uratha sindanai | மொழிக்கல்வியும் மொழி கலப்பும்; ஏ.ஆதித்தன் - மொழி அறிவியல் பேராசிரியர்மதுரை காமராஜர் பல்கலைக்கழகம்| Dinamalar

மொழிக்கல்வியும் மொழி கலப்பும்; ஏ.ஆதித்தன் - மொழி அறிவியல் பேராசிரியர்மதுரை காமராஜர் பல்கலைக்கழகம்

Added : ஏப் 19, 2015 | கருத்துகள் (8)
Advertisement
 
 
Advertisement
 
 
dinamalar-advertisement-tariff-2018
 
Advertisement
மொழிக்கல்வியும் மொழி கலப்பும்;  ஏ.ஆதித்தன் - மொழி அறிவியல் பேராசிரியர்மதுரை காமராஜர் பல்கலைக்கழகம்

சிறந்த குடிமக்களை உருவாக்குவதே கல்வியின் அடிப்படை நோக்கம். தன்னம்பிக்கைக்கும், புத்துருவாக்கத்திற்கும் வழிவகை செய்யாத கல்வி, வெற்றிடக் கல்வியாகவே கருதப்படுகிறது. ஆனால், இக்காலத்தில் தனிமனிதப் பொருளாதார முன்னேற்றத்திற்குத் துணைபுரியும் கருவி தான் கல்வி என, நம்பப்படுகிறது.

மாணவர்களை, வேலைச்சந்தைக்கு பயிற்சி அளிப்பதே கல்வி பயிற்றுவித்தல் எனவும், இதற்கு பயிற்சி அளிக்கும் நிறுவனங்களே கல்வி நிறுவனங்கள் எனவும் நம்பப்படுகிறது. பல்கலைப் பட்டங்கள், அறிவின் தேடலை விட, அகந்தையின் வெளிப்பாடாகவே அமைந்துள்ளன. பட்டங்களை பெருமையாகக் கொண்டாடும் நாட்டில், கல்வியின் தரம் கசப்பாகக் கருதப்படுகிறது.மொழி தான் மனிதனை விலங்கிலிருந்து வேறுபடுத்தி, சமூக அமைப்பின் அங்கமாக மாற்றுகிறது. மொழியை வெறும் கருத்துப் பரிமாற்றக் கருவியாகக் கருதியது அந்தக்காலம். மொழி என்பது ஓர் இனத்தின் அடையாளம்; மொழி இல்லையேல், சமுதாய அமைப்பும், மனித பண்பாடும் காணாமல் போய்விடும். தமிழ் சமூகம், தாய்மொழி மீதுள்ள நம்பிக்கையை மெல்ல மெல்ல இழந்து வருவதால், தமிழ்க் கல்வியையும், தமிழ்வழிக் கல்வியையும் வணிகச் சந்தையில் மதிப்பற்றதாகக் கருதத் துவங்கியுள்ளது. இதனால், தமிழ்க்கல்வி முற்றிலுமாகப் புறக்கணிக்கப்படும் நிலைக்குத் தள்ளப்பட்டு வருகிறது. உயர்மதிப்பெண் பெறுவதன் பொருட்டு, பள்ளிக் கல்வியில் ஆங்கிலத்தைப் பயிற்று மொழியாகவும், இந்தி, பிரெஞ்சு போன்ற மொழிகளை இரண்டாம் மொழியாகவும் ஏற்றுக் கொள்கிற போக்குதான் பெரிதும் காணப்படுகிறது. கல்வியில்கூட, மொழியின் அடிப்படையில் உயர்வு, தாழ்வு இங்குக் கற்பிக்கப்படுகிறது.

