டீ கடை பெஞ்ச்

பதிவு செய்த நாள் : மே 26, 2018
Advertisement
   டீ கடை பெஞ்ச்

கட்சி நிர்வாகியை அடிக்க பாய்ந்த அமைச்சர்!''ராத்திரி, 7:00 மணியானா, விளையாட்டு அரங்கத்தை பூட்டச் சொல்லிடறாங்க பா...'' என, டீக்கடைக்கு வந்தவாறே, விஷயத்தை ஆரம்பித்தார் அன்வர்பாய்.''எந்த ஊருலங்க...'' எனக் கேட்டார் அந்தோணிசாமி.''பெரம்பலுார் கலெக்டர் அலுவலக வளாகத்துல, விளையாட்டு அரங்கம் இருக்கு... 'ராத்திரியில இங்க, சமூக விரோத செயல்கள் நடக்குது'ன்னு காரணம் சொல்லி, 7:00 மணிக்கே அரங்கத்தை பூட்டும்படி, கலெக்டர் சாந்தா உத்தரவு போட்டிருக்காங்க பா...''ஆனா, நிஜ காரணம் வேற... சமீபத்துல, ராத்திரி நேரம், நாயை கூட்டிட்டு, விளையாட்டு அரங்கத்துல, கலெக்டர், 'வாக்கிங்' போயிருக்காங்க பா... அப்ப, பைக்ல வந்த ஒருத்தர், ஹாரனை தொடர்ந்து அடிச்சிருக்கார்... இதுல, கலெக்டரின் நாய் மிரண்டு ஓடிடுச்சு பா...''அதை பிடிக்கிறதுக்குள்ள, போதும் போதும்ன்னு ஆயிடுச்சு... அந்த கடுப்புல தான், விளையாட்டு அரங்கத்தை, 7:00 மணிக்கு மேல பூட்டும்படி கலெக்டர் சொல்லிட்டாங்க பா...'' என்றார் அன்வர்பாய்.''தேடி போய் சர்வீஸ் பண்ணிட்டு, அதுக்கு சார்ஜும் வாங்கிடுதாங்க வே...'' என்றார் அண்ணாச்சி.''யாரை சொல்றீர் ஓய்...'' எனக் கேட்டார் குப்பண்ணா.''திருச்சி மேற்கு வட்டார போக்குவரத்து அலுவலக பெண் அதிகாரி ஒருத்தரை தான் சொல்லுதேன்... இவங்க, வாகனங்கள் விற்குற நிறுவனங்களுக்கு நேர்ல போய், அங்கனயே வாகனங்களை பதிவு செஞ்சு குடுத்துடுதாங்க வே...''இவங்க கார்ல, எப்பவுமே, கார், பைக் விற்பனை நிறுவன ஊழியர்கள், பாதுகாவலர்கள் போல வலம் வர்றாவ... இப்படி தேடி போய் சர்வீஸ் பண்றதுக்கு, நிறுவனங்களிடம், மாசத்துக்கு இவ்வளவுன்னு சில லட்சங்களை, 'கறந்து' குவிச்சிடுதாங்க வே...'' என்றார் அண்ணாச்சி.''என் தங்கச்சி அனிதா, ஊருக்கு போறா... ரயில் ஏத்தி விட போவணும்... கிளம்புதேன்...'' என்றபடி அண்ணாச்சி விடை பெற, ''வாரிசுக்கு வேலை கேட்டு போன, அ.தி.மு.க., நிர்வாகியை அடிக்க பாய்ஞ்சுட்டார் ஓய்...'' என, கடைசி விஷயத்திற்கு வந்தார் குப்பண்ணா.''யாருங்க அது...'' என்றார் அந்தோணிசாமி.''வேலுார் மாவட்ட, அ.தி.மு.க., வழக்கறிஞர் பிரிவு இணை செயலர் ஜெகன்நாதன்... இவர், தன் மகனுக்கு, ஊராட்சி செயலர் வேலை கேட்டு, ஒன்றிய செயலரிடம் பரிந்துரை கடிதம் வாங்கி, அமைச்சரிடம் குடுத்திருக்கார் ஓய்...''அந்த வேலையை, தி.மு.க., குடும்பத்தை சேர்ந்த ஒருத்தருக்கு குடுத்துட்டா... கடுப்பான ஜெகன், அமைச்சர் வீட்டுக்கு போய், சத்தம் போட்டு பேசியிருக்கார் ஓய்...''இதைக் கேட்டு, வீட்டுக்குள்ள இருந்து, ஆவேசமா வெளியே வந்த அமைச்சர், ஜெகனை அடிக்க பாய்ஞ்சுட்டார்... அப்பறமா, பாதுகாப்பு அதிகாரியை விட்டு, ஜெகனை வெளியேத்திட்டார் ஓய்...''கட்சிக்கு, 29 வருஷம் நாயா உழைச்ச எனக்கு கிடைச்ச பரிசு இதுதான்னு புலம்பிட்டே போன ஜெகன்நாதன், முதல்வர், துணை முதல்வருக்கு புகார் அனுப்பியிருக்கார் ஓய்...'' என முடித்த குப்பண்ணா, தெருவில் சென்ற பைக்கை, கை காட்டி நிறுத்தினார்.''வீரமணி... கொஞ்சம் என்னை வீட்டுல, 'டிராப்' பண்ணிடறேளா...'' என, லிப்ட் கேட்டு குப்பண்ணா கிளம்ப, மற்றவர்களும் நடையை கட்டினர்.

Advertisement

இதையும் தவறாமல் படிங்க ...



Advertisement

வாசகர் கருத்து

முதல் நபராக கருத்து தெரிவியுங்கள்!

உங்கள் கருத்தைப் பதிவு செய்ய

(Press Ctrl+g or click this   to toggle between English and Tamil)
Login :
New to Dinamalar ?
கருத்து விதிமுறை