"எந்த கலையும் அழிந்து விடக்கூடாது'| Dinamalar

பொது செய்தி

தமிழ்நாடு

"எந்த கலையும் அழிந்து விடக்கூடாது'

Added : செப் 17, 2017
Advertisement
 
 
Advertisement
 
 
 
Advertisement

திருப்பூர் ஊத்துக்குளி ரோடு, ஒற்றைக்கண் பாலம் எதிரில், சுட்டெரிக்கும் வெயிலையும் பொருட்படுத்தாமல், சுவரில், கட்சி விளம்பரத்தை எழுதி கொண்டிருந்தார் அந்த முதியவர். கோடுகளாக வார்த்தைகளை எழுதி, பின் எழுத்துகளுக்கு வண்ணம்பூசி, தனது எழுத்தாற்றலை வெளிப்படுத்திய அவரிடம் பேசினோம்.
என் பேரு கண்ணுசாமி; வயசு 61 ஆகிறது. திருப்பூர் மெஷின் வீதியில குடியிருக்கேன். எஸ்.எஸ்.எல்.சி., வரைக்கும் படிச்சிருக்கேன். ஸ்கூல்ல படிக்கும் போதே, ஓவியம் வரையறதுல ரொம்ப ஆர்வம். அப்படியே இந்த தொழிலுக்கு, வந்துட்டேன்.
முப்பது வருஷமா, இதில் இருக்கேன்; திருப்பூரு மட்டுமில்லாமல், தமிழ்நாடு பூரா, எல்லா ஊருக்கும் போய் எழுதி இருக்கேன். எலக்ஷன் டைம்ல, நிறைய பேர் கட்சி விளம்பரம் எழுத கூப்புடுவாங்க, மத்த சமயத்துல எல்லா நாளிலே யும் வேலை இருக்காது.
ஆரம்பத்துல, ரீப்பர் கட்டையில, தகர போர்டுல, பெயிண்டுல எழுதி வைப்போம். அரசியல்
கட்சிகள், கடைகள் எல்லாருமே, அந்த மாதிரிதான் வைப்பாங்க, நாலைஞ்சு வருஷம் ஆனாலும், போர்டு ஜம்முன்னு இருக்கும், மழை, வெயிலுக்கு எல்லாம் அவ்வளவு சீக்கிரத்துல அழிஞ்சு போயிடாது.
பிளக்ஸ் பேனர் வந்ததுக்கு அப்புறம், அந்த மாதிரி யாரும் தகர போர்டு வைக்கறதும் இல்லே, எங்களை மாதிரியான தொழிலாளர்களுக்கு வேலையும் இல்லாம போயிடுச்சு. நாங்கள் எல்லாம், கைத்திறமையால தான் அந்த மாதிரி எழுதறோம். வரையறோம்.
எப்படியும், வாரத்துல அஞ்சு நாள் வேலை இருக்குது. சுவரோரத்துல சாக்கடை கால்வாய் இருந்தால், நின்னு எழுதறதுக்கு ரொம்ப சிரமமாக இருக்கும். பெரிய கால்வாயா இருந்துட்டா, ரெண்டு காலையும் ரெண்டு பக்கமும் வெச்சுகிட்டு எழுதறதுக்கு ரொம்ப கஷ்டமா இருக்கும். சுவர் நனையற அளவுக்கு மழை பெய்யும் போது எழுத முடியாது. அனுமதியில்லாத சுவர்ல, எதுவும் எழுதறது இல்லே. எழுதும்போது, யாராவது வேண்டாமுன்னு சொன்னாலும் எழுதாம அப்படியே விட்டுட்டு போயிடுவோம்.
தொடர்ந்து வேலை செஞ்சுகிட்டே இருக்கறதால, வயசான பாதிப்பு எதுவும் தெரியலை.
எல்லாமே கம்ப்யூட்டர் மயமா மாறிப்போச்சு; இந்த பெயின்டிங், கலர்ஸ்ல எழுதற கலை கூட முன்னே மாதிரி இல்லே; எந்த கலையும் அழிந்து விடக்கூடாது, என்றபடி, சுவர் பக்கமாய் திரும்பி நின்று, தனது எழுத்து பணியை தொடர்கிறார் கண்ணுசாமி.
ரோட்டில் செல்லும் போது, "தலைவர் அழைக்கிறார், மாநில மாநாடு' என்றெல்லாம், எழுதபட்டிருப்பதை பார்த்து செல்வோம். தமிழை மறந்து கொண்டிருக்கும் நிலையில், சாமானியர்களான, சுவர் விளம்பர எழுத்தாளர்களும் பாராட்டுக்குரியவர்களே.

Advertisement

இதையும் தவறாமல் படிங்க ...



Advertisement

வாசகர் கருத்து

முதல் நபராக கருத்து தெரிவியுங்கள்!

உங்கள் கருத்தைப் பதிவு செய்ய

(Press Ctrl+g or click this   to toggle between English and Tamil)
Login :
New to Dinamalar ?
கருத்து விதிமுறை