தாய்மொழிக் கல்வியின் உண்மை நிலையை உணர்ந்து கொள்ளாமையால், ஆங்கில வழிக் கல்விமீது பெரிதும் நாட்டம் கொண்டுள்ளோம். தாய்மொழியிலேயே உயர்கல்வியையும், ஆராய்ச்சியையும் வழங்குகிற சீன பல்கலைக்கழகம், உலகத்தர வரிசையில், 10க்குள் இடம் பெற்றிருப்பது பெரிதும் வரவேற்கத்தக்கது. தாய்மொழியில் ஆர்வம் இல்லாதவன், தன்னம்பிக்கையையும், சிந்தனை வளத்தையும் இழந்து, அடிமை வாழ்விற்கு ஆயத்தமாகிறான் என்பது அறிவாளர்களின் கருத்து. தமிழ்க் கல்வியின் பின்னடைவிற்கு இன்றைய பாடத்திட்டமும், மக்களின் மனநிலை யும் தான் பெரிதும் காரணம்.இலக்கியக் கல்வியையே மொழிக்கல்வியாகக் கருதி, பழமையைப் பெரிதும் பாதுகாக்கும் பாடத்திட்டத்தால், பயன்பாட்டுத்தமிழ் மறக்கடிக்கப்பட்டு வருகிறது. இதனால், மாணவர்களிடம் கருத்துப் பரிமாற்றத் தமிழ் காணாமல் போய்விட்டது. புதிய தேவைகளையும், அனுபவங்களையும் தெரிந்து கொள்ளும் வகையில், இயல்பான கருத்துப் பரிமாற்றத்திற்கு முதலிடம் அளிக்கும் பாடத்திட்டம் விரைவாகத் தேவைப்படுகிறது.

தமிழ்மொழி சார்ந்த கலாசாரப் பார்வை, மாணவர்களிடம் உருவாகும் வகையில் கல்வித்திட்டம் அமையாவிட்டால், தமிழன் தன் அடையாளத்தை இழக்க நேரிடலாம்.தாய்மொழியில் முழுமையான ஆளுமை இருந்தால் தான் பிறமொழியில் ஆளுமையினை வளர்க்க முடியும். மொழிக்கல்வியில் ஒரு மாணவன் சிறந்து விளங்கினால் தான் அம்மொழி வழியாகக் கற்கும் பிற பாடங்களையும் முழுமையாகப் புரிந்துகொள்ள இயலும் என்பது விவாதத்திற்கு அப்பாற்பட்ட அறிவியல் உண்மை.தமிழையும், ஆங்கிலத்தையும், 14 ஆண்டுகள் கற்ற பின்னரும், இவ்விரு மொழிகளிலும் கருத்துப் பரிமாற்றத்திறனும், படைப்புத் திறனும் இன்றி, மாணவர்கள் அல்லல்படுவதைப் பார்க்கும்போது, நம் மொழிக்கல்வியின் நிலையை அறிந்து கொள்ள முடிகிறது.இக்காலத்தில் மாணவர்களும், கற்றோரும் பெரிதும் ஆங்கிலம் கலந்த தமிழிலேயே உரையாடுகின்றனர். எந்த நிலையிலும் நம் பள்ளிகளும், கல்லுாரிகளும் ஆங்கிலம் கலந்த கலப்புத்தமிழைக் கற்றுக் கொடுப்பதில்லை. இவர்களைக் குறை கூறுவதைத் தவிர்த்து, இந்தச் சூழல் தோன்றுவதற்கான காரணத்தைக் கண்டறிந்து ஆவன செய்வது நலம் பயக்கும்.தமிழ் மொழித்திறன்களில் சிறப்பாகப் பயிற்சி அளிக்கும் ஆசிரியர்களின் பற்றாக்குறையும், பாடத்திட்டத்தில் பயன்பாட்டுத்தமிழ் பற்றிய பாடங்கள் இல்லாமையும், மாணவர்கள், கலவைத்தமிழைப் பயன்படுத்த அடித்தளம் அமைத்துள்ளன.

