Special Articles | Special Reports | Special Interest News | News Comment | Science News | TV Shows news | General News

டீ கடை பெஞ்ச்

பதிவு செய்த நாள் : ஏப் 21, 2018
Advertisement
 டீ கடை பெஞ்ச்

வட்டி தொழிலுக்கு முட்டு கொடுக்கும் கல்லுாரி முதல்வர்!''மக்கள் வரிப் பணம் எப்படி எல்லாம் பாழா போவுது பார்த்தீயளா...'' என, அங்கலாய்த்தபடியே, பெஞ்சில் அமர்ந்தார் அண்ணாச்சி.''அரசாங்க தகவல் தானே... சீக்கிரம் சொல்லுங்க பா...'' என்றார் அன்வர்பாய்.''தமிழக நெடுஞ்சாலைத் துறையில, 42 கோட்ட அலுவலகங்கள், 200க்கும் மேற்பட்ட உட்கோட்ட அலுவலகங்கள் இருக்கு... ''சாலைகள், பாலங்கள் எல்லாம் தரமா போடுதாவளான்னு ஆய்வு பண்ண, நெடுஞ்சாலை துறையில, தனியா ஆராய்ச்சி பிரிவு இருக்கு வே...''தரத்தை ஆய்வு செய்ய, ஒவ்வொரு உட்கோட்ட அலுவலகங்களுக்கும், 25ல இருந்து, 50 லட்சம் ரூபாய் செலவுல, நவீன கருவிகளை, 2015ம் வருஷம் வாங்குனாவ... இதுக்கு மட்டும், மாநிலம் முழுக்க, 50 கோடி ரூபாய் செலவாச்சு வே...''ஆனா, எதையும் பயன்படுத்தாம, துாசு படிஞ்சு கெடக்கு... ஏன்னா, பராமரிப்பு பணிகளை பெரும்பாலும், தனியார் வசம் ஒப்படைச்சுட்டாவ... அதிகாரிகளும், சும்மா பேருக்கு ஆய்வு நடத்தி, சான்றிதழ் குடுத்துடுதாவ...''இந்த கருவிகளை, அரசு பொறியியல், பாலிடெக்னிக் கல்லுாரி மாணவர்கள் படிக்குறதுக்கு குடுத்தாலாவது, புண்ணியமா போவும் வே...'' என்றார் அண்ணாச்சி.''கரை வேட்டி புரோக்கர்கள் தொல்லை தாங்க முடியலைங்க...'' என்றார் அந்தோணிசாமி.''எங்க ஓய்...'' என்றார் குப்பண்ணா.''மின் வாரியத்துல, ஹெல்பர் முதல் உதவி பொறியாளர் வரை, இடமாற்றத்துக்கு, மதுரை மண்டல தலைமை பொறியாளர், கண்காணிப்பு பொறியாளர் அலுவலகங்களை, ஆளுங்கட்சி கரை வேட்டி புரோக்கர்கள் முற்றுகை இடுறாங்க...''இவங்க, அமைச்சர்கள், எம்.எல்.ஏ.,க்களின் சிபாரிசு கடிதங்களோட வர்றாங்க... இவங்க தர்றது, ஒரிஜினல் கடிதமா, போலியான்னு கூட தெரியாம, அதிகாரிகள் திணறி போயிடுறாங்க...''இதுக்கு இடையில, இந்த மாதிரி, புரோக்கர்களிடம் பணத்தை இழந்த பலரும், அதிகாரிகளிடம் தனியா புகார் குடுத்துட்டு, புலம்பிட்டு போறாங்க...'' என்றார் அந்தோணிசாமி.''வட்டி பணத்தை பிடிச்சிண்டு, சம்பளம் போடறார் ஓய்...'' என்றார் குப்பண்ணா.''யாருங்க அது...'' என்றார் அந்தோணிசாமி.''நீலகிரி மாவட்டம், கூடலுார் பாரதியார் கலை, அறிவியல் கல்லுாரி பேராசிரியர் ஒருத்தர், வட்டி தொழில் செய்யறார்... சக பேராசிரியர்கள், கல்லுாரி ஊழியர்களுக்கு, ஏழு லட்சம் ரூபாயை, கடனா குடுத்திருக்கார் ஓய்...''இதுல, சிலர் வட்டி பணம் குடுக்காம, 'கடுக்கா' குடுத்துண்டு இருந்தா... கல்லுாரிக்கு புதுசா முதல்வரா வந்தவர், வட்டி பேராசிரியரின் சொந்தக்காரர்... தான் ஆடாட்டியும் தசை ஆடுமோல்லியோ...''முதல்வர், கடன் வாங்கின எல்லாரையும் அழைச்சு பேச்சு நடத்தியிருக்கார்... மாசா மாசம், சம்பளம் போடறச்சே, வட்டி பணத்தை பிடிச்சுண்டு, மீதத்தை போடறதா, அவாள்ட்ட ஒப்புதல் வாங்கிட்டார் ஓய்...'' என்றார் குப்பண்ணா.''நம்ம, நல்லதம்பியும், பழனிசாமியும் ஜோடி போட்டு, எங்க கிளம்பிட்டாவ...'' என, அண்ணாச்சி கேட்க, அரட்டை திசை திரும்பியது.

Advertisement