Dinamalar

புதுடில்லி: மத்திய அமைச்சரவையிலிருந்து விலகுவதாக நேற்று தி.மு.க., அறிவித்தது.
இதனையடுத்து தி.மு.க., அமைச்சர்கள் தங்களது ராஜினாமா கடிதங்களை பிரதமர் மன்மோகன் சிங்கிடம் கொடுப்பார்கள் என அறிவிக்கப்பட்டது. இந்நிலையில் தி.மு.க., அமைச்சர்கள் இரு குழுக்களாக பிரிந்து சென்று ராஜினாமா கடிதம் கொடுத்துள்ளனர்.முதலில் பிரதமர் மன்மோகன் சிங்கை சந்தித்த காந்தி செல்வன், ஜெகத்ரட்சகன், பழநி மாணிக்கம் ஆகியோர் முதலில் ராஜினாமா கடிதங்களை கொடுத்தனர். அவர்களுடன் அழகிரியும் நெப்போலியனும் உடன் செல்லாமல், பின்னர் தனியாக மதியம் 1.30 மணிக்கு மேல் சென்று பிரதமரிடம் ராஜினாமா கடிதங்களை கொடுத்தனர். இதனால் பரபரப்பு ஏற்பட்டது.

சிதம்பரம் பேட்டி:

தி.மு.க., தன் நிலையை ஏன் மாற்றிக் கொண்டது எனத் தெரியவில்லை என்று சிதம்பரம் ‌தெரிவித்தார். இன்று காலை மத்திய அமைச்சர்கள் சிதம்பரம், கமல்நாத் மற்றும் மணீஷ் திவாரி ஆகியோர் இலங்கை பிரச்னை குறித்து நிருபர்களைச் சந்தித்தனர். இதில் சி‌தம்பரம் பேசுகையில், இல்ஙகை பிரச்னை தொடர்பாக ஐ.நா., மனித உரிமை கவுன்சிலில் அமெரிக்கா கொண்டு வரும் தீர்மானத்தில், இந்தியா உரிய திருத்தத்தைக் கொண்டு வர வேண்டும் என்று தி.மு.க., தலைவர் கருணாநிதி, பிரதமருக்கு கடிதம் எழுதியிருந்தார். இதைத் தொடர்ந்து நானும் மத்திய அமைச்சர்கள் அந்தோணி, குலாம் நபி ஆசாத் ஆகியோர் 18ம் தேதி இரவு, கருணாநிதியைச் சந்தித்தோம். அன்று இரவே டில்லி திரும்பிய நாங்கள் பிரதமரைச் சந்தித்து, கருணாநிதியின் கருத்துக்களை விளக்கினோம்.

திடீர் மாற்றங்கள்:

மறுநாள் காலை ஐ.மு.கூட்டணியிலிருந்து விலகுவதாக கருணாநிதி அறிவித்தார். மேலும் பார்லிமென்டில் இலங்கை பிரச்னை குறித்து தீர்மானம் கொண்டு வரப்பட்டால், தனது நிலையை மறுபரிசீலனை செய்வதாகவும் தெரிவித்தார். ஒரு இரவுக்குள் தி.மு.க., ஏன் தங்கள் நிலையை மாற்றிக்கொண்டது எனத் தெரியவில்‌‌லை.
19ம் தேதி இதர கட்சிகளுடன் கமல்நாத், இலங்கை பிரச்னை குறித்து ஆலோசனை நடத்தினார். அதன் முடிவுகள் இன்று மாலை தெரியவரும். இந்த நிலையில் நேற்று இரவு ஜனாதிபதியை தி.மு.க., எம்பி.,கள் சந்தித்து, ஐ.மு.கூட்டணிக்கான ஆதரவை விலக்கிக் கொள்வதாக கடிதம் கொடுத்துள்ளனர். 19ம் தேதி காலையில் மறு பரிசீலனைக்கு தயார் என்று தெரிவித்த தி.மு.க., இரவுக்குள் மீண்டும் தன் முடிவை மாற்றிக் கொண்டதேன் எனத் தெரியவில்லை.
இந்த பிரச்னை குறித்து தமிழக முதல்வர் ஜெயலலிதாவும் பிரதமருக்கு கடிதம் எழுதியுள்ளார். அது குறித்தும் பரிசீலித்து வருகிறோம்.

