ஜல்லிக்கட்டும்... தமிழர் வீரமும்!| Dinamalar

ஜல்லிக்கட்டும்... தமிழர் வீரமும்!

Updated : பிப் 04, 2015 | Added : பிப் 04, 2015 | கருத்துகள் (10)
Advertisement
 
 
Advertisement
 
 
 
Advertisement
Advertisement
ஜல்லிக்கட்டும்... தமிழர் வீரமும்!

ஏறத்தாழ, 6000 ஆண்டுகளுக்கு முன்பாகவே மனிதன், மாடுகளை அடக்கி, அதை வீட்டு விலங்காக மாற்றினான். சுமார், 3500 வருடங்களுக்கு முன்பாகவே, மாடுகளை, வீரர்கள் அடக்குவது போன்ற, சுவர் ஓவியங்கள் தமிழகத்தில் கிடைத்துள்ளன. முற்கால தமிழகத்தில், 'ஏறுதழுவுதல்' என்கிற பெயரில், ஜல்லிக்கட்டு நடந்துள்ளது. ஆண்கள், தங்கள் வீரத்தை பறைசாற்றும் வீர விழாவாகவே, 'ஜல்லிக்கட்டு' பார்க்கப்பட்டுள்ளது.அக்காலத்தில், காளையை அடக்கும் ஆண்களையே, பெரும்பாலான பெண்கள் தங்கள் துணைவராக தேர்ந்தெடுப்பர். 'அசுர பலம் கொண்ட காளையை அடக்கிய நான், நிச்சயம் உன்னை திருடர்களிடமிருந்தும், காட்டு விலங்குகளிடமிருந்தும் காப்பேன். என்னை திருமணம் செய்து கொள்' என, ஆண்கள் வீரம் காட்டி, பெண்களை மணம் புரிய, ஜல்லிக்கட்டு ஒரு முக்கிய நிகழ்வாக, வரலாற்றில் இருந்து வந்துள்ளது. தமிழர்களின் பாரம்பரியத்தோடும், கலாசாரத்தோடும் பின்னிப் பிணைந்தது ஜல்லிக்கட்டு.



உலகம் முழுவதும் உள்ளது:

தமிழகம் மட்டுமல்லாது, மாடுகளை வைத்து விளையாடுவது, இந்தியாவின் பல்வேறு மாநிலங்களிலும், பல்வேறு நாடுகளிலும் காணப்படுகிறது. குறிப்பாக, மகாராஷ்ட்ராவில் நடைபெறும், 'ரேக்ளா ரேஸ்' எனப்படும், மாட்டு வண்டி போட்டி பிரபலமானது. அதே போல் ஸ்பெயினில் நடைபெறும், 'புல் ஃபைட்' எனப்படும், காளையை அடக்கும் போட்டி, உலக பிரசித்தம்; ஸ்பெயினின் தேசிய விளையாட்டும்கூடதமிழக வரலாற்றில், பல்வேறு வீர விளையாட்டுக்கள் இருந்து வந்துள்ளன. புலியை கொன்று அதன் நகத்தை, கயிற்றில் கோர்த்து, மணப்பெண்ணின் கழுத்தில் கட்டியதே, பின்னாளில் 'தாலி' ஆனது, என்ற கருத்து உண்டு

இப்படிப்பட்ட பெருமை வாய்ந்த வீர விளையாட்டுக்களில் ஒன்றான ஜல்லிக்கட்டுக்கு, சென்ற வருடம் உச்ச நீதிமன்றம் தடை விதித்துள்ளது. இன்று வரை தடை தொடர்கிறது




தடைக்கு காரணம்:


இதற்கு முக்கிய காரணம், 2011இல் மத்திய அரசு, 'காட்சிப்படுத்த தடை' விதிக்கும் அரசாணையில், சிங்கம், புலி, கரடி, குரங்கு உள்ளிட்ட விலங்குகளோடு, காளையையும் சேர்த்து உத்தரவிட்டதுதான்.
விலங்குகள் வதை தடுப்பு சட்டப்படி, 'காட்சிப்படுத்த தடை' விதிக்கப்பட விலங்குகளை, எக்காரணம் கொண்டும், யாரும் காட்சிப்பொருளாகவோ, வித்தை காட்டும் விலங்காகவோ, சண்டையிட வைத்தோ, மக்களிடம் காட்டக் கூடாது.

