Dinamalar

இலங்கை அரசை கண்டித்து அமெரிக்கா கொண்டு வரும் தீர்மானத்தை, மத்திய அரசு ஆதரிக்க வலியுறுத்தி, தமிழகம் முழுவதும், "டெசோ' அமைப்பின் சார்பில், "பந்த்' போராட்டம் நேற்று நடந்தது. இதில், சாலை மறியலில் ஈடுபட்ட, தி.மு.க., பொருளாளர் ஸ்டாலின் உட்பட, தமிழகம் முழுவதும் ஆயிரக்கணக்கானோர் கைது செய்யப்பட்டுள்ளனர். எனினும், பொதுமக்களின் இயல்பு வாழ்க்கை பாதிக்கப்பட வில்லை. ரயில்கள், பஸ்கள், ஆட்டோக்கள் வழக்கம் போல் ஓடின; பெரும்பான்மையான கடைகள் திறந்திருந்தன.

"டெசோ' அமைப்பின் சார்பில், நேற்று தமிழகம் முழுவதும் காலை, 6:00 மணி முதல், மாலை, 6:00 மணி வரை, "பந்த்' போராட்டம் நடந்தது.இந்த போராட்டத்திற்கு கட்சி சார்பற்ற முறையில் அனைத்துத் தரப்பினரும், குறிப்பாக தொழிலாளர்கள், அரசு அலுவலர்கள், வியாபாரிகள், மாணவர்கள், தமிழ் ஆர்வலர்கள் ஆதரவு அளிக்க வேண்டும் என, தி.மு.க., தலைவர் கருணாநிதி கோரிக்கை விடுத்தார். ஆனால், "பந்த்' பேராட்டத்தை பற்றி பொதுமக்கள் கண்டு கொள்ளாமல், வழக்கம் போல, தங்களது இயல்பு வாழ்க்கையில் ஈடுபட்டனர்.

தமிழகம் முழுவதும் ரயில்கள், அரசு போக்குவரத்து பஸ்கள், ஆட்டோக்கள் அனைத்தும் வழக்கம் போல ஓடின. அரசு அலுவலர்கள், மாணவ, மாணவியர், பொதுமக்களின் இயல்பு வாழ்க்கை பாதிக்கவில்லை. சென்னையின் முக்கிய வர்த்தகப் பகுதியான, தி.நகர், பாண்டிபஜார், பாரிமுனை, பெரம்பூர், புரசைவாக்கம் போன்ற பகுதியில் உள்ள வர்த்தக நிறுவனங்கள் திறந்து வைக்கப்பட்டிருந்தன.

விடுதலை:

தேனாம்பேட்டை சிக்னல் அருகில், தி.மு.க., பொருளாளர் ஸ்டாலின் தலைமையில் தி.மு.க., வினர் திரண்டு, சாலை மறியலில் ஈடுபட்டனர். ஸ்டாலின் உட்பட ஏராளமானோர் கைது செய்யப்பட்டு, பாரதிதாசன் சாலையில் உள்ள சமூக நலக் கூடத்திற்கு கொண்டு செல்லப்பட்டனர்.தேனாம்பேட்டை நடுரோட்டில் மறியல் போராட்டம் நடத்தியதால், அப்பகுதியில், 45 நிமிடங்கள் போக்குவரத்து பாதிப்பு ஏற்பட்டது. இதனால், பஸ்சுக்குள் காத்திருந்த பயணிகள் எரிச்சல் அடைந்து, கடும் அதிருப்தி அடைந்தனர். சைதாப்பேட்டை, அண்ணாசாலை உட்பட, 66 இடங்களில், தி.மு.க., வினர் சாலை மறியிலில் ஈடுபட்டனர். அதில், 404 பெண்கள் உட்பட, 5,709 பேர் கைது செய்யப்பட்டனர். அவர்கள் அனைவரையும் சமூக நலக்கூடம், திருமணமண்டபம் போன்ற இடங்களில் அமர வைக்கப்பட்டு, மாலையில் விடுதலை செய்யப்பட்டனர்.

ஸ்டாலின் கூறியதாவது: இலங்கை அரசை கண்டிக்கும் வகையிலும், இலங்கைக்கு எதிரான தீர்மானத்தை மத்திய அரசு ஆதரிக்க வலியுறுத்தியும், "டெசோ' அமைப்பின் சார்பில், "பந்த்' போராட்டம் அறிவிக்கப்பட்டது. இந்த போராட்டம், 95 சதவீதம் வெற்றி பெற்றுள்ளது. ஆனால், ஆளும் கட்சி போராட்டத்தை அடக்கி ஒடுக்க நினைத்தது. அதையும் மீறி போராட்டம் வெற்றி பெற்றுள்ளது.இவ்வாறு ஸ்டாலின் கூறினார்.

