உடற்பயிற்சி செய்வோம்... ஆரோக்கியமாக வாழ்வோம்| Dinamalar

உடற்பயிற்சி செய்வோம்... ஆரோக்கியமாக வாழ்வோம்

Added : ஜூலை 09, 2015 | கருத்துகள் (1)
Advertisement
உடற்பயிற்சி செய்வோம்... ஆரோக்கியமாக வாழ்வோம்

உடற்பயிற்சி செய்வீர்! உடல் நலன் காப்பீர்! என்பது நாம் அனைவரும் அறிந்ததே. ஆனால் நம்மில் எத்தனைபேர் முறையாக உடற்பயிற்சி செய்கிறோம் என்பது மில்லியன் டாலர் கேள்வி. தினசரி உடற்பயிற்சி செய்வது கேள்விக்குறியாகவே உள்ளது. நான் தினமும் நீண்ட நேரம் வேலைபார்க்கிறேன். பின்னர் எதற்காக தனியாக உடற்பயிற்சி செய்ய வேண்டும் என்பது அறியாமை, அலட்சியத்தால் கூறப்படுகிறது. இவ்வாறு அதிகப்படியான வேலை பார்ப்பவர்களுக்கு சர்க்கரை நோய், ரத்த அழுத்தம், மனச்சோர்வு, இருதய சம்பந்தப்பட்ட பிரச்னைகள், மூட்டு மற்றும் தசை தொடர்பான பாதிப்புகள் அதிகம் ஏற்படுகிறது. பலமணி நேர வேலை மற்றும் கடினமான உழைப்பால் மன அழுத்தம் ஏற்படுகிறது. இதற்கு காரணம் நமது உடலில் சுரக்கக்கூடிய 'கார்டிசோல் எபிநெப்ரின்' அமிலம் ஆகும். இது உடல்நலத்திற்கு தீங்கு விளைவிக்கக்கூடியது. இந்த அமிலத்தின் செயல்பாடுகளில் இருந்து உடலை பாதுகாத்துக்கொள்ள உடற்பயிற்சி செய்வது மிக அவசியம். மனச்சோர்வு, உடல் வலி உடற்பயிற்சி செய்யும்போது 'என்டார்பின்' மற்றும் 'என்கேபலின்' என்ற ஹார்மோன்கள் உடலில் உற்பத்தியாகிறது. இது நம்மை மனச்சோர்வு, உடல் வலியில் இருந்து பாதுகாத்து உடல் புத்துணர்ச்சி பெற மிகவும் உதவுகிறது. விளையாட்டு வீரர்கள், விளையாட்டு துறையில் ஆர்வம் உள்ளவர்கள் மற்றும் போட்டியாளர்கள் மட்டுமே உடற்பயிற்சி செய்ய வேண்டும் என்பது தவறான கருத்து. சிறுவர்கள் முதல் பெரியவர்கள் வரை அவர்களின் உடல் தகுதிக்கேற்ப உடற்பயிற்சி முறைகளில் ஈடுபடலாம்.உடற்பயிற்சி 'ஏரோபிக்ஸ்' மற்றும் 'அன்ஏரோபிக்ஸ்' என இரு வகைப்படும். 'ஏரோபிக்ஸ்' சார்ந்த உடற்பயிற்சிகளில் உடலில் உள்ள குளுக்கோஸ் எரிபொருளான 'கிளைக்கோஜன்' மற்றும் கொழுப்பு எரிக்கப்படுகிறது. இத்தகைய பயிற்சியை நாம் குறிப்பிட்ட நேரம் செய்ய வேண்டியது அவசியம். நடைபயிற்சி, சைக்கிள் ஓட்டுதல், ஓடுதல், நீச்சல், பாட்மின்டன், நடன பயிற்சிகள் ஆகியவை இவ்வகையை சார்ந்தது. 'அன்ஏரோபிக்ஸ்' பயிற்சியில் நமது உடலில் கிளைக்கோஜன் மட்டும் எரிக்கப்படுகிறது. எடை துாக்குதல் மற்றும் அதிவேகமாக ஓடுதல் போன்றவை இவ்வகை பயிற்சியை சார்ந்தது. இதில் நாம் எந்த பயிற்சி முறையை தேர்ந்தெடுத்தாலும் அதுகுறித்த முன்தயாரிப்பு பயிற்சிகள் செய்வது அவசியம்.