ஏனெனில் வேடிக்கை காட்டி, பணம் பறிக்கும் நோக்குடன், அவ்விலங்குகளுக்கு உணவளிக்காமல், சரியான மருத்துவம் அளிக்காமல், வதைப்படுத்துவதை தடுப்பதே, இச்சட்டத்தின் நோக்கம். இதனால் தான், சர்க்கஸ்களில் விலங்குகளை ஈடுபடுத்த, தடை உள்ளது.


எதிர் வாதம்:

ஜல்லிக்கட்டுக்கு எதிரான நிலை கொண்டவர்களின் வாதம் இரண்டு :



1) காளைகள் வதைக்கப்படுகின்றன



2) மாடுபிடி வீரர்களுக்கு உடல் மற்றும் உயிர் சேதம் ஏற்படுகிறது.



பொதுவாக மனிதர்கள் நினைப்பது என்னவெனில், இவ்வுலகம் மனிதர்களுக்கு மட்டுமே சொந்தமானது; பிற உயிரினங்கள் எல்லாம் மனிதர்களுக்கு அடிமை. மனிதர்களின் மகிழ்ச்சிக்காக விலங்குகளை என்ன வேண்டுமானாலும் செய்யலாம், என்ற நினைப்பு உள்ளது. உண்மை என்னவெனில், 80 லட்சம் உயிரினங்களில் ஒன்று தான் மனித இனம். மனிதர்கள் வாழ எவ்வளவு உரிமை உள்ளதோ, அதே அளவு உரிமை விலங்குகளுக்கும் உள்ளது, என்பது விலங்கின ஆர்வலர்களின் வாதம்.



'ஆயிரக்கணக்கான, மனிதர்களின் நடுவில், ஒரு மாட்டை ஓட விட்டு, 10 அல்லது 20 பேர் சேர்ந்து, அதை அடக்க முயல்வது, மனித தன்மையே இல்லை' என்பது அவர்களின் வாதம்.



மனிதர்கள் காட்டு வாசியாக இருந்த காலம் வரை, விலங்குகளுடன் சண்டையிட்டு, தங்களது வீரத்தைக் காட்டினர். 21ஆம் நூற்றாண்டிலும், விலங்குகளுடன் நமக்கு சண்டை தேவையா. அவைகளை தொல்லை செய்யாமல், நிம்மதியாக வாழ விட வேண்டும். எந்த விலங்கையும், துன்புறுத்தும் உரிமை, நமக்கு கிடையாது. தற்போது தொலைக்காட்சி, திரைப்படம் போன்ற பல பொழுது போக்கு அம்சங்கள் உள்ளன.



எனவே ஜல்லிக்கட்டை பொழுதுபோக்கு, என்று சொல்வதை ஏற்றுகொள்ள முடியாது. பல ஆண்டுகளுக்கு முன், காளைகளுக்கு, சாராயத்தை வாயில் திணித்து, மைதானத்திற்கு அனுப்புவர். வீரர்கள் மாடுகளின் வாலை முறுக்கி உடைத்து, ரத்தம் வழிய, வழிய கொம்பை உடைத்து, கண்களில் மண்ணை தூவி அதனை அடக்குவர். வீரர்களில் குடல் சரிந்து, வயிறு கிழிந்து, இறந்தவர்கள் பலர்; கால், கைகளை இழந்தவர் பலர்.



பலர் ஆடு மாடுகளின் இறைச்சியை உண்கின்றனர். அதுவும் விலங்குகளுக்கு எதிரானது தான் என்றாலும், ஒரு நிமிடத்தில் அவற்றின் உயிர் பிரிந்து விடும். ஆனால் ஒன்றின் வாலையோ, கொம்பையோ, காலையோ உடைத்து சித்ரவதை செய்தால், அது வாழ்நாள் முழுவதும் ஊனமுற்ற மாடாகி, எதற்கும் பயனற்றதாகி விடும். ஒரு விளையாட்டினால் மனிதனுக்கோ, விலங்குகளுக்கோ பாதிப்பு ஏற்படுமாயின், அதில் நீதிமன்றம் தலையிடலாம், என்பது இவர்களின் வாதம்.