ஐ.நா.,வில் உள்ள இந்திய நிரந்தர பிரதிநிதி தற்போது டில்லியில் இருக்கிறார். இந்தியா கொண்டு வர இருக்கும் திருத்தம் குறித்து பிரதமர் அவருடன் ஆலோசித்து வருகிறார். இலங்கைக்கு எதிரான தீர்மானத்தில் நிச்சயம் உரிய திருத்தம் கொண்டு வரப்படும். இவ்வாறு சிதம்பரம் கூறினார்.

தமிழர் உணர்விற்கு மதிப்பு: தமிழர்களின் உணர்வுகளுக்கு மதிப்பளிக்கப்படும் எனவும், தமிழகம் முழுவதும் நடைபெற்று வரும் போராட்டங்கள் 8 கோடி தமிழர்களின் உணர்வுகள் சம்பந்தப்பட்ட பிரச்னை எனவும் தெரிவித்துள்ளார். இது திமுகவின் நிலை குறித்த பிரச்னை அல்ல எனவும் தமிழர்களின் உணர்வு சார்ந்த பிரச்னை எனவும் அவர் தெரிவித்துள்ளார். தமிழர் உரிமைகளுக்காக குறித்து மத்திய அரசு எப்போது நடவடிக்கை எடுத்து வருகிறது எனவும் சிதம்பரம் தெரிவித்துள்ளார்.

2009ம் ஆண்டு கருணாநிதி தமிழக முதல்வராக இருந்த போது மத்திய அரசுடன் இலங்கை பிரச்னை குறித்து ஆலோசனை நடத்தாமல் தற்போது மத்திய அரசுக்கு நெருக்கடி கொடுப்பதற்காக கூட்டணியில் இருந்து விலகி இருப்பது ஏன் என கேட்கப்பட்ட கேள்விக்கு பதிலளித்த சிதம்பரம், திமுக நிலைப்பாடு மற்றும் செயல்பாடு குறித்து கருத்து கூற முடியாது எனவும், அது குறித்து கூற தான் விரும்பவில்லை எனவும் சிதம்பரம் தெரிவித்துள்ளார். மேலும் இலங்கை தமிழர் விவகாரம் குறித்து தமிழக முதல்வர் ஜெயலலிதா பிரதமர் மன்மோகன் சிங்கிற்கு கடிதம் அனுப்பி உள்ளார். அந்த கடிதத்தில் குறிப்பிடப்பட்ட கோரிக்கைகளை கருத்தில் கொண்டு திருத்தங்களுடனான தீர்மானத்தை வரைந்து வருகிறோம் எனவும் அவர் தெரிவித்துள்ளார்.

அரசு பெரும்பான்மையுடன் உள்ளது:

பத்திரிகையாளர்களை சந்தித்த பார்லிமென்ட் விவகாரத்துறைஅமைச்சர் கமல்நாத், பார்லிமென்டில் தீர்மானம் கொண்டு வருவது பற்றி ஆலோசனை நடத்தப்பட்டு வருகிறது. அரசியல் கட்சிகளுடன் ஆலோசனை தொடரும், போதிய பெரும்பான்மையுடன் அரசு உள்ளது. தீர்மானம் அம்சம் பற்றி கட்சிகளிடையே கருத்து வேறுபாடு என கூறினார்.

இக்கட்டான நிலை:

இலங்கை பிரச்னை தொடர்பாக பார்லிமென்டில் கடுமையான தீர்மானம் கொண்டு வர வேண்டும் என்று வற்புறுத்தி, கூட்டணியிலிருந்து தி.மு.க., விலகி உள்ளது, மத்திய அரசுக்கு தர்மசங்கடமான நிலையை உருவாக்கி உள்ளது.

