- வைரம் ராஜகோபால்

ஞானானந்தம்
ஒருவனுடைய நன்னடத்தை, நல்ல சுபாவம் இவைகளைக் கொண்டே அவன் நல்ல குலத்திலும், குடும்பத்திலும் பிறந்தவன் என்பதை அறிந்து கொள்ளலாம். எந்த ஒரு மனிதனும் தான் பிறந்த குலத்திற்கு தகுந்த குணங்களையே கொண்டிருப்பான்; "அவரை போட்டால், துவரை முளைக்குமா?' என்பர்.
ஒரு குருட்டுப் பிச்சைக்காரனை ராஜாவின் முன் கொண்டு வந்து நிறுத்தினர் சேவகர்கள். பிச்சை எடுப்பது குற்றம் என்பது அங்கே சட்டம். அவனை விசாரித்த ராஜா, "உனக்கு என்ன தெரியும்?' என்று கேட்டான். "எனக்கு மாணிக்க கல்லை பரிசோதிக்கத் தெரியும்; குதிரைகளை பரிசோதித்து, நல்ல ஜாதிக் குதிரைதானா என்று சொல்ல முடியும்; மனிதர்களின் தன்மையை அறிந்து, அவர்கள் நல்ல குலத்தைச் சேர்ந்தவர்களா என்பதையும் சொல்ல முடியும்!' என்றான் பிச்சைக்காரன்.
"சரி! இவனுக்கு தினமும் ஒரு பட்டை சோறு கொடுத்து, சிறையில் வையுங்கள்!' என்று உத்தரவிட்டான் ராஜா.
ஒருநாள், மாணிக்கக் கல் கொண்டு வந்தான் ரத்தின வியாபாரி ஒருவன். அந்தக் குருடனை விட்டு அதை பரிசோதிக்கச் சொன்னான் ராஜா. தன் காதுகளில் கல்லை வைத்துப் பார்த்துவிட்டு, "இது, மாணிக்கக் கல் அல்ல; இது, ஒரு பூச்சிக் கூடு!' என்றான் குருடன். வியாபாரி போன பின், "இதை எப்படி கண்டுபிடித்தாய்?' என்று கேட்டான் ராஜா. "மாணிக்கக் கல்லானால், காதில் வைத்தால் ஓசை எதுவும் வராது; பூச்சிக் கூடானதால் காதில் வைத்ததும், "ஙொய்' என்ற சப்தம் வந்தது. அதனால், கண்டுபிடித்தேன்...' என்றான் குருடன். "சபாஷ்! இவனுக்கு தினம் இரண்டு பட்டை சோறு கொடு...' என்று உத்தரவிட்டான் ராஜா.
மற்றொரு நாள், ஒரு அழகிய குதிரையைக் கொண்டு வந்தான் ஒரு குதிரை வியாபாரி. குருடனை விட்டு பரிசோதிக்கச் சொன்னான் ராஜா. குதிரையின் முதுகில் கை வைத்த குருடன், "இது அசல் ஜாதிக் குதிரை அல்ல...' என்றான். "இதை எப்படி கண்டுபிடித்தாய்?' என்று கேட்டான் ராஜா. "ஜாதிக் குதிரையானால், முதுகில் கை வைத்ததும் உடலை சிலிர்க்கும். இது சொரணையே இல்லாமலிருந்தது; அதனால் கண்டுபிடித்தேன்!' என்றான். "சபாஷ்! இவனுக்கு தினம் மூன்று பட்டை சோறு கொடுங்கள்!' என்றான் ராஜா.
பிறகு, ஒருநாள் குருடனிடம், தான் எப்படிப்பட்டவன் என்பதைச் சொல்லும்படி கேட்டான் ராஜா. "மகாராஜா, நான் சொல்வேன்; ஆனால், என் மீது கோபப் படக்கூடாது...' என்றான் குருடன், ராஜாவும் சரி என்றான். "மகாராஜா, நீங்கள் ஒரு சமையல்காரனுக்குப் பிறந்தவர்; ராஜாவுக்குப் பிறக்கவில்லை. கோபிக்கக் கூடாது!' என்றான் பயந்து கொண்டே. நேராக, தன் தாயிடம் போய் விசாரித்தான் ராஜா. அரண்மனை சமையல்காரனுக்கு இவன் பிறந்ததாக தெரிந்து கொண்டான்.
குருடனிடம் வந்து, "உண்மைதான்! நீ இதை எப்படி தெரிந்து கொண்டாய்?' என்று கேட்டான் ராஜா. குருடன், "ஓ அதுவா! ராஜாவுக்குப் பிறந்து, ராஜ வம்சத்தில் வந்தவன், பிறரைப் புகழ்ந்து பரிசளிப்பதானால், பொன்னைக் கொடு, பொருளைக் கொடு என்பான்; நீங்கள், எப்போது பார்த்தாலும் ஒரு பட்டை சோறு, இரண்டு பட்டை சோறு, மூன்று பட்டை சோறு என்று பட்டை சோறாகவே பரிசளித்தீர்கள். சமையல்காரனுக்கு தான் பட்டை சோறு ஞாபகம் வரும்; அதனால், நீங்கள் சமையல்காரன் மகனாக இருக்க வேண்டும் என்று யூகித்தேன்!' என்றான். ராஜாவுக்கு என்ன செய்வதென்று தெரியவில்லை. குருடனுக்கு வெளியூரில் வசதியாக வாழ, வழிசெய்து அனுப்பி வைத்தான்.
குலத்தையும், குடும்பத்தையும் பொறுத்து தான் பிள்ளைகளும் இருப்பர் என்பதைச் சொல்ல இப்படி ஒரு கதை உண்டு; ஒரு சில விதி விலக்கும் இருக்கலாம். அனுபவத்தில் காண வேண்டியவை இவை! பக்தியும், ஆசாரமும் உள்ள குடும்பத்தில் அதற்கேற்றபடி பிள்ளை!
* * *
ஆன்மிக வினா-விடை!
இரண்டு கண் தேங்காயை பூஜையில் வைத்து பூஜித்து வந்தால், நல்லது என்று ஒருவர் சொன்னார். என்னிடம் குடுமி இல்லாத, இரண்டு கண் தேங்காய்கள் உள்ளன; அதை பூஜிக்கலாமா?
மூன்று கண் கூடிய தேங்காயைத் தான் சுபகாரியங்களுக்கும், அர்ச் சனைக்கும், பூஜைக்கும் உபயோ கிக்க வேண்டும்.