அந்த புன்னகை இனி காணக்கிடைக்காது...| Dinamalar

அந்த புன்னகை இனி காணக்கிடைக்காது...

Updated : ஜன 16, 2017 | Added : ஜன 16, 2017 | கருத்துகள் (23)
Advertisement

அந்த புன்னகை இனி காணக்கிடைக்காது...

யாருடைய மரணமும் என்னை இந்த அளவு பாதித்தது இல்லை.
நினைத்த வார்த்தையை எழுதமுடியாமல் கண்ணில் நீர் திரையிடுகிறது.


தன் வாழ்நாள் முழுவதும் தசைஇறுக்க நோயால் பாதிக்கப்பட்டவர்களுக்காகவே வாழ்ந்த, சேலத்தை சேர்ந்த வானவன் மாதேவி அதே தசைஇறுக்க நோயால் தன் வாழ்வை 36 வயதில் முடித்துக்கொண்டார்.

எந்நேரமும் புன்னகையையே தன் பொன் நகையாகக் கொண்டிருந்த அந்த நம்பிக்கை மனுஷியை இனி சந்திக்க முடியாது என எண்ணும் போது நெஞ்சம் கனக்கிறது.

சாதாரண குடும்பத்தில் பிறந்த வானவன் மாதேவி பட்டம் பூச்சியாய் சிறகடித்து பறந்த பத்து வயதில் 'மஸ்குலர் டிஸ்ட்ரோபி' என்ற தசை இறுக்க நோயின் பாதிப்பிற்கு உள்ளானார்.

அதிக பட்சம் பத்து வருடங்கள் வாழலாம். ஆனால் அந்த வாழ்க்கையே பெரும் சுமையாகவும் வலியாகவும் போராட்டமாகவும் இருக்கும் என்று மருத்துவமனையில் சொல்லிவிட்டனர்.

கொஞ்சம் கொஞ்சமாக நோய்க்கு தன்னை தின்னக்கொடுத்ததன் காரணமாக, மழையில் நனைந்த கோழிக்குஞ்சு போலானது உடம்பு, விடாமல் படிக்க நினைத்தாலும் உடல் ஒத்துழைக்காததால் பள்ளிப்படிப்பை நிறுத்திக்கொண்டார்.

மரணம் வரும்போது வரட்டும் அதுவரை வாழவேண்டும் அதுவும் பிறருக்காக வாழவேண்டும் என்ற முடிவெடுத்து வாழ்ந்து வாழ்க்கைதான் வானவன் மாதேவியை, எழுத்தாளர்கள் எஸ்ரா,ஜெயமோகன் முதல் இயக்குனர் கீதா இளங்கோவன் போன்றவர்கள் வரை திரும்பியும் விரும்பியும் பார்க்கவைத்தது.

உலக இலக்கியங்கள் அனைத்தையும் படித்தார், படைப்பாளிகளோடு உரையாடினார்,பிரபலங்களோடு உறவாடினார். இந்த தசை இறுக்க நோய் குறித்து ஊர் ஊராக போய் விழிப்புணர்வு பிரச்சாரம் செய்தார், உங்களால் பராமரிக்கமுடியவில்லையா?என் வீட்டில் கொண்டுவந்து விடுங்கள் அவர்களை சந்தோஷமாக பார்த்துக்கொள்கிறேன் என்று சொன்னது மட்டுமில்லாமல் செய்தும் காட்டினார்.

இந்த தசைஇறுக்க நோய்க்கு ஆளான பல ஏழைக்குழந்தைகள் இவரது ஆதவ் இல்லத்தில்தான் வளர்ந்துவந்தனர்.,மகிழ்ச்சியாக வளர்ந்தும் வருகின்றனர்.

இந்த நிலையில்தான் நான் அவரை சேலத்திற்கு போய் சந்தித்தேன்,மறக்கமுடியாத சந்திப்பு, விடைபெறும்வரை சிரித்துக்கொண்டேதான் இருந்தார்.