இலங்கைக்கு எதிராக ஐ.நா., மனித உரிமை கவுன்சிலில் அமெரிக்கா கொண்டு வர இருக்கும் தீர்மானத்தில், இந்தியா கடுமையான திருத்தங்களைக் கொண்டு வர வேண்டும் என்று வற்புறுத்தி, ஐ.மு.கூட்டணியிலிருந்து தி.மு.க., விலகி உள்ளது. இது தொடர்பாக பார்லிமென்டிலும் தீர்மானம் நிறைவேற்ற வேண்டும் என்று தி.மு.க., கூறியுள்ளது. மேலும் இலங்கையில் நடந்துள்ள இனப்படுகொலை குறித்து சர்வதேச விசாரணை நடத்த வேண்டும் என்று தமிழகம் முழுவதும் மாணவர்கள் போராட்டம் நடத்தி வருகின்றனர். தி.மு.க.வும் இந்திய தீர்மானத்தில் இனப்படுகொலை என்ற வார்த்தையைச் சேர்க்க வேண்டும் என்று கூறியுள்ளது.

இது குறித்து காங்கிரஸ் தீவிர ஆலோசனை நடத்தி வருகிறது. தி.முக., விலகலால் மத்திய அரசுக்கு உடனடியாக ஆபத்து ஏதும் இல்லையென்றாலும், விரைவில் தேர்தல் வர இருப்பதால், இலங்கை பிரச்னையில் மத்திய அரசு அலட்சியம் காட்டுவதாக மக்கள் நினைத்து விடக் கூடாதே என்று காங்கிரஸ் கருதுகிறது. அதே நேரத்தில், இலங்கைக்கு எதிராக கடுமையான வாசகம் கொண்ட தீர்மானத்தை பார்லிமென்டில் நிறைவேற்றினால், எதிர் காலத்தில் காஷ்மீர், மணிப்பூர் போன்ற விவகராங்களில இதர நாடுகள் இத்தகைய தீர்மானம் இயற்ற வழி வகுத்துவிடுமோ, ஒரு மோசமான முன்னுதாரணம் ஆகிவிடுமோ என்ற அச்சமும் மத்திய அரசுக்கு உள்ளது. இருப்பினும் இன்று இது தொடர்பாக ஒரு முடிவு எடுக்கப்படும் என்று எதிர்பார்க்கப்படுகிறது.

ஜெயலலிதாவிற்கு பயந்து:

தமிழக முதல்வர் ஜெயலலிதாவிற்கு பயந்து தான் திமுக தலைவர் கருணாநிதி, காங்கிரஸ் தலைமையிலான ஐக்கிய முற்போக்கு கூட்டணியில் இருந்து விலகினார் என ஜனதா கட்சி தலைவர் சுப்ரமணிய சாமி தெரிவித்துள்ளார். தி.மு.க., விலகல் குறித்து ஜனதா கட்சித் தலைவர் சுப்ரமணிய சாமி கூறுகையில், தமிழக முதல்வர் ஜெயலலிதாவிற்கு பயந்தும், இலங்கை தமிழர் விவகாரத்தில் ஜெயலலிதாவின் நடவடிக்கைகளுக்கு பின்னால் இருக்க விரும்பாமலும் தான் கருணாநிதி மத்திய அரசின் கூட்டணியில் இருந்து விலகி உள்ளார்; இந்த அறிவிப்பு எனக்கு எவ்வித ஆச்சரியத்தையும் தரவில்லை; ஏனெனில் இவை அனைத்தும் திமுக தலைவர் கருணாநிதி நடத்தும் நாடகங்கள்; உண்மையிலேயே அவர்கள் கூட்டணியில் இருந்து விலகுவதாகவும், பதவிகளை ராஜினாமா செய்வதாகவும் இருந்தால் முதலில் ஜனாதிபதிக்கு தான் அது குறித்து கடிதம் அனுப்பி இருக்க வேண்டும்; நாளையோ அல்லது இன்னும் ஒரு மாதத்திற்கு பிறகோ காங்கிரஸ் கூட்டணியில் மீண்டும் இணைவதாக கருணாநிதி அறிவிப்பார்; இவை அனைத்து அர்த்தமற்ற பேச்சுக்கள். இவ்வாறு சுப்ரமணியசாமி தெரிவித்துள்ளார்.