ஆதரவு வாதம்:


ஜல்லிக்கட்டிற்கு ஆதரவானவர்களின் வாதம் :



ஜல்லிக்கட்டு என்பது, தமிழர் கலாசாரத்தின் முக்கிய அம்சம். ஒவ்வொரு இன மக்களுக்கும், ஒரு வீர கலாசாரம் இருப்பது போல், தமிழர்களுக்கு ஜல்லிக்கட்டு இருக்கிறது. அலங்காநல்லூர், பாலமேடு போன்ற பல ஊர்களில் இதற்காகவே, நாட்டுக் காளைகளை வளர்க்கின்றனர். ஜல்லிக்கட்டை நிறுத்தினால், பல்லாயிரம் பேரின், வேலைவாய்ப்பு பறி போகும்; நாட்டு மாடுகளின் இனமும் அழிந்து போகும்.



சென்ற வருடம், உச்ச நீதிமன்றத்தின் வழிகாட்டுதல் படி, மாடுகளுக்கும் மனிதர்களுக்கும் எவ்வித துன்புறுத்தல் இல்லாமல், ஜல்லிக்கட்டை நடத்தியதைப் போன்று, இந்த வருடமும் பாதுகாப்பாக நடத்தத் தயாராக இருக்கிறோம்.



ஒரு மாநில மக்களின், பாரம்பரிய உரிமையில் தலையிட யாருக்கும் உரிமை இல்லை. இது லட்சக்கணக்கான மக்களின் விருப்பம்; பண்டிகை கொண்டாடும் முறை; வாழ்க்கை முறையின் ஒரு அங்கம். மத்திய அரசு உடனடியாக 'காட்சிபடுத்தும் விலங்குகள்' பட்டியலிலிருந்து காளையை நீக்க வேண்டும்.







யானைக்கே இல்லாத கட்டுப்பாடு:


மேலும், ஜல்லிக்கட்டு காளையை உழவுக்கு பயன்படுத்துவது இல்லை. கன்றில் இருந்தே சிறப்பாக வளர்க்கப்பட்டு, கோவில் மாடாக வழிபட்டு, ஜல்லிக்கட்டுக்கு மட்டும், பயன்படுத்த வளர்க்கப்படுகிறது. நடுவண் அரசு விதித்துள்ள கட்டுப்பாடு, யானைக்குக் கூட இல்லை. கேரளத்தில் யானையை வைத்து, பல்வேறு போட்டிகள் நடத்தப்படுகின்றன என்றும், அவர்கள் சுட்டிக்காட்டுகின்றனர்



எத்தனையோ பாரம்பரிய விளையாட்டுக்கள் அழிந்து போய் இருக்கின்றன. எஞ்சி இருக்கும் சில விளையாட்டுக்களையாவது, காப்பது நம் கடமை.



பாமர மக்களுக்கு, மகிழ்ச்சியை அளிக்கும் விளையாட்டு இது. எனவே ஜல்லிக்கட்டிற்கான தடையை நீக்க, தமிழக அரசு முழு முயற்சி எடுக்க வேண்டும். பல நாடுகளில் இருந்து வரும் சுற்றுலா பயணிகள், அலங்காநல்லூர் ஜல்லிக்கட்டை ரசிக்கின்றனர். ஜல்லிக்கட்டிற்கு விதிக்கப்பட்ட தடை, அவர்களின் வருகையைக் குறைத்து, இந்திய அரசுக்கு சுற்றுலா வருமானத்தையும் குறைக்கும்.



விலங்கு நல ஆர்வலர்கள், எதற்கெடுத்தாலும் தடை கேட்பது நியாயமே இல்லை. பல ஆயிரம் தமிழர்களின் மனதை, இது புண்படுத்துகிறது என்பது இவர்களின் வாதம்.



சென்ற வருடம் உச்ச நீதிமன்றம், சில நிபந்தனைகளுடன் ஜல்லிக்கட்டை அனுமதித்தது.







நிபந்தனைகள் :






*போட்டி நடத்துவதற்கு, 30 நாட்களுக்கு முன்பே மாவட்ட ஆட்சியரிடம் தெரிவித்து அனுமதி வாங்க வேண்டும்.



* அரசு அனுமதிக்கும் இடங்களில் மட்டுமே போட்டி நடத்த வேண்டும்.



* போட்டியில் எத்தனை காளைகள், மனிதர்கள் பங்கேற்கின்றனர்என்பதை எழுத்துப்பூர்வமாக தெரியப்படுத்த வேண்டும்.



* விலங்கு நல ஆர்வலர்கள், போட்டி நடக்கும் இடத்தில் இருக்க வேண்டும்.



