Dinamalar

விவரமான ஆசிரியர்!

பிளஸ் 1 படிக்கும் மாணவன் நான். பஸ்சில் கண்டெடுத்த, "பலான' புத்தகத்தோடு வகுப்பிற்கு வந்தான் என் நண்பன் ஒருவன். இதை அறிந்த சக மாணவர்களின் கவனம் சிதறியது. இதை எப்படியோ தெரிந்து கொண்ட ஆசிரியர், நண்பனை புத்தகமும், கையுமாக பிடித்து விட்டார். மாட்டிக் கொண்டோமே என்ற பயத்தில், அனைவருக்கும் வியர்த்து விட்டது. ஆனால், ஆசிரியரோ, சிறிதும் புன்னகை மாறாமல், அதே சமயம், கண்டிப்பான குரலில், "செக்ஸ் என்பது வாழ்க்கையில் இன்றியமையாத ஒன்று. இதை பற்றி சரியாக தெரிந்து கொள்ளாததால்தான் குழப்பங்களும், வியாதியும் வருகிறது. இது போன்ற புத்தகங்கள், பால் உணர்வை தூண்டுவதேயன்றி, போதுமான அறிவை புகட்டுவதில்லை...' என்று ஆரம்பித்து, அறிவியல் பூர்வமான பல நன்மை, தீமைகளை விளக்கினார். பிரமிப்போடு கேட்டுக் கொண்டிருந்தோம்.
பிறகு ஆசிரியரின் ஆலோசனைப்படி, "எய்ட்ஸ் அவேர்னஸ்' என்ற தலைப்பில் பேசுவதற்கு, ஒரு டாக்டரை வரவழைத்தார் தலைமை ஆசிரியர். மனதில் உள்ள சந்தேகத்தை எல்லாம் தீர்த்துக் கொண்டோம். எங்கள் ஆசிரியரைப் போல மற்ற ஆசிரியர்களும் நடந்து கொண்டால், மாணவர்கள் தவறான பாதையில் செல்ல மாட்டார்கள்.
— எல்.கார்த்திக் ராஜா, சென்னை.

மாற்றி யோசிக்கலாமே!

எங்கள் தெருவிலுள்ள ஒரு மூதாட்டி, இட்டிலி மாவு வியாபாரத்தை சிறப்பாக நடத்தி வந்தார். தினமும், கிலோ கணக்கில், கிரைண்டரில் அரைத்து, ஏரியா மக்கள் அனைவரும் வாங்கிச் செல்லுமளவுக்கு, மாவு விற்பனையில் கோலோச்சி வந்தாள். சமீபகாலமாக ஏற்பட்ட மின்வெட்டால், அந்த தொழிலில் அவருக்கு தொய்வு ஏற்பட்டது.
மின்சாரம் கிடைக்கும் சிறிது நேரத்திற்குள்ளாக, மாவு அரைக்க இயலாமல் திண்டாடினார், மாவு கேட்டு வரும் வாடிக்கையாளர்களுக்கு மாவு இல்லை எனச் சொல்லி வந்ததோடு, போதிய வருமானமின்றி கஷ்டப்பட்டவரின் மனதில், ஒரு புது வியாபாரத் திட்டம் உதயமானது.
மாவுக்கடை என்ற விளம்பரப் பலகையை எடுத்து, "கிழங்குக்கடை' என்ற போர்டு மாட்டினார். மரவள்ளி மற்றும் சர்க்கரை வள்ளிக்கிழங்குகளை அவித்தும், உதிரியாக்கியும், தாளித்தும் அதன் மேல் தேங்காய் தூவி, சுவையுடன் மக்களுக்கு வினியோகித்தார். அந்த வியாபாரம், இப்போது அமோகமாகவே நடக்க துவங்கி விட்டது. மாவு வியாபாரத்தில் வந்த லாபத்தை விட, கூடுதலாக வர, மூதாட்டி சந்தோஷமடைந்து விட்டார்.
என்ன செய்யறது...மின்சார உற்பத்தி குறைவானதால அரசால், 24 மணி நேரமும் மக்களுக்கு மின்சாரம் தர முடியவில்லை. அதுக்காக அரசையே குறை சொல்லிட்டிருக்க முடியுமா? நம்மளை மாதிரி ஆட்கள், பஞ்சம் பொழைக்கறதுக்கு மாற்று வழியை கையாளத் துவங்கினா, எப்படியும் பொழைக்கலாம். "ஆண்டவன் ஒரு கதவை மூடினா... இன்னொரு கதவை திறந்து வைக்காமலா போவான்...' என்ற, அவளது நம்பிக்கை மிகுந்த வார்த்தைகள், மின்சாரத்திற்காக காத்திருந்து கால விரையம் செய்யும் மற்றவர்களுக்கு, ஒரு தூண்டுகோலாய் அமையும் என்பதில் ஐயமில்லை.
— ஜக்கி, வேலாண்டிபாளையம்.

அக்குள் அருவருப்பு!

பிசியோதெரபி படிக்கும் நான், கல்லூரியின் பெண்கள் விடுதியில் தங்கியிருக்கிறேன். எங்கள் அறையில், என்னையும் சேர்த்து நான்கு பெண்கள். எங்களில் ஒருத்தி, ஒல்லியாக, உயரமாக, கவர்ச்சியாக இருப்பாள். அவளின் பேரழகு மீது, எங்களுக்கு பொறாமை உண்டு. அவள் குளித்துவிட்டு வந்து, உடை மாற்றினாள். அப்போது, அவளது இரு அக்குள் பகுதியை பார்த்து அருவருப்படைந்தேன். காரணம், அவளது இரு அக்குள்களும் கறுப்படிந்திருந்தன. அக்குள் கறுப்பு விரிவடைந்து, அக்குளுக்கு வெளியே விகாரம் காட்டியது.
எதனால் என வினவியபோது தான் தெரிந்தது, கடந்த ஐந்து ஆண்டுகளாக, டியோடரன்ட்களை பயன்படுத்தி இருக்கிறாள் என்றும். அதனால், ஸ்கின் அலர்ஜி ஆகியிருக்கிறது என்றும். டியோடரன்ட்களை நிறுத்த சொல்லி, தினம் குளிக்கும் போது அக்குள், முன்னங்கழுத்து, பின்னங்கழுத்து முகம் போன்ற பகுதிகளை பாசிபருப்பு மாவு தடவி, தேய்த்து, குளிக்கச் சொன்னேன். இப்போது, அவளின் அக்குள் கறுப்பு வெகுவாய் குறைந்திருக்கிறது.
சகோதரிகளே... டியோடரன்ட்களை தவிருங்கள். உபயோகிக்கும் கட்டாயம் என்றால், 45 செ.மீ., தூரத்தில் வைத்து, ஸ்ப்ரே செய்யுங்கள்.
— டபிள்யூ.ஆர்.ஸ்வர்ணலதா, மாயவரம்.