மைனாரிட்டி அரசு ஆகவில்லை:

மத்திய அமைச்சரவையில் இருந்து திமுக விலகியதால் மத்திய அரசு மைனாரிட்டி அரசு ஆகிவிடவில்லை என பகுஜன் சமாஜ் கட்சி தலைவர் மாயாவதி தெரிவித்துள்ளார். அவர் கூறியதாவது : மதசார்பற்ற கட்சிகள் மத்தியில் ஆட்சி அமைப்பதை நாங்கள் விரும்பவில்லை; பகுஜன் சமாஜ் கட்சி எப்போதும் ஆதரவை விலக்கிக் கொள்ளாது; எங்களுக்கு ஐக்கிய முற்போக்கு கூட்டணிக்கும் இடையே கருத்து வேறுபாடுகள் இருந்தாலும் வெளியில் இருந்து நாங்கள் தரும் ஆதரவு என்றும் தொடரும்; திமுக விலகியதால் மத்திய அரசு ஒன்றும் பெரும்பான்மையை இழந்து மைனாரிட்டி அரசு ஆகிவிடவில்லை; அதனால் லோக்சபா தேர்தல் குறித்த நெருக்கடியும் மத்திய அரசுக்கு இல்லை. இவ்வாறு அவர் தெரிவித்துள்ளார்.

ஊசலாடும் காங்., கூட்டணி அரசு :

ஐக்கிய முற்போக்கு கூட்டணியின் 2வது பெரிய கட்சியான திமுக தனது ஆதரவை விலக்கிக் கொண்டதை அடுத்து ஐக்கிய முற்போக்கு கூட்டணி தற்போது பார்லிமென்ட்டில் பெரும்பான்மையை இழந்து மைனாரிட்டி கட்சி ஆகி உள்ளது. இதனால் மாயாவதி தலைமையிலான பகுஜன் சமாஜ் கட்சி, முலாயம் சிங் தலைமையிலான சமாஜ்வாதி கட்சி உள்ளிட்ட பிராந்திய கட்சிகளின் கருணையை பெற்று மீண்டும் பெரும்பான்மையை நிரூபிக்க காங்கிரஸ் தலைமையிலான கூட்டணி அரசு போராடி வருகிறது. கூட்டணியில் இருந்து விலகுவதாக திமுக அறிவித்த சில நிமிடங்களிலேயே காங்கிரஸ் முக்கிய கூட்டத்தை கூட்டியது குறிப்பிடத்தக்கது.

தேர்தலுக்கு பா.ஜ., தயார் :

திமுக விலகியதை அடுத்து காங்கிரஸ் கூட்டணி மைரியாட்டி ஆகி விட்டதால் லோக்சபா தேர்தல் மிக விரைவிலேயே வரும் எனவும், தேர்தலை சந்திக்க பா.ஜ., எப்போதும் தயாராக இருப்பதாகவும் பா.ஜ., துணை தலைவர் முக்தர் அப்பாஸ் நஹ்வி தெரிவித்துள்ளார். நாட்டின் மீது அக்கறை அல்லாத காங்கிரஸ் ஆட்சிக்கு இதுபோன்ற பிரச்னைகள் வருவது எதிர்பார்த்த ஒன்று தான் எனவும் அவர் தெரிவித்துள்ளார். மேலும் ஐக்கிய முற்போக்கு கூட்டணியின் கவுண்டவுன் துவங்கி விட்டதாகவும், அது வீழும் காலம் வெகு ‌தொலைவில் இல்லை எனவும் பா.ஜ., தலைவர் ஆனந்த் குமார் தெரிவித்துள்ளார்.

திமுக.,வின் அரசியல் நாடகம் :

கூட்டணியில் இருந்து விலகுவதாக அறிவித்திருப்பது திமுக.,வின் அரசியல் நாடகம் என தமிழக முதல்வரும் அதிமுக பொதுச் செயலாளருமான ஜெயலலிதா தெரிவித்துள்ளார். இதே போன்று திமுக கூட்டணியில் இருந்து விலகாது எனவும், அரசை மிரட்டுவதற்காக திமுக செய்யும் தந்திர செயல் இது எனவும் சமாஜ்வாதி கட்சி தலைவர் ராம்கோபால் யாதவ் தெரிவித்துள்ளார்.