எந்த ஒரு வகுப்பிலும் மாணவர்களுக்கு எழுத்துகளின் ஒலிப்புமுறை பற்றிய பயிற்சியை வழங்காமல், மாணவர்கள் எழுத்துகளைத் தவறாக ஒலிக்கின்றனர் என்று கூறுவது வேதனைக்குரியது. வணிக நோக்கில் மக்களை ஈர்ப்பதன் பொருட்டுக் கலவைத் தமிழைக் கற்பிப்பதில், சில மின்னணு ஊடகங்களின் பங்கு மகத்தானது.வருவாய் சார்ந்த அணுகுமுறை யால், உலகப் பொதுமொழியாகக் கருதப்படும் ஆங்கிலத்தின் மீது கொண்டுள்ள விருப்பின் காரணமாக, தமிழ்ச் சொற்களான வடையையும், தோசையையும், வடமொழியாளர்களுக்காக வடா, தோசா என்று கூறும் போக்கு நகைப்புக்குரியது. தமிழ்மொழி பற்றிய தாழ்வு எண்ணம் மக்களிடம் நீடிக்குமானால், எதிர்காலத்தில் மாணவர்கள் தமிழைக் கற்றுக் கொள்வதற்குத் தங்கள் இல்லங்களில் சிறப்பு வகுப்பு ஏற்பாடு செய்ய வேண்டிய நிலை உருவாகிவிடும். ஆங்கிலத்தையோ, இந்தியையோ ஒரு மொழியாகக் கற்பது, பெரிதும் வரவேற்கத்தக்கது; ஆனால், இம்மொழிகள் வழியாகக் கற்றால் தான் வேலைவாய்ப்பு பெருகும் என்ற புனைந்துரையைப் பொய்யுரையாக்க வேண்டியது கல்வியாளர்கள் கடமை.தமிழ்க்கல்வி, தமிழகத்தில் புறந்தள்ளப்படும் நிலையை மாற்ற, தொலைநோக்குச் செயல்திட்டங்கள் உருவாக்கப்பெற வேண்டும். ஆங்கில மொழிக்கு மொழி முதன்மையிடம் அளிக்கும் தமிழர்களின் மனப்போக்கு மாறிடும் நிலையில், கலவைத்தமிழ் தன் இறுதியைச் சந்திக்கும்.
மின்னஞ்சல்: ing_mku@yahoo.com

Advertisement


வாசகர் கருத்து (8)