* பார்வையாளர்கள் இருக்கும் இடத்திற்கு மாடுகள் செல்லா வண்ணம் தடுப்பு அமைக்க வேண்டும்



* முழு போட்டியையும் வீடியோவில் பதிவு செய்ய வேண்டும்



* மாடு பிடி வீரர்கள் மது அருந்தி இருக்கக் கூடாது. அதே போல், மாடுகளுக்கும் கட்டாயமாக சாராயம் கொடுக்கக் கூடாது.



* மாடு பிடி வீரர்கள் அனைவரும் ஒரே நிற, 'டி- -ஷர்ட்' களை அணிந்திருக்க வேண்டும்.



மேலும், பல்வேறு ஏற்றுக்கொள்ளக்கூடிய நிபந்தனைகளை, உச்ச நீதிமன்றம் விதித்தது. அலங்காநல்லூர் மற்றும் பாலமேடு கிராம மக்களும், இந்நிபந்தனைகளை ஏற்று, சென்ற வருடம் ஜல்லிக்கட்டு போட்டி நடத்தினர்.



இனி வரும் எல்லா வருடமும், உச்சநீதிமன்றத்தின் வழிகாட்டுதலின் படி, ஜல்லிக்கட்டை நடத்த தயாராக மக்கள் இருக்கின்றனர். எனவே, தமிழக அரசு முழுமுயற்சி எடுத்து, ஜல்லிக்கட்டிற்கான தடையை நீக்க, வழி செய்ய வேண்டும். வெளிநாட்டினரும் ஆவலாக கண்டு ரசிக்கும், ஜல்லிக்கட்டிற்கான தடையை நீக்க வேண்டும். மாடுகளுக்கும், மனிதர்களுக்கும் துன்புறுத்தல் இல்லாமல், மகிழ்ச்சியுடன் இவ்விழா நடைபெற வேண்டும் என்பதே, பெரும்பாலான தமிழர்களின் ஆசை.



கட்டுரையாளர்: ஸ்ரீதர் சத்யநாராயணன்



மின்னஞ்சல்: < sridhar.great2007@gmail.com>



அலைபேசி: 9790824237



Advertisement

இதையும் தவறாமல் படிங்க ...



Advertisement

வாசகர் கருத்து (10)