தசைகளை விரிவுபடுத்தும் பயிற்சிகள், மூட்டுக்களை அசைக்கக்கூடிய பயிற்சிகள் போன்றவற்றை ஐந்து முதல் பத்து நிமிடங்கள்வரை செய்ய வேண்டும். பின்னர் சீரான உடற்பயிற்சிகளில் இருபது முதல் முப்பது நிமிடங்கள் வரை ஈடுபட வேண்டும். கடைசியில் மூச்சுப்பயிற்சி, மூட்டு மற்றும் தசைகளை மிகவும் மெதுவாக அசைத்தல், ஓய்வு சார்ந்த நிலையில் உடற்பயிற்சியை முடிப்பது அவசியம். இத்தகைய பயிற்சி ஐந்து முதல் பத்து நிமிடங்கள் வரை நீடிக்கலாம். இந்த நடைமுறைகளை பின்பற்றுவது உடற்பயிற்சி செய்யும் அனைவருக்கும் ஏற்றது. அவரவர் உடல் நிலைமை மற்றும் ஆரோக்கியத்திற்கு ஏற்ப உடற்பயிற்சி செய்யலாம். ரத்த அழுத்தம் ஒருவர் தனது சராசரி எடையை காட்டிலும் குறைவாக இருந்தால் 'அன்ஏரோபிக்ஸ்' மூலம் எடை துாக்குதல் பயிற்சியில் ஈடுபட்டு உடல் எடையை அதிகரிக்கலாம். ரத்த அழுத்தம் உள்ளவர்கள் வாரத்தில் மூன்று நாட்கள் உடல் எடை பயிற்சியிலும், மற்ற நாட்களில் சராசரி பயிற்சிகளிலும் ஈடுபடுவதால் அதை கட்டுப்படுத்த முடியும். ஆனால் அவர்கள் சரியான அளவு எடையை தேர்ந்தெடுப்பது அவசியம். அதுபோல சர்க்கரை நோயால் பாதிக்கப்பட்டவர்களுக்கு ஏற்றது 'ஏரோபிக்ஸ்' பயிற்சி. அவர்கள் முதலில் இருபது முதல் முப்பது நிமிடங்கள் சீரான பயிற்சி செய்ய வேண்டும். பின்னர் அவர்களின் சர்க்கரை அளவின் கட்டுப்பாட்டை அறிந்த பின் நாற்பது நிமிடம் முதல் ஒரு மணிநேரம் வரை பயிற்சி மேற்கொள்ளலாம். அவர்கள் சூரிய வெப்பத்திற்கு முன் அதிகாலையிலும், மாலையில் வெப்பம் தணிந்த பின்னும் உடற்பயிற்சி செய்வது நல்லது.இன்று உடல் எடை அதிகரிப்பு பெரிய பிரச்னை. மூட்டு மற்றும் முதுகுவலியால் பாதிக்கப்படுபவர்களால் சராசரியான பயிற்சிகளில் ஈடுபட முடிவதில்லை. அதனால் மேலும் மேலும் எடை அதிகரிக்கிறது. அவர்கள் முதலில் மூட்டு தசைகளை வலுப்படுத்தும் பயிற்சி, மூட்டுகளை அசைவுபடுத்தும் பயிற்சி, உள்வயிறு மற்றும் முதுகுசதை வலுப்படுத்தும் பயிற்சிகள் மேற்கொள்வது அவசியம். டாக்டரின் ஆலோசனை உடற்பயிற்சி சாதனங்களால் உடல் எடையை குறைத்துவிட்டு இதய துடிப்பை அதிகப்படுத்துவதற்கான பயிற்சி செய்தால் எடையை கட்டுக்குள் கொண்டுவரலாம். முதியவர்களுக்கு ஏற்படக்கூடிய எலும்பு முறிவு, எலும்பின் அடர்த்தி குறைதல், உடல் எடை குறைதல், கால்களில் ஏற்படும் உணர்ச்சியின்மை, நடைமாறுதல் மற்றும் தடுமாற்றம் போன்ற பிரச்னை உள்ளவர்களுக்கு உடல் எடையை சமப்படுத்தும் பயிற்சி மூட்டு மற்றும் நரம்பு சதைகளை வலுப்படுத்தும் பயிற்சியை எவ்வித உபகரணங்கள் இன்றி செய்யலாம். ஆனால் இத்தகைய பயிற்சி முறைகளுக்கு டாக்டரின் ஆலோசனை மற்றும் உடற்பயிற்சி நிபுணரின் வழிகாட்டுதல் கட்டாயம். உடல் பயிற்சி செய்வோம். ஆரோக்கியமாக வாழ்வோம்.
இன்று உடல் எடை அதிகரிப்பு பெரிய பிரச்னை. மூட்டு மற்றும் முதுகுவலியால் பாதிக்கப்படுபவர்களால் சராசரியான பயிற்சிகளில் ஈடுபட முடிவதில்லை. அதனால் மேலும் மேலும் எடை அதிகரிக்கிறது.



- டாக்டர்.ஏ.டி.சி., முருகேசன்,உடற்தகுதி நிபுணர், விருதுநகர்.99949 44228

Advertisement


We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X