சென்னை உட்பட, மாநிலத்தின் அனைத்து மாவட்ட பகுதிகளிலும் நேற்று பேருந்துகள், ஆட்டோக்கள் வழக்கம் போல் ஓடின. சென்னையை பொறுத்தவரை, சென்ட்ரல், பாரிமுனை, அண்ணாசாலை, கோயம்பேடு உள்ளிட்ட அனைத்து பகுதிகளிலும் பேருந்துகள், ஆட்டோக்கள் வழக்கமான அளவில் இயங்குவதை காண முடிந்தது.மற்ற மாவட்டங்களில் அரசு பேருந்துகள் அனைத்தும் வழக்கம் போல் இயக்கப்பட்டன. திருச்சி உட்பட சில பகுதிகளில், பாதுகாப்பு கருதி சில தனியார் பேருந்துகள் இயக்கப்படவில்லை. இதே போல, கடைகள் மட்டும் ஓரளவு அடைக்கப்பட்டு இருந்தன. போக்குவரத்து பாதிப்பு இல்லாததால், பொதுமக்களின் இயல்பு வாழ்க்கை பாதிக்கவில்லை.சேலம் ரயில்வே ஜங்ஷனில், கோவை எக்ஸ்பிரஸ் ரயில் முன் மறியலில் ஈடுபட முயன்ற, சேலம் மாவட்ட, தி.மு.க., பொறுப்பாளர் சிவலிங்கம் உட்பட முக்கிய நிர்வாகிகள் கைது செய்யப்பட்டனர்.

கடலூர் மாவட்டத்தில், திட்டக்குடி பேரூராட்சியைத் தவிர்த்த பிற பகுதிகளில் வர்த்தக நிறுவனங்கள் மூடப்பட்டிருந்தன. காலை, 10:00 மணிக்கு பிறகே கிராமப் பகுதிகளுக்கு பஸ்கள் இயக்கப்பட்டதால், மாணவர்கள் தேர்விற்குச் செல்ல சிரமத்திற்கு உள்ளாகினர். 20 இடங்களில் சாலை மறியலில் ஈடுபட்ட, டெசோ அமைப்பினர், 2,315 பேர் கைது செய்யப்பட்டனர்.விழுப்புரம் மாவட்டத்தில் கடைகள் அடைக்கப்பட்டிருந்தன. பஸ்கள் இயங்கியதால் இயல்பு வாழ்க்கை பாதிக்கவில்லை. மறியல் செய்ய முயன்ற முன்னாள் அமைச்சர் பொன்முடி உள்ளிட்ட, 130 பேரை போலீசார் கைது செய்தனர்.

மத்திய அரசு தெளிவான முடிவை அறிவிக்க வேண்டும்: கருணாநிதி : "பந்த்' போராட்டத்தின் வெற்றிக்கு பின், மத்திய அரசு, இலங்கை தமிழர்கள் பிரச்னையிலே, உரிய அக்கறை செலுத்தி, தெளிவான முடிவை மேற்கொள்ள முன் வர வேண்டும்' என, தி.மு.க., தலைவர் கருணாநிதி கூறியுள்ளார்.அவரது அறிக்கை:"டெசோ' சார்பில் நேற்று நடந்த, "பந்த்' போராட்டத்தை, மிகக் பெரிய வெற்றியாக ஆக்கித் தந்துள்ளனர். ஒவ்வொரு மாவட்டத்திலிருந்தும் மாவட்டச்செயலர்கள் என்னை தொடர்பு கொண்டு, "முழு வெற்றி என்றும், மிகப்பெரிய வெற்றி' என்றும் கூறினர்.தமிழகம் முழுவதும் 50 ஆயிரத்திற்கு மேற்பட்டோர் கைது செய்யப்பட்டுள்ளனர். இந்தப் பெரிய வெற்றிகரமான போராட்டத்திற்கு பின், மத்திய அரசு, இலங்கை தமிழர்கள் பிரச்னையிலே, உரிய அக்கறை செலுத்தி, தெளிவான முடிவை மேற்கொள்ள முன் வர வேண்டும்.இவ்வாறு கருணாநிதி கூறியுள்ளார்.

-நமது நிருபர்-