'..என்னால் எதையும் தன்னிச்சையாக செய்ய முடியாது, என்னை ஒருவர் தூக்கி உட்கார வைக்க வேண்டும், நடக்க முடியாது. நடந்தால் விழுந்து விடுவேன். விழுந்தால் எழ முடியாது,போன் பேச வேண்டும் என்றால் கூட யாராவது காதருகே போனை வைக்க வேண்டும். பேசிக் கொண்டிருக்கும் போது கழுத்து சாய்ந்து பின்பக்கமாக போய்விடும், உடம்பு என்னுடையதுதான் ஆனால் அதன் கட்டுபாடு என்னுடையதல்ல', என்று தனக்கான நோயின் தாக்கம் குறித்து கூட சிரித்துக்கொண்டே விவரித்தார்.

மேலும் பேசுகையில்,' இதெல்லாவற்றையும் விட எனக்கு வலியை தருவது இந்த நோய் குறித்த விழிப்புணர்வு இல்லாமல் நிறைய சின்ன சின்ன குழந்தைகள் எல்லாம் இதன் பாதிப்பிற்கு உள்ளாகிவருவதுதான்.இரண்டாவதாக இவர்களை பார்க்க முடியாமல் பராமரிக்க முடியாமல் ஏழை எளிய பெற்றோர்கள் படும் வேதனை'.இந்த இரண்டிற்கும் யாராவது தீர்வு காண்பார்களா என்று தேடுவதைவிட நாமே ஏன் தீர்வு காணக்கூடாது என்று முடிவு செய்து களத்தில் இறங்கினேன்.நண்பர்கள் நல்ல இதயம் உள்ளவர்கள் ஆதரவுடன் 'ஆதவ் அறக்கட்டளை' துவங்கினேன்.
இப்போது இந்த தசைசிதைவு நோய் பாதிக்கப்பட்டவர்களுக்கான இல்லம் நடத்திவருகிறேன்.இங்கு அவர்களுக்கு மருந்து மாத்திரைகளை விட அன்பும் ஆதரவும் தரப்படுகிறது, ஒத்த கருத்தோடு கூடியவர்களுடன் அவர்களால் பேசமுடிகிறது, தொலைந்து போன சிரிப்பை தேடிக்கண்டுபிடித்து தரமுடிகிறது , எப்போது சாவோம் என்ற மனநிலையில் இருந்து இன்னும் கொஞ்ச நாள்தான் வாழ்வோமே என்று நம்பிக்கை கீற்று வெளிப்படுகிறது

ஆரம்பத்திலேயே இந்த நோய் பற்றி தெரிந்து கொண்டால் சிகிச்சை எளிது என்பதால் ஊர் ஊராக போய் மருத்துவ முகாம் நடத்திவருகிறேன்.உங்களால் பார்க்க முடியாத பராமரிக்க முடியாதவர்களை என்னிடம் அனுப்புங்கள் என்று வரவழைத்து பார்த்து வருகிறேன்.
இந்த ஆதரவு இல்லத்தை மருத்துவ மனையாக மாற்ற வேண்டும் வெறும் மருத்துவமனையாக இல்லாமல் ஆராய்ச்சி மருத்துவமனையாக மாற்றவேண்டும். இந்த தசைச்சிதைவு நோய் வராமல் தடுக்கப்பட வேண்டும், வந்தவர்களை முற்றாக குணப்படுத்த வேண்டும்.

எனக்கு டாக்டர்கள் கொடுத்த கெடுவை தாண்டி வாழ்ந்து கொண்டு இருக்கிறேன். கிட்டத்தட்ட என் உடலின் எல்லா தசைகளுமே தன் செயல்பாடுகளை நிறுத்திக்கொண்டுவிட்டது , எப்போது வேண்டுமானாலும் இதயம் அதன் செயல்பாட்டை நிறுத்திக்கொள்ளலாம். ஆனால் அப்படி நிகழ்ந்துவிடக்கூடாது, தான் வாழணும் இந்த தசைசிதைவு நோய்க்கு ஒரு முடிவு காணும்வரை வாழ்ந்தே ஆகணும் என்ற உறுதி கொண்டுள்ளேன் என்று பேசினார்.
இவருடனான சந்திப்பை 'நான் வாழணும்,வாழ்ந்தே ஆகணும்' என்ற தலைப்பில் நமது நிஜக்கதை பகுதியில் பிரசுரம் செய்திருந்தேன்.