  • புதியவை
  • பழையவை
  • அதிகம் விவாதிக்கப்பட்டவை
  • மிக மிக தரமானவை
  • மிக தரமானவை
  • தரமானவை
N.K - bochum,ஜெர்மனி
26-ஏப்-201504:30:23 IST Report Abuse
N.K முதலில் இன்று தமிழில் சரளமாக வாசிப்போரும் , எழுதுவோரும் மிகச்சிலரே ..புத்தகம் வாசிக்கும் பழக்கம் குறைந்துவிட்டது. . இந்நிலையில் தொடக்கப்பள்ளியிலேயே புறநானூறு , அகநானூறு போன்ற "பாடல் வடிவில் உள்ளதை பாடத்தில் வைத்தால் எவ்வாறு எளிதில் மொழியை கற்க முடியும் . ? இவை எல்லாம் தமிழின் விலைமதிப்பில்லாத சொத்துகள் தான் இருப்பினும் , சிறுவர் மலரின் அட்டையைக்கூட தடவி தடவி படிக்கும் குழந்தைகள் இவற்றை படித்தால் எப்படி நம் மொழியில் ஆர்வம் வரும் ?.. மேற்கண்ட கட்டுரையில் குறிப்பிட்டுள்ளது போல் நடைமுறை சூழ்நிலைகளில் எவ்வாறு தமிழில் உரையாடுவது ? உதாரணம் , வங்கியில், கடைகளில் மற்றும் பிற சூழ்நிலைகளில் உரையாடுதல் .. அதற்கேற்ற தமிழ் சொற்கள் ( காசோலை, ஓட்டுனர், பயணசீட்டு, வரையோலை , மேலும் நம் மாநிலத்தில் புழக்கத்தில் உள்ள வட்டார வழக்குகள். போன்றவற்றில் நல்ல பயிற்சி அளித்து .. மனப்பாடம் செய்து தேர்வெழுத விடாமல் , செய்முறை தேர்வாக நடத்த வேண்டும். மற்றொன்று தொழில்நுட்பத்தில் தமிழை புகுத்த வேண்டும். விண்டோஸ் , கணினி மென்பொருட்கள் , அலைபேசி மென்பொருட்கள் போன்றவை சீன , ஜேர்மன் போன்ற மொழிகளிலும் தயாராகிறது. அதேபோல் ஒரு மொழி வழி கல்வி பயின்றோர் அந்தமொழியைக்கொண்டே , பிறமொழி சாராமல் வணிகரீதியாக முன்னேற வேலைவாய்ப்புகளும் உருவாக்கப்பட வேண்டும். இவற்றை இணைத்துப்பார்த்தால் , தமிழில் மென்பொருட்கள் உற்பத்தியை தமிழர்கள் மட்டுமே செய்ய முடியும் ( போட்டியில்லாமல்).. பொருளாதார ரீதியாக ஒரு சுழற்சியை உருவாக்க முடியும். ( நம்மை நாமே சார்ந்து இருக்க முடியும் )...இங்கே பயின்றவர்கள் இங்கேயே வேலை செய்வர் .. தமிழிலேயே உருவான தொழில்நுட்பங்களை மட்டுமே தமிழகமெங்கும் கட்டாயமாக பயன்படுத்த வேண்டும் ( ஏற்றுமதி- விதிவிலக்கு) .. அப்படிப்பட்ட , நமக்காக நம்மை நாமே சார்து இருக்கிற பொருளாதார அமைப்பை உருவாக்கும் வரை , ஆங்கிலமும் , மட்டற்ற பிற மொழிகளும் அவசியம் வேண்டும் . தவிர்க்க முடியாது. . பிற மொழிகளை கற்றால் தான் , நம் மொழியின் சிறப்பை உணரமுடியும். பிற மொழியோடு ஒப்பீடு செய்துகொள்ள முடியும். பிறருக்கும் கற்றுத்தர முடியும். . மொழியை வளர்க்க முடியும். .. ஹிந்தி எதிர்ப்பு போராட்டம் பண்ணி விட்டாலோ , காச்சுமூச்சு என்று கத்தி விட்டாலோ தமிழ் வளராது.. இல்லை என்றால் மொழியை வைத்து அரசியல் பண்ணிக்கொண்டே இருப்பார்கள் . . ( ஜெர்மனியில் பயன்பாட்டில் உள்ள அனைத்து கணிப்பொறிகளிலும் ஒரு ஆங்கில வார்த்தைக்கூட காண முடியாது. . உற்பத்தி நிறுவனங்களிலும் இதே நிலை தான்.)
Rate this:
Share this comment
Cancel
John I - Nanguneri,இந்தியா
26-ஏப்-201501:49:50 IST Report Abuse