  • புதியவை
  • பழையவை
  • அதிகம் விவாதிக்கப்பட்டவை
  • மிக மிக தரமானவை
  • மிக தரமானவை
  • தரமானவை
karmegam - devakottai,இந்தியா
05-பிப்-201510:57:06 IST Report Abuse
karmegam எங்கள் வீட்டில் 150 வருடங்களாக 4 தலைமுறையாக மஞ்சு விரட்டு மாடு வளர்த்து வருகிறோம் எந்த ஒரு காளையும் நாங்கள் விலை கொடுத்து வெளியில் இருந்து வாங்கியது இல்லை. எங்கள் வீட்டிலே ஒரு காளையின் ஆயிட் காலம் முடியயில் மற்றொரு காளை எங்கள் வீட்டில் உள்ள பசுவின் மூலமாக உருவாகி விடும். இது எங்களுக்கு கிடைத்த இறைவனின் மிகப் பெரிய வரமாக கருதி பெருமை படுகிறோம். எங்கள் ஊரில் எல்லோரும் அதனை தெய்வமாக வழி படுகிறார்கள். இரண்டு மாதத்திற்கு முன்பு அந்த காளை இறந்து விட்டது. அப்போது ஊரில் உள்ள அனைவரும் ஒன்று சேர்ந்து எங்கள் வீட்டில் ஒருவரை போல மாலை மரியாதையுடன் அடக்கம் செய்தார்கள். எனது அப்பா மற்றும் எனது தம்பியின் கண்ணீரை நிறுத்த முடியவில்லை. வீட்டில் உள்ள அனைவரும் மற்றும் ஊர்காரர்களும் மிகவும் சோகத்துடன் இருந்தார்கள். இப்பொது இன்னுமொரு கன்றுக்குட்டி காளையாக உருவாகி கொண்டு உள்ளது ஆனால் மஞ்சு விரட்டு நடக்குமா என்று தான் தெரிய வில்லை. இதனை பாரம்பரியமாக உயிராக நினைப்பவர்கள் படிக்காதவர்கள் வெளியுலகம் அறியாதர்வகள் என்று யாரும் நினைக்க வேண்டாம். நான் சென்னையில் MNC Construction Company யில் வேலை பார்க்கிறேன் எனது ஒரு தம்பி Software Engineer ஆகவும் ஊரில் உள்ள தம்பி மேல் நிலைப் பள்ளியில் கணித ஆசிரியராக இருக்கிறான் எங்கள் அனைவரின் உயிர் மூச்சு திருவிழா இந்த மஞ்சு விரட்டு. ஆகவே இதை பற்றி அறியாதவர் தவறாக எந்த கருதுக்களையிம் சொல்ல வேண்டாம் என்று கேட்டுக்கொள்கிறேன். செ.கார்மேகம் கோட்டூர் சிவகங்கை மாவட்டம்
Rate this:
Share this comment
Cancel
kandhan. - chennai,இந்தியா
04-பிப்-201518:15:15 IST Report Abuse
kandhan. விலங்கு வதை சட்டத்தை இதில் நுழைப்பது என்பது தமிழர்களின் பாரம்பரியமான விளையாட்டான ஏறு தழுவுதல் என்பதை இந்த மோடி அரசும் ஆ தி மு க அரசும் திட்டமிட்டு தமிழர்களின் வீர விளையாட்டை முடக்கியதற்கு அரசியல் காரணம்தான் என்பதை மக்கள் நன்கு அறிவார்கள் ?இதற்க்கு மக்கள்தான் சிந்திக்கவேண்டும் கேரளாவில் அடி மாடுகளாக கொண்டு செல்லும் மாடுகளை இந்த இரண்டு அரசும் தடுக்க முன் வருமா ???முடியாது காரணம் அங்குள்ள மக்கள் மாட்டிறைச்சி இல்லாமல் வாழ முடியாது முடிந்தால் தடுத்து பார்க்கட்டுமே ??எல்லாம் தமிழனுக்குதான் சட்டம் மற்றவர்களுக்கு இல்லை ???இது நியாயமா ??எப்போது விழிக்கும் இந்த அரசு கந்தன் சென்னை
Rate this:
Share this comment
Cancel
NALLA THAMBI - RAIPUR,இந்தியா
04-பிப்-201517:28:58 IST Report Abuse
NALLA THAMBI ஆமா கிரிக்கெட்டெல்லாம் ஒரு விளையாட்டா ? அதை போய் கோடிக்கணக்கான மக்கள் வேலைகளையெல்லாம் விட்டு விட்டு நாள் முழுவதும் ,அல்லது ஐந்து நாட்கள் ஏன் பார்க்கிறார்கள் ? விடிய விடிய டிவி முன்பு லூசு மாதிரி பார்க்கிறார்கள் ?
Rate this:
Share this comment
Cancel
Endrum Indian - Kolkata,இந்தியா
04-பிப்-201516:07:04 IST Report Abuse
