Dinamalar

சென்னை: வெளி நாட்டிலிருந்து இறக்குமதி செய்யப்பட்ட, சொகுசு கார்கள் தொடர்பாக, தி.மு.க., பொருளாளர் ஸ்டாலின், அவரது நண்பர் ராஜா சங்கர் ஆகிய இருவரின் வீடுகளில், சி.பி.ஐ., அதிகாரிகள், நேற்று அதிரடி சோதனை நடத்தினர். "இந்த சோதனை, பழி வாங்கும் அரசியல் நடவடிக்கை' என, தி.மு.க., தலைவர் கருணாநிதியும், "சட்டப்படி எதிர் கொள்வோம்' என, ஸ்டாலினும் தெரிவித்தனர்.

"ஹம்மர்' என்ற சொகுசுகார்கள் வெளிநாட்டிலிருந்து இறக்குமதி செய்யப்பட்டது தொடர்பாக, முக்கிய பிரமுகர்களின் வீடுகளில் நேற்று காலை அதிரடி சோதனையை சி.பி.ஐ., அதிகாரிகள் மேற்கொண்டனர்.

காலை 6:30 மணிக்கு...: சென்னை ஆழ்வார் பேட்டை, சித்தரஞ்சன் சாலையில் உள்ள தி.மு.க., பொருளாளர் ஸ்டாலின் வீட்டிற்கு, நேற்று காலை, 6:30 மணிக்கு, அம்பாசிடர் காரில், சி.பி.ஐ., அதிகாரிகள் நான்கு பேர் வந்தனர். அவர்கள் தங்களது அடையாள அட்டைகளை காட்டி, ஸ்டாலின் வீட்டிற்குள் சென்றனர். நடை பயிற்சிக்காக ஸ்டாலின், வெளியே சென்றிருந்தார். ஸ்டாலின் மனைவி துர்கா, அவரது மகன் உதயநிதி ஸ்டாலின் ஆகியோர் இருந்தனர். அவர்களிடம், சி.பி.ஐ., அதிகாரிகள், தங்களை அறிமுகப்படுத்திக் கொண்டதும், உள்ளே அனுமதிக்கப்பட்டனர். சொகுசுகார்கள் வாங்கியது தொடர்பான ஆவணங்களை கேட்டுள்ளனர்.

நீங்களே சொல்லிட்டீங்க...! அவர்கள் கேட்ட ஆவணங்களை, ஸ்டாலின் குடும்பத்தினர் எடுத்துக் கொடுத்துள்ளனர். அந்த ஆவணங்களை சி.பி.ஐ., அதிகாரிகள் சோதனையிட்டனர். காலை, 8:00 மணிக்கு, நடைப்பயிற்சியை முடித்து, ஸ்டாலின் வீட்டிற்கு வந்தார். அவருடன் முன்னாள் அமைச்சர் வேலு, முன்னாள் மேயர் மா.சுப்பிரமணியன் ஆகியோர் வந்தனர். தன் காரில் இருந்து, நடைப் பயிற்சி உடையுடன், ஸ்டாலின் இறங்கினார். அங்கு கூடியிருந்த நிருபர்களை, அவர் சந்தித்தார். "மத்திய அமைச்சரவையில்இருந்து, வாபஸ் பெற்ற மறுநாள் உங்கள் வீட்டில் சி.பி.ஐ., அதிகாரிகள் சோதனை நடத்தியது பழி வாங்கும் நடவடிக்கையாக கருதுகிறீர்களா?' என, நிருபர்கள் கேள்வி கேட்டனர். அதற்கு ஸ்டாலின், ""நிருபர்களே பதில் சொல்லி விட்டீர்கள். இந்த சோதனையை அரசியல் மிரட்டலாக, உருட்டலாக பார்க்கிறோம். சட்டப்படி எதிர்கொள்வோம். சி.பி.ஐ., அதிகாரிகள் எதற்காக வந்துள்ளனர் என்று எனக்கு தெரியாது. அவர்கள் வெளியே வரும் போது நீங்களே கேட்டுக் கொள்ளுங்கள்,'' எனக் கூறிவிட்டு, வீட்டிற்குள்ளே சென்று விட்டார். தங்களது சோதனையை முடித்த அதிகாரிகள், 8:10 மணிக்கு, வெளியே வந்தனர். அப்போது அவர்களிடம் நிருபர்கள், "ஸ்டாலின் வீட்டில், எதற்காக சோதனை நடத்தப்பட்டது?' எனக் கேட்டனர்.