John I முதலில் 'அ' எழுத்துக்கு 1 மாத்திரை அளவு நேரமும் 'ஆ' எழுத்துக்கு 2 மாத்திரை அளவு நேரமும் உச்சரிக்க தமிழாசிரியர்களுக்கு கற்றுகொடுங்கள். தமிழ் தானாகவே தலை நிமிர்ந்து விடும். தமிழ் வரையறையில்லாமல் அழிந்து கொண்டிருப்பதற்கான மூலகாரணம் இதுவே. தற்போது 'அ' எழுத்துக்கு 2 மாத்திரை அளவு நேரம் கொடுத்து 'ஆ' எனவும், 'ஆ' எழுத்துக்கு 4 மாத்திரை அளவு நேரம் கொடுத்து 'ஆ..' எனவும் உச்சரிக்கின்றனர். இது மற்ற திராவிட மொழிகளில் அங்கிகரிக்கப்பட்ட வடமொழிக்கலப்பின் தாக்கத்தின் விளைவு தமிழின் தனித்தன்மையை சிதைக்கிறது. உதாரணத்திற்காக 'தீபா' என்கின்ற பெண்பால் பெயரை, மலையாள மொழியில் எழுதும்போது 'தீப' என்றும் வாசிக்கும்போது 'தீபா' என்றும் வாசிக்கின்றனர். இங்கே எழுத்தும்போது 'ப' என்ற குறிலானது வாசிக்கும்போது 'பா' என்று நெடிலாக மாறுகின்றது. தமிழின் தனித்தன்மையே அதன் சரியான உச்சரிப்பே ( விதிவிலக்கு - 'ர', 'ய'. உ-ம்: இராமர், இயேசு ).
Rate this:
Share this comment
Cancel
Rajarajan - Thanjavur,இந்தியா
23-ஏப்-201506:55:56 IST Report Abuse
Rajarajan எல்லாம் சரி. தமிழ் தமிழ் என்று மூச்சுக்கு 300 தடவை கூறுபவர் எல்லாம், தங்கள் வாரிசுகளை எந்த தமிழ் வழி கல்வி கூடத்தில் சேர்த்திருக்கின்றனர் என்று கூற முடியுமா ?? அரசு கல்வி துறை அமைச்சர் / அதிகாரிகள் / ஊழியர் எல்லாம் தமிழ் வழியில் தான் தங்கள் வாரிசுகளை சேர்த்துள்ளனரா ??? (முன்னாள் / இந்நாள்) முதல்வர் / அமைச்சர்கள் / MP / MLA / ஆசிரியர் / அரசு ஊழியர் எல்லாம் தங்கள் வாரிசுகளை தமிழ் வழி கல்வியில் தான் சேர்த்துள்ளனரா ?? படிப்பது ராமாயணம், இடிப்பது பெருமாள் கோயில் தானே ???? அரசு பணத்தை சம்பளமாக பெற்றுக்கொண்டு, அரசின் செயல்பாடு சரி இல்லை என்று இவர்களே நேரிடையாக சாட்சி கூறுவதாக தானே இதன் பொருள் ?? தனியார் நிறுவனத்தில் வேலை செய்துகொண்டு, அந்நிறுவனம் சரி இல்லை என்று சொன்னால், அதன் நிர்வாகி இந்நேரம் நடவடிக்கை எடுத்திருப்பாரே ?? அரசு நிர்வாகம் தானே, தலையே சரி இல்லை, நமக்கென்ன, எவன் கேள்வி கேட்க முடியும் என்ற மனநிலையை தானே இது எடுத்து காட்டுகிறது. மேடையில் பேசுவோரும் / அரசு சம்பளம் மற்றும் சலுகை பெறுவோரும், ஊருக்கு உபதேசம் செய்யத்தான் லாயக்கே தவிர, ஒரு ........யிருக்கும் உபயோகமில்லை. இந்த வெளிபடையான சவாலை ஏற்று, மேற்குறிப்பிடபட்டவர்கள், இந்த கல்வியாண்டிலேயே தங்கள் வாரிசுகளை உடனடியாக, தமிழ் வழி கல்விக்கு மாற்றுவாரா ??? இவர்கள் உபதேசத்தை கேட்டால், கேட்பவரின் வாரிசுகள் நடுத்தெருவில் பிச்சை தான் எடுக்க வேண்டும். இவர்கள் வாரிசுகள் மட்டும், வெளிநாட்டு வேலை / உயர்பதவி வகிக்க வேண்டும். ஆனால், இவர்கள் அறிவுரையை கேட்டு, மற்றவரின் பிள்ளைகள் முன்னேற கூடாது. நல்ல எண்ணம். தமிழ் தமிழ் என்று கூறும் திரு. ராமதாசின் வாரிசுகள், தமிழகத்தில் எந்த தமிழ் வழி பள்ளியில் படிக்கின்றனர் ?? இவரது அன்பு மகன் திரு. அன்புமணியை தமிழ் வைத்தியமான சித்த வைத்திய மருத்துவர் ஆகாமல், ஆங்கில வழி மருத்துவர் ஆக்கியது ஏன் ?? இவரும், தமிழ் வழி சித்த மருத்துவம் பயிலாமல், ஆங்கில வழி மருத்துவம் படித்து ஏன் ?? தங்கள் வாரிசுகளை, புது டெல்லியில், ஆங்கில வழி கல்வி படிக்க வைத்து, இந்தியும் கற்றுகொடுப்பது ஏன் ?? ஊருக்கு உபதேசம் செய்யும் இது போன்ற அறிவு ஜீவிகளை, முச்சந்தியில் வைத்து சவுக்கால் ஏன் அடிக்க கூடாது ??
Rate this:
Share this comment
Cancel

உங்கள் கருத்தைப் பதிவு செய்ய

(Press Ctrl+g or click this   to toggle between English and Tamil)
Login :
New to Dinamalar ?
கருத்து விதிமுறை

We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X