Endrum Indian ஜல்லிக்கட்டு ஒரு வீரவிளையாட்டு அன்று. இன்று அல்ல. அதை அடக்கினால் தான் திருமணம் என்றால்? இப்பொழுது 30, 40 பேரத்தவிர்த்து தமிழன் யாருக்குமே கல்யாணம் நடக்காது. 3500 ஆண்டுகளுக்கு முன்னால் "அசுர பலம் கொண்ட காளையை அடக்கிய நான், நிச்சயம் உன்னை திருடர்களிடமிருந்தும், காட்டு விலங்குகளிடமிருந்தும் காப்பேன்". அப்படிஎன்றால் அப்பொழுதே நிறைய திருடர்கள் இருந்தார்களா என்ன? என்னய்யா கட்டுக்கதை இது. இதுவும் ஒரு விளையாட்டு என்று வைத்துக்கொள்ளுங்கள். இதில் தமிழன், வீரம், 3500 ஆண்டுக்கு முன்னால் என்ற நம்மை எமோஷனல் பிளாக் மெயில் எல்லாம் செய்யத் தேவையில்லை. கல் தோன்றி மண் தோன்றாக்காலத்தே முன் தோன்றி மூத்தது தமிழ், அதுக்காக நமது இன்றைய தமிழ் என்று பிறந்தது? வெறும் 1000 வருடங்களுக்கு முன்னால் கூட இல்லை. சேர சோழ பாண்டிய, பல்லவ, சாளுக்கியர்கள் வந்த பிறகு வந்த தமிழ் தான் நமக்கு தெரியும். அதற்கு முன்னே இருந்த லெமுரிய கண்ட தமிழ் இண்டஸ் கலாச்சாரம். ஆகவே சும்மா குட்டையை குழப்பவேண்டாம், வீரம், மறத்தமிழன் என்று.
Rate this:
Share this comment
Cancel
Nanda Gopal - Abu dhabi,ஐக்கிய அரபு நாடுகள்
04-பிப்-201511:51:03 IST Report Abuse
Nanda Gopal தமிழக அரசு முழுமுயற்சி எடுத்து, ஜல்லிக்கட்டிற்கான தடையை நீக்க, வழி செய்ய வேண்டும்
Rate this:
Share this comment
Cancel
kalyan - CHENNAI,இந்தியா
04-பிப்-201509:29:43 IST Report Abuse
kalyan இது வீரமா அல்லது விளையாட்டா? இரண்டும் கலந்த ஒன்றா? காளையை அடக்க ஐம்பது பேர் துரத்துவது எப்படி வீரமாகும்? ஒரு குறுகிய வாசல் வழியாகத் திடீரென ஒரு காளை விரட்டப்படும்போது அது மிரண்டுதானே போகும்? அதற்குத் தெரியுமா தன்னை எதிர்கொள்ள 50 பேர் வெளியே காத்திருக்கிறார்கள் என்று? அல்லது இந்த 50 பேருக்கு காளை வருவது என்ன எதிர்பாராத விஷயமா? இதில் என்ன நியாயம் இருக்கிறது? காளையை யாரும் அடக்குவதில்லை.. அது பயத்தில் ஓட அதை 50 பேர் துரத்தொத்ரத்ட்டேன்று துரத்தி அதில் இரண்டொருவர் அதன் திமிலைப் பிடித்துத் தொங்கியபடியே ஒரு பத்தடிக்கு பயணிக்க காலை திமிறிக்கொண்டு ஓட.. பத்தடிக்கு தொன்கியவர் வீரம் பாராட்டப்பட்டு பிரிட்ஜ் மிக்சி கிரைண்டர் என்று பரிசு மழை.. மனதைத் தொட்டுச் சொல்லுங்கள் இது வீரமா? விளையாட்டா? காளை மிரட்டலா? பழங்காலத்தில் எவ்வளவோ பழக்கங்கள் இருந்தன.. மனிதன் நாகரீகம் அடைய அடைய பலப் பல பழக்கங்கள் மாறிவிட்டன.. இன்னும் சில விஷயங்களை அடையாளமாகத்தான் வைத்திருக்கிறோம்( கல்யாணத்தில் காசி யாத்திரை, குதிரை மேல் கத்தியுடன் ராஜ அலங்காரத்தில் சவாரி என்பன) எனவே இந்த காளையை மிரட்டும் நிகழ்வு மாற்றப் பட்டே ஆகவேண்டும்..
Rate this:
Share this comment
siva - Chennai,இந்தியா
05-பிப்-201508:05:18 IST Report Abuse
sivaகல்யாண், அந்த ஐம்பது பேரில் ஒருவராக நின்று சீறிவரும் காளையை பிடிக்க வேண்டாம்...... தொட முயன்று பாருங்களேன் வீரம் என்றால் என்ன வென்று தெரியும். தமிழன் ஏன் இதற்கு காளையை தேர்ந்தெடுத்தான்........ஏன் ஆட்டுக்குட்டியை பூனைக்குட்டியை தேர்ந்தெடுக்கவில்லை. காளைக்கு மட்டுமே தான் அந்த பலம் உள்ளது. அத்துதான் அதன் இயல்பு. ஐந்துபேர் அல்ல பத்துபேர் சேர்ந்து தொங்கினாலும் அனைவரையும் வீசி எறிந்துவிட்டு அலட்சியமாக செல்லும் திறன் உடையது. அது போல் வருடத்தில் அந்த ஒருநாள் அதுவும் பத்துநிமிடம்தான் ஆனால் மீதி 364 நாட்கள் அதை குழந்தை போல் பாசமாக கவனிப்பது எங்கள் இனம். ஒரு மாடு இருந்துபோனால் வீட்டில் ஒருவர் இறந்ததற்கு சமமாக கருதுவோம். எங்களிடம் வந்து சும்மா எதாவது சொல்லவேண்டும் என்பதற்காக சொல்லக்கூடாது....