சி.பி.ஐ., அதிகாரி ஒருவர், "வெளிநாட்டிலிருந்து கார்கள் இறக்குமதி செய்து, சில முக்கிய பிரமுகர்கள் வாங்கியுள்ளனர். அது குறித்து விசாரிக்க வந்தோம்' என்றார். முன்னாள் அமைச்சர் பொன்முடி கூறுகையில், "தமிழகம் முழுவதும், 32 கார்கள் இறக்குமதி செய்யப்பட்டுள்ளன. ஸ்டாலின் வீட்டில் கார் தொடர்பான விசார ணையை, ஒரு மாதத்திற்கு முன்னோ, பின்னோ நடத்தியிருக்கலாம். தற்போது அரசியல் பழிவாங்கும் நடவடிக்கை யாக சோதனை நடத்தப்பட்டுள்ளது' என்றார்.

இருக்கலாம் இல்லாமலும் இருக்கலாம்: மா.சுப்பிரமணியன் கூறுகையில், "அரசியல் மிரட்டலுக்கு நாங்கள் பயப்பட மாட்டோம். மக்கள் எங்கள் பக்கம் உள்ளனர்' என்றார். சென்னை தி.நகரில் உள்ள ஸ்டாலின் நண்பர் ராஜா சங்கர் வீட்டிலும், சொகுசு கார் தொடர்பாக, சி.பி.ஐ., அதிகாரிகள் சோதனை நடத்தினர். ஸ்டாலின் வீட்டிற்கு, அவர் சகோதரி செல்வி, முன்னாள் அமைச்சர்கள், எம்.எல்.ஏ.,க்கள் மற்றும் கட்சி தொண்டர்கள் பலர் குவிந்தனர். கட்சியினர் யாரையும், ஸ்டாலின் வீட்டிற்குள் அனுமதிக்கவில்லை. சி.பி.ஐ., அதிகாரிகள், தங்களது சோதனையை முடித்து விட்டு, அங்கிருந்து புறப்பட்டதும், ஸ்டாலினும் சட்டசபையில் பட்ஜெட் கூட்டத் தொடரில் பங்கேற்க, புறப்பட்டு சென்றார். அங்கு கூடியிருந்த, தொண்டர்கள் கூட்டமும் கலைந்தது.

இது குறித்து, தி.மு.க., தலைவர் கருணாநிதி அளித்த பேட்டி: "சோதனை நடந்தது தவறு' என, மத்திய அமைச்சர் சிதம்பரம் கருத்து வெளியிட்டுள்ளார். அவர் அப்படி சொல்லியிருக்கிற போது, "நான் நம்ப முடியாது' என, சொல்ல முடியாது. தி.மு.க.,வைச் சுற்றி அரசியல் காழ்ப்புணர்ச்சி காரணமான நடவடிக்கைகள் வந்து கொண்டு தான் இருக்கின்றன. அதில் இது, ஒன்றாக இருக்கலாம்; இல்லாமலும் இருக்கலாம்.

"பழிக்குப் பழி?' சோதனைப் பற்றி பல கட்சித் தலைவர்களும், எதிர்த்து கருத்து தெரிவித்துள்ளனர். அந்தக் கருத்துக்களுடன் நான் உடன்படுகிறேன். மத்திய அமைச்சர், இந்தச் சோதனைக்கு ஒப்புதல் தரவில்லை என்பதை, அவரே வெளிப்படையாக அறிக்கையின் மூலம் தெரிவித்திருக்கிறார். அதற்கு மேல் நான் எதுவும் சொல்வது முறையல்ல. பழி வாங்கும் அரசியல் டில்லியிலே மாத்திரமல்ல; தமிழகத்திலும் இருக்கிறது. இவ்வாறு கருணாநிதி கூறினார்.

காரின் மதிப்பு, 2.5 கோடி ரூபாய்: பிரபல கார் வியாபாரி ஜோசப் அலெக்ஸ், அமெரிக்காவில் இருந்து, "ஹம்மர்' வகையில், 32 கார்களை, இறக்குமதி செய்து, தமிழகம் முழுவதும் உள்ள, தனக்கு வேண்டிய முக்கிய புள்ளிகளுக்கு கொடுத்துள்ளார். அவற்றில், ஸ்டாலின் மகன், உதயநிதிக்கு வழங்கப்பட்ட, காரும் ஒன்று. ஒரு காரின் மதிப்பு, 2.5 கோடி ரூபாய். இது தொடர்பாக மத்திய வருவாய் புலனாய்வு துறையினர், முதலில்வழக்கு பதிந்தனர். இந்த வரி ஏய்ப்பில், வருவாய் புலனாய்வு அதிகாரிகளும் சம்மந்தம் இருப்பதாக தெரியவந்தது இதையடுத்து இந்த வழக்கு சி.பி.ஐ.,க்கு மாற்றப்பட்டது. டெல்லியை சேர்ந்த சி.பி.ஐ., அதிகாரிகள் ஆறுபேர், நேற்று ஸ்டாலின் வீட்டில் சோதனை நடத்தினர். வாகனத்தில் ஆர்.சி. புத்தகத்தை பார்த்தபோது, அது வேறு ஒருவரின் பெயரில் இருந்ததாகவும் கூறப்படுகிறது. இதையடுத்து, கார் தொடர்பான சில ஆவணங்களை, சி.பி.,ஐ., அதிகாரிகள் எடுத்துச் சென்றுள்ளனர். இதே போல், தமிழகம் முழுவதும், 32 இடங்களில் சோதனை நடைபெற்றுள்ளது.