இரண்டொரு நாள் கழித்து மாதேவி தொடர்புகொண்டு, ரொம்ப சந்தோஷமாக இருக்கிறேன் , உலகில் இத்தனை நாடுகள் இருக்கிறது அங்கெல்லாம் நம் தமிழர்கள் இருக்கிறார்கள் அவர்கள் இதை படிக்கிறார்கள் என்பதை தெரிந்து கொண்டேன்,வெறும் ஆறுதல் வார்த்தையோடு நிறுத்திக்கொள்ளாமல் பலரும் பலவிதங்களில் உதவி வருகின்றனர், ரொம்ப நன்றி என்றார் உணர்ச்சிபெருக்கோடு.
பிறகு இல்லத்து குழந்தைகளோடு கவியரங்கள் நடத்தினோம், பாரதியார் விழாவில் கலந்து கொண்டோம், எங்க பசங்க வரைந்த படத்தை பாருங்க என்றெல்லாம் மின்னஞ்சல் மூலமாகவும் தொலைபேசி வழியாகவும் சந்தோஷங்களை பகிர்ந்து கொண்டுதான் இருந்தார்.

திடீரென உடல் நலமில்லாமல் இருக்கிறார் மூச்சுவிட சிரமப்படுகிறார் என்றார்கள் இப்போது எப்படி இருக்கிறார் என்று கேட்பதற்குள் இல்லை இப்போது வானவன் மாதேவி நம்மோடு இல்லை இறந்துவிட்டார் என்றார் அவரது சகோதரியும் அவரைப் போலவே தசைஇறக்க நோயால் பாதிக்கப்பட்டவரான இயலிசை வல்லபி.
வானவன் மாதேவியின் அன்பையும் ,அரவனைப்பையும் இழந்து தவிக்கும் ஆதவ் இல்ல குழந்தைகளுக்கு, உங்கள் ஆறுதலை பகிர்ந்து கொள்ள விரும்பினால் தொடர்பு கொள்ளுங்கள் இயலிசை வல்லபியை. எண்: 99763 99403.

-எல்.முருகராஜ்.
murugaraj@dinamalar.in

Advertisement

இதையும் தவறாமல் படிங்க ...



Advertisement

வாசகர் கருத்து (23)

