கூறியதாவது:மாவோயிஸ்ட்களுக்கும், பயங்கரவாதிகளுக்கும் வேறுபாடு எதுவும் இல்லை என்பது, ரயில் தண்டவாளம் தகர்ப்பு சம்பவம் மூலம் தெரிய வந்துள்ளது. ரயில் தண்டவாளம், மொபைல் போன் கோபுரம் போன்றவற்றை குறி வைத்து மாவோயிஸ்ட்கள் தாக்குதல் நடத்துகின்றனர். அவர்களிடம் இரக்கம் காட்டக்கூடாது. ரயில் தண்டவாளம் தகர்ப்பு சம்பவம் கோழைத்தனமானது. இவ்வாறு பிள்ளை கூறினார்.