சென்னை :தமிழகம் முழுவதும் வடகிழக்கு பருவமழை தீவிரமடைந்துள்ளது. தென்மேற்கு வங்கக் கடலில் உருவான குறைந்த காற்றழுத்த தாழ்வு நிலை தொடர்ந்து நீடிப்பதால், கடலோர மாவட்டங்களில் புயல் அபாயம் ஏற்பட்டுள்ளது. சூறைக் காற்றுடன் பலத்த மழை பெய்யும் என்று வானிலை ஆய்வு மையம் எச்சரித்துள்ளது.

தமிழகத்தில் பெய்துவரும் வடகிழக்கு பருவமழை, கடந்த சில தினங்களாக வலுவடைந்துள்ளது. சென்னை முதல் குமரி வரை பகல், இரவு என்றில்லாமல் மழை வெளுத்து வாங்குகிறது. இதனால், மாநிலம் முழுவதும் உள்ள ஏரி, குளம், அணைகள் உள்ளிட்ட அனைத்து நீர்நிலைகளும் மள, மளவென நிரம்பி வருகின்றன.தொடர்ச்சியாக கனமழை பெய்து வருவதால், காவிரி டெல்டா மாவட்டங்களில் விவசாய நிலங்களில் பெரும் சேதம் ஏற்பட்டுள்ளது. 60 ஆயிரம் எக்டேர் பரப்பிலான பயிர்கள், வெள்ளத்தில் மூழ்கியுள்ளன. கால்நடைகள் உயிரிழப்பும் அதிகரித்துள்ளது. இதற்கிடையே, மழை காரணமாக உயிரிழந்தோரின் எண்ணிக்கை 13 ஆக அதிகரித்துள்ளது.நாகையில் கொட்டித் தீர்க்கும் அடைமழையால், சம்பா பயிர்கள் நீரில் மூழ்கின. மக்களின் இயல்பு வாழ்க்கையும் பாதித்துள்ளது. மயிலாடுதுறையில் பெய்துவரும் கனமழையால், கிளை சிறைச்சாலையின் மதில்சுவர் நேற்று மாலை இடிந்து விழுந்தது.

மழையினால் ஏற்படக் கூடிய பாதிப்புகளை கண்டறிந்து, உரிய நடவடிக்கை எடுக்குமாறு அதிகாரிகளுக்கு, தமிழக அரசு உத்தரவிட்டுள்ளது. சென்னை நகரில் இடைவிடாமல் தொடர்ச்சியாக மழை பெய்து வருவதால், நகரின் தாழ்வான பகுதிகள் வெள்ளத்தில் சிக்கி தத்தளித்து வருகின்றன.பாதிக்கப்பட்ட மக்களுக்கு, சென்னை மாநகராட்சி நேற்று உணவுப் பொட்டலங்களை வழங்கியது. துணை முதல்வர் ஸ்டாலின், நகரின் பல்வேறு பகுதிகளுக்கு நேரில் சென்று மழை பாதிப்புகளை பார்வையிட்டார்.

இதற்கிடையே, மாநிலம் முழுவதும் பருவமழை மேலும் தீவிரமடைந்துள்ளது. தென்மேற்கு வங்கக்கடல் பகுதியில் உருவான குறைந்த காற்றழுத்த தாழ்வுநிலை தொடர்ந்து நீடிப்பதால், கடலோர மாவட்டங்களில் புயல் அபாயம் ஏற்பட்டுள்ளது. தமிழகம் மற்றும் புதுச்சேரியில் பலத்த காற்றுடன், கனமழை பெய்யும் என்று சென்னை வானிலை மையம் எச்சரித்துள்ளது.

இது குறித்து, சென்னை வானிலை ஆய்வு மைய இயக்குனர் ரமணன் கூறியதாவது: தென்மேற்கு வங்கக்கடலில் உருவான காற்றழுத்த தாழ்வுநிலை, தெற்கு ஆந்திர கடலோர மாவட்டங்கள், தமிழக கடலோர மாவட்டங்கள் மற்றும் மன்னார் வளைகுடா வரை நிலைகொண்டுள்ளது. இதனால், அடுத்த இரண்டு நாட்களுக்கு தமிழக கடலோர மாவட்டங்கள் உட்பட அனைத்து மாவட்டங்கள் மற்றும் புதுச்சேரியில் பலத்த மழை பெய்யக் கூடும்.தமிழகம், புதுச்சேரியில் ஆழ்கடல் பகுதியில், வடகிழக்கில் இருந்து கிழக்கு திசையை நோக்கி மணிக்கு 45 முதல் 55 கி.மீ., வேகத்தில் பலத்த காற்று வீசலாம் என்பதால், மீனவர்களுக்கு எச்சரிக்கை விடுக்கப்பட்டுள்ளது.இவ்வாறு ரமணன் கூறினார்.

நேற்று காலை 8.30 மணி நிலவரப்படி, அதிகபட்சமாக செங்குன்றம், சென்னை விமான நிலையம், மதுராந்தகம், சோழவரம் ஆகிய இடங்களில் 14 செ.மீ., மழை பதிவாகியுள்ளது. சென்னை நகரில் நேற்று மாலை 5.30 மணி நிலவரப்படி, 14 செ.மீ., மழை பெய்துள்ளது. பொன்னேரி, கடலூரில் 13 செ.மீ., சென்னை, பாபநாசம், மணிமுத்தாறில் 10, செய்யாறு, ஸ்ரீ பெரும்புதூர், கொரட்டூர், திருவள்ளூர், சீர்காழி, கொள்ளிடம், அம்பாசமுத்திரம் ஆகிய இடங்களில் 9, காஞ்சிபுரம், தாம்பரம், சிதம்பரம், பூண்டி, தாமரைப்பாக்கம் ஆகிய இடங்களில் 7, மயிலாடுதுறை, நாகை, வேதாரண்யம், செங்கோட்டை ஆகிய இடங்களில் 4 செ.மீ., மழை பதிவாகியுள்ளது.ராமநாதபுரம், தொண்டி, ஆயக்குடி, நாங்குனேரி, தென்காசி, சாத்தான்குளம், திருச்செந்தூர், கன்னியாகுமரி ஆகிய இடங்களில் தலா 3 செ.மீ., மழை பெய்துள்ளது.