Rate this:
Share this comment
kalyan - CHENNAI,இந்தியா
05-பிப்-201511:20:23 IST Report Abuse
kalyanஇதில் இனம் எங்கே வந்தது? வெறித்தனமாகப் பேசுவதால் ஒரு தவறு நியாயமாகாது.. இனப்பெருமை காக்க எவ்வளவோ இருக்கிறதே .. அவற்றையெல்லாம் ஒவ்வொன்றாக நாத்திக பிரச்சாரத்தாலும் மத மற்றப் பிரச்சாரத்தாலும் கோட்டை விட்டுவிட்டு எதோ இந்த காளை மாட்டை மிரட்டி ஆனந்தமடையும் ஒரு விஷயம்தான் இனத்தின் அடையாளம் போலப் பேசுவது உங்களுக்கே வ்ட்கமாக இல்லை? அதென்ன எங்கள் இனம்? சாதியா ? மொழியா? சரியாகச் சொல்லுங்களையா.....
Rate this:
Share this comment
siva - Chennai,இந்தியா
05-பிப்-201513:44:02 IST Report Abuse
sivaநான் இங்கு சொன்னது அனைத்தும் சாந்தமாகவே இதில் வெறித்தனமான பேச்சு எங்கே இருக்கிறது? இனப்பெருமை காக்க எவ்வளவோ இருக்கு என்பதற்காக இதனை விட்டுக்கொடுக்க முடியும் என்ன ? எங்கள் இனத்திற்கு ஏது மதம் ? மொழி மட்டுமே எங்கள் இனம். முன்பு தமிழன் திராவிடன், பிறகு புத்தன், இந்து, இஸ்லாமியன், கிறிஸ்த்துவன் எந்த உடை உடுத்தினாலும் தமிழன் தமிழன் தான். சத்தியம் என்பது குற்றமில்லை தீண்டாமையும் ஏற்றத்தாழ்வும் இல்லாதவரை, எங்கள் பண்பாடு, எங்கள் கலாச்சாரம், எங்கள் மொழி இதுவே எங்கள் அடையாளம் மதம் அல்ல. தமிழுக்கும் தமிழன் கலாச்சரத்திர்க்கும் நன்மை செய்பவர் எவருமே தமிழர்தான். இதை மதம், சாதி, நிறம் எதுவும் கட்டுபடுத்தாது. மனிதனை மோதவிட்டு ஆனந்தம் அடைவதுதான் தவறு. நாங்கள் சொல்வது இது அதற்க்கு இயல்பு என்பதுதான். சண்டைக்கோழி என்பது பயிற்சி கொடுப்பது அல்ல, இயல்பாகவே ஒன்றை ஒன்று சந்தித்துக்கொண்டால் சண்டையிடும் இயல்பை உடையது. விளக்கம் போதுமா இல்லை இன்னும் வேண்டுமா ?...
Rate this:
Share this comment
elangovan - madurai,இந்தியா
05-பிப்-201513:47:07 IST Report Abuse
elangovanகல்யான், சரியா சொனீங்க. 30-40 பேர் மொத்தமா தொரத்துனா, சிங்கம் புலி கூடபீதியில ஓடத்தான் செய்யும். வெளி நாட்டுல ஒருத்தர்.. ஆமா ஒரே ஒருத்தார் ஒரு செவப்பு துணிய வச்சு, ஒரு மெகா சைஸ் காளை கூட வேடிக்கை காட்டுவார். அது என்னமோ காளைய இம்மச பண்ணாம வீரவேடிக்கை காடுற மாதிரி இரூக்கு. நம்மாளுக மொத்தமால்ல ஒடுராணுவ? இந்த கட்டுரையே சொல்லுது "அந்தக்காலத்துல" ன்னு, அப்புறம் எதுக்கு இப்பவும் அதயே புடிச்சு தொங்குராங்கன்னு தெரியல்ல. காலதுக்கு ஏத்த மாதிரி மாத்திக்கநும், அந்த காலத்துல இந்த மாதிரி வீர வெளாயாட்டு இருந்திருக்குன்னு கிளியர் டாக்குமென்ட் பண்ணி வொலகதுக்கு தெரியுற மாதிரி பண்ணிற வேண்டியது தானே. வீம்பு பண்ணாம கொஞ்ச்ம் பிரக்டிகலா யோசிக்கணும்....
Rate this:
Share this comment
Cancel

உங்கள் கருத்தைப் பதிவு செய்ய

(Press Ctrl+g or click this   to toggle between English and Tamil)
Login :
New to Dinamalar ?
கருத்து விதிமுறை