முகவரி மாறிச்சென்ற அதிகாரிகள்: வரிஏய்ப்பு செய்து, 33 கார்களை இறக்குமதி செய்ததில், மத்திய அரசுக்கு, 48 கோடி ரூபாய் வருவாய் இழப்பு ஏற்பட்டுள்ளது. சென்னையில், 18 இடங்களில் நடந்த சோதனையில், 17 கார்கள் பறிமுதல் செய்யப்பட்டன. சென்னையில், 18 இடங்களில் சோதனை நடத்திய, சி.பி.ஐ., அதிகாரிகள், கோடம்பாக்கம் சர்க்குலர் ரோட்டில் உள்ள பிரவீண், 40, என்பவர் வீட்டுக்கு வந்தனர். பின்னர், முகவரி மாறி, தவறுதலாக வீட்டுக்கு வந்த, சி.பி.ஐ., அதிகாரிகள், வருத்தம் தெரிவித்து விட்டு அங்கிருந்து சென்றனர்.

இதுகுறித்து பிரவீண் கூறியதாவது: டில்லி ஜவகர்லால் நேரு பல்கலைக்கழகத்தில் படித்துவிட்டு, தற்போது சமூக சேவகராகவும், ஆன்மிகம் தொடர்பான புத்தகங்களை எழுதியும் வருகிறேன். முதலில் எனக்கு கார் ஓட்டத் தெரியாது. இதுதவிர, 2.5 கோடி ரூபாய்க்கு கார் வாங்கும் அளவுக்கு, என்னிடம் வசதியும் இல்லை. சி.பி.ஐ., முகவரி மாறி வந்து விட்டனர். தவறுதலாக வேறு இடத்துக்கு வந்த அவர்கள், பின்னர் இங்கிருந்து சென்று விட்டனர்.

"ஹம்மர்' காரின் அம்சங்கள்

நேற்று ஸ்டாலின் வீட்டில் சி.பி.ஐ., ரெய்டு நடந்தது. அவரது மகன் உதயநிதி வெளிநாட்டிலிருந்து இறக்குமதி செய்த "ஹம்மர்' ரக காரால் சர்ச்சை எழுந்தது. இதில் வரிஏய்ப்பு நடந்துள்ளதாக குற்றச்சாட்டு. அந்த ஹம்மர் ரக காரின் சிறப்பு அம்சங்கள். அமெரிக்காவின் ஜெனரல் மோட்டார்ஸ் நிறுவனத்தால், ராணுவ பயன்பாட்டுக்காக தயாரிக்கப்பட்டது ஹம்மர் ரக வாகனங்கள். பின் இந்நிறுவனத்தால் நவீன கார்களும் தயாரிக்கப்பட்டன. இந்திய கிரிக்கெட் பிரபலங்களான தோனி, ஹர்பஜன் சிங் ஆகியோர் ஹம்மர் கார் வைத்துள்ளனர். ஸ்போர்ட்ஸ் பயன்பாட்டுக்காகவே ஹம்மர் எச்3 கார் வடிவமைக்கப்பட்டுள்ளது. டீசல் மூலம் லிட்டருக்கு நான்கு கி.மீ., மட்டுமே ஓடும். இன்ஜின் திறன் 3,700 சி.சி., டிரைவருடன் சேர்த்து ஐந்து பேர் மட்டுமே பயணிக்க முடியும். இதன் எடை 2,134 கிலோ. டீசல் டேங்க் கொள்ளளவு 88 லிட்டர். சாட்டிலைட் போன், புளுடூத் தொடர்பு ஆகியவை இதன் சிறப்பம்சங்கள். ரேடியோ, டெலிபோன் ஆன்டனா தொலைதொடர்பு வசதிகள் உள்ளன. பின்னால் வரும் வாகனங்களை காண கேமரா வசதி உள்ளது. இதிலுள்ள வசதிகள் அனைத்தையும், ரிமோட் கன்ட்ரோல் மூலம் கட்டுப்படுத்தலாம். விபத்து நேர்ந்தால் பயணம் செய்பவருக்கு காயம் ஏற்படாத வண்ணம் பாதுகாப்பு அம்சங்கள் உள்ளன. வாகனத்துக்கும் சேதம் குறைவாகத்தான் இருக்கும்.