  • புதியவை
  • பழையவை
  • அதிகம் விவாதிக்கப்பட்டவை
  • மிக மிக தரமானவை
  • மிக தரமானவை
  • தரமானவை
S ANBUSELVAN - AL JUBAIL,சவுதி அரேபியா
14-மார்-201717:35:29 IST Report Abuse
S ANBUSELVAN தன் துன்பத்திலும் மற்றவர்களுக்கு உதாரணமாக விளங்கிய இவரின் ஆத்மா சாந்தியடைய இறைவனை பிராத்திக்கிறேன்...... இவரை போன்றோரை ஊடகங்கள் வெளிப்படுத்தினால் நல்லது.
Rate this:
Share this comment
Cancel
muthu Rajendran - chennai,இந்தியா
13-மார்-201716:18:34 IST Report Abuse
muthu Rajendran ஒரு நோய் வந்தால் முதலில் தானாக மருத்துவமும் அது சரிவாராவிட்டால் பின் மருத்துவரிடம் சென்று பார்த்துக்கொள்பவன் இயல்பான மனிதன்.ஒரு நோய் அதுவும் கொடூரமான நோயாக இருந்து அதை சவாலாக எடுத்து தன்னை காத்துக்கொண்டு மற்றவர்களையும் காப்பாற்ற துடிப்பவன் தான் சமுதாய விஞ்ஞானி எழுத்தாளர் சுந்தர ராமசாமி தனது இளவயதில் வந்த இதய நோயுடன் தன்னை சரியான முறையில் பராமரித்துக் கொண்டு 80 வயது வரை வாழ்ந்தார். யாம் பெற்ற துன்பம் யாருக்கும் வரக்கூடாது வந்தால் அவர்களை எப்படி காப்பது , தைரியப்படுத்திடுவது என்றெல்லாம் சிந்திக்க தன்னை மறந்த ஒரு ஞானியால் தான் முடியும். அபூரவமான நோய்கள் எத்தனை அபூர்வ மனிதர்களை உலகிற்கு காட்டுகிறது. அருகில் உள்ள வழிபாட்டு தலத்திற்கு போவதைவிட அருகில் உள்ள மருத்துவ மனைக்கு போவோம். அங்குள்ள விருந்தினர் இல்லாத நோயாளிக்கு நான்கு பழங்களை தருவோம்.கொஞ்ச நேரம் தைரியம் ஊட்டும் வார்த்தைகளை சொல்வோம் .இது தான் இந்த வாழ்க்கை தரும் பாடம்
Rate this:
Share this comment
Cancel
subhashini - chennai,இந்தியா
20-பிப்-201706:25:47 IST Report Abuse
subhashini மனம் மிகவும் வேதனை படுகிறது.அவர் ஆன்மா சாந்தி அடைய இறைவனை வேண்டுகிறேன் இவரை பற்றி பார்த்து படித்து தெரிந்து கொண்ட போது இவ்வளவு நல்ல தமிழ் பெயர் . இவ்வளவு அழகாக சிரிக்கிறார் இவருக்கு இவ்வளவு துன்பம் இருந்தாலும் மூலையில் முடங்காமல் தன்னை போன்ற பிறருக்கு நம்பிக்கை ஒளி கொடுக்கிறார் எத்தகைய அற்புதமானவர் என்று மிகவும் வியந்து பாராட்டினேன் இப்போது மனம் கண்கள் இரண்டுமே அழுகிறது
Rate this:
Share this comment
Cancel
பெரிய ராசு - Baton Rouge,யூ.எஸ்.ஏ
17-பிப்-201719:32:22 IST Report Abuse
பெரிய ராசு மிகவும் தன்னம்பிக்கையோடு வாழ்ந்த மனிதர் என்னுடைய ஆராய்ச்சி மாணவர்களை தன பேச்சால் செயலால் ஈர்த்தவர், அன்னாரின் ஆன்மா சாந்தி அடைய இறைவனை இறைஞ்சுகிறேன்
Rate this:
Share this comment
Cancel
s.kirubakaran - st.gallen,சுவிட்சர்லாந்து
17-பிப்-201703:29:40 IST Report Abuse
s.kirubakaran No words
Rate this:
Share this comment
Cancel
kannagi - chennai,இந்தியா
16-பிப்-201707:09:01 IST Report Abuse
kannagi மனசு கனக்கிறது...
Rate this:
Share this comment
Cancel
S Rama(samy)murthy - karaikudi,இந்தியா
12-பிப்-201714:02:43 IST Report Abuse
S Rama(samy)murthy ஆண்டவனே ஏன் இந்த சோதனை ? , மனம் கனக்கிறது .சுப ராம காரைக்குடி
Rate this:
Share this comment
Cancel
skv - Bangalore,இந்தியா
03-பிப்-201710:20:19 IST Report Abuse
skv<srinivasankrishnaveni> R I P மிகவும் கொடூரமான நோய் இது, அவருடைய செயல்கள் படிச்சுருக்கேன், ஆன்மா சாந்திக்கு இறைவனை வேண்டுகிறேன்
Rate this:
Share this comment
Cancel
venkatesan - chennai,இந்தியா
02-பிப்-201706:25:16 IST Report Abuse
venkatesan மிகவும் மனவலிமை நிறைந்த பெண்மணி. பின்னடைவிலும்சாதித்தவராக தெரிகிறார். ஆன்மா சாந்தி அடைய பிரார்தனை செய்கிறேன்.
Rate this:
Share this comment
Cancel
Thiyagarajan Srimbhs - Coimbatore,இந்தியா
02-பிப்-201705:35:03 IST Report Abuse
Thiyagarajan Srimbhs என்ன சோதனை.இறைவன் நல்லவனா கெட்டவன. உயர்ந்தமனிதர் நெப்போலியன் இந்த நோய்க்கு மருத்துவம் பார்க்கிறாரே.தினமலரில்நான் படித்தேன்
Rate this:
Share this comment
Cancel

உங்கள் கருத்தைப் பதிவு செய்ய

(Press Ctrl+g or click this   to toggle between English and Tamil)
Login :
New to Dinamalar ?
கருத்து விதிமுறை