கூடலூர் : பெரியாறு அணையில் நீர்க்கசிவு அதிகம் இருப்பதாகக்கூறி நீர்மட்டத்தை 130 அடியாக நிலை நிறுத்த வேண்டும், என அணையில் திடீர் ஆய்வு மேற்கொண்ட கேரளநிபுணர் குழு புதிய பரிந்துரையை முன்வைத்துள்ளது.

பெரியாறு அணை நீர்பிடிப்பு பகுதியில் அண்மையில் பெய்த கன மழையால் அணையின் நீர்மட்டம் 135 அடியை எட்டியது. நீர்மட்டம் 130 அடியாக உயர்ந்த போது கேரள நீர்ப்பாசனத்துறை செயற்பொறியாளர் ஜார்ஜ் டேனியல் அணைப்பகுதியை பார்வையிட்டு நீர்க்கசிவு அதிகம் உள்ளதாக கேரள அரசுக்கு அறிக்கை அனுப்பியிருந்தார். கேரள முதல்வர் அச்சுதானந்தன் நேற்று கூறுகையில், ""113 ஆண்டு பழமைவாய்ந்த பெரியாறு அணையின் 18வது மதகில் நீர் கசிவு ஏற்பட்டுள்ளது கண்டறியப்பட்டுள்ளது. நீர் கசிவு குறித்து, ஆய்வு செய்வதற்காக முன்னாள் தலைமை பொறியாளர் என்.கே.பரமேஸ்வரன் நாயர் தலைமையில் மூன்று பேர் கொண்ட நிபுணர் குழு அமைக்கப் பட்டுள்ளது. நீர் கசிவு குறித்து ஆய்வு செய்து, உடனடியாக அறிக்கை அளிக்கும்படி இந்த குழுவிடம் அறிவுறுத்தப் பட்டுள்ளது,'' என்றார்.

இந்நிலையில், பரமேஸ் வரன் நாயர் தலைமையிலான கேரள நிபுணர் குழு நேற்று மாலை திடீரென அணைப்பகுதிக்கு சென்றது. படகு போக்குவரத்து நிறுத்தப்பட்டிருப்பதால் வல்லக்கடவு வழியாக ஜீப் மூலம் அணைப்பகுதிக்கு வந்தனர். மெயின் அணை, பேபி அணை, ஷட்டர்பகுதிகளை பார்வையிட்டனர். மெயின் அணையின் 130வது அடியில் 17, 18 பிளாக்குகளில் நீர்க்கசிவு அதிகம் இருப்பதாக இக்குழு தெரிவித்துள்ளது. இதனால், அணையில் தற்போது 135 அடியாக உள்ள நீர்மட்டத்தை 130 அடியாக்க வேண்டும் என கேரள அரசுக்கு பரிந்துரை செய்துள்ளது. இக்குழுவில் முன்னாள் கேரள தலைமை பொறியாளர் சசீதரன், நீர்ப்பாசன தலைமை பொறியாளர் லத்திகா, கண்காணிப்பு பொறியாளர் ராதாமணி இடம்பெற்றிருந்தனர்.

சுப்ரீம் கோர்டில் பெரியாறு அணை பிரச்னை குறித்த வழக்கு நிலுவையில் உள்ள நிலையில் கேரளாவில் இருந்து திடீரென நிபுணர் குழு, அணைக்கு ஆய்வு செய்ய சென்றது சுப்ரீம் கோர்ட்டை அவமதிக்கும் அடுத்த மீறலும் அரங்கேறியுள்ளது.பெரியாறு அணை நீர்மட்டத்தை 130 அடியாக நிலை நிறுத்த வேண்டும் என்ற நிபுணர் குழுவின் அறிக்கை தமிழக விவசாயிகளிடையே கலக்கத்தை ஏற்படுத்தியுள்ளது.

தமிழக பொதுப்பணித் துறை செயலர் ராமசுந்தரத்திடம் கேட்ட போது, ""அணையில் நீர் கசிவு ஏதும் இல்லை. அரசியல் காரணங்களுக்காக, இவ்வாறு தகவல் பரப்பப் படுகிறது,'' என்றார்.