இது உங்கள் இடம்: கறிவேப்பிலை ஆகப் போகிறதா காங்கிரஸ்! | Special Articles | Special Reports | Special Interest News | News Comment | Science News | TV Shows news | General News

'தமாசு'க்காக யாரும் அழப் போவதில்லை!

பதிவு செய்த நாள் : அக் 15, 2018 | கருத்துகள் (2)
Advertisement
 'தமாசு'க்காக யாரும் அழப் போவதில்லை!

ஆர்.ரபீந்த், பெங்களூரிலிருந்து எழுதுகிறார்: 'நன்றி மறப்பது நன்றன்று, நன்றல்லது அன்றே மறப்பது நன்று' என்ற திருவள்ளுவரின் குறள், 'காமெடி' நடிகர் கருணாஸ் போன்றோருக்கு கச்சிதமாக பொருந்துகிறது!'சுயேட்சையாக நின்றால் தோற்று விடுவோம்' எனக் கருதி, ஜெயலலிதாவை அணுகினார், கருணாஸ். அவரது இரட்டை வேடம் தெரியாத, ஜெயலலிதா, 'இரட்டை இலை சின்னத்தில் நின்றால், 'சீட்' தருகிறேன் என்றார். அவர் காலில் விழுந்து, சீட்டை பெற்ற, கருணாஸ், ராமநாதபுரம் மாவட்டம், திருவாடானை தொகுதியில், இரட்டை சிலை சின்னத்தில் போட்டியிட்டு வெற்றி பெற்றார்.ஜெயலலிதா மறைவுக்கு பின், ஆளும் கட்சிக்கு எதிராக அறிக்கைகளை விடுகிறார், 'காமெடி' நடிகர் கருணாஸ். இரட்டை இலை சின்னத்தில் வெற்றி பெற்ற, கருணாஸ், எப்படி, அரசையும், முதல்வரையும் விமர்சிக்க முடியும்?ஆட்சி பிடிக்கவில்லை என்றால், எம்.எல்.ஏ., பதவியை ராஜினாமா செய்து, தி.மு.க., அல்லது எதிர்க்கட்சியினருக்கு, 'ஜால்ரா' அடிக்கலாம்.சினிமாவில், 'லொடுக்கு பாண்டி' உள்ளிட்ட, சிரிப்பு வேடங்களில் நடித்த இவர், அரசியலில் எந்த சாதனையும் செய்யாதவர். இதுவரை, மக்கள் நல பிரச்னைகளுக்காக, போராடி இருப்பாரா... யாரோ சிலரால், ஜெயலலிதாவிடம் அடையாளம் காட்டப்பட்ட கருணாஸ், இன்று, மாபெரும் இயக்கமான, அ.தி.மு.க.,விற்கே சவால் விடுகிறார்.அவதுாறாக பேசிய கருணாசை சிறையில் அடைத்ததில் எந்த தவறும் இல்லை. அ.தி.மு.க.,வில் நின்று வெற்றி பெற்ற, 18 எம்.எல்.ஏ.,க்களை தகுதி நீக்கம் செய்தது போல், கருணாசையும் நீக்கலாம். கருணாஸ் விவகாரத்தில், தமிழக முதல்வர் பழனிசாமியும், சபாநாயகர் தனபாலும் உடனே முடிவு எடுக்க வேண்டும். கருணாசை பதவி நீக்கம் செய்வதால், தமிழர்கள் யாரும் அழப் போவதில்லை!----கணினி அறிவியல் படித்தோருக்கு உதவுங்கள்!தே.தினேஷ், செய்யூர், காஞ்சிபுரம் மாவட்டத்திலிருந்து எழுதுகிறார்: 'இளநிலை கணினி அறிவியல், முதுநிலை கணினி அறிவியலில், பி.எட்., பட்டம் எதற்கு பெற்றோம்' என்ற மிகப் பெரிய கேள்வி, ஒவ்வொரு, கணினி ஆசிரியர்களுக்கும் ஏற்பட்டுள்ளது. ஒரு துறைக்கான, பட்டப் படிப்பு இருக்கிறது என்றால், அதற்கு, தகுதியான வேலையும் இருக்க வேண்டும்; இது தான், நிதர்சனமான உண்மை. ஆனால், எதற்காக, இத்தனை ஆண்டுகளாக, கணினி அறிவியலில், பி.எட்., பட்டம் இருக்கிறது என்பது, புரியாத புதிராக இருக்கிறது.தமிழகம் முழுவதும், 54 ஆயிரம், பி.எட்., படித்த கணினி ஆசிரியர்கள், தனியார் பள்ளிகளில் கூட, வேலை கிடைக்காமல் தவித்து வருகின்றனர். ஆசிரியர் தகுதி தேர்வில், கணினி ஆசிரியர் பட்டம் பெற்றவர், பங்கேற்க அனுமதியில்லை. டி.ஆர்.பி., எனப்படும், முதுநிலை ஆசிரியர் பணி தேர்வுக்கான போட்டியிலும், பங்கேற்க வாய்ப்பு இல்லை. புதிய பாடத் திட்டத்தில், கணித பாடப் பிரிவில், கம்ப்யூட்டர் சயின்ஸ் என்ற பாடப் பிரிவும், வணிகவியல் பாடப் பிரிவில், கம்ப்யூட்டர் பயன்பாடு என்ற பாடப் பிரிவும் உள்ளன.தொழிற்கல்வி பாடத்தில், கம்ப்யூட்டர் தொழிற்கல்வி என்ற பாடப் பிரிவும் உள்ளது; இவை அனைத்தும் வரவேற்கத்தக்கவை. ஆனால், இதை போதிக்கும் ஆசிரியர், எந்த தகுதியுடன் இருக்க வேண்டும் என்ற, அரசாணையை வெளியிடாமல், பள்ளிக் கல்வித் துறை, இத்தனை ஆண்டுகளாக காலம் தாழ்த்துவது ஏன் என தெரியவில்லை. கல்வித் துறை கணினி மயமாக்கப்படும்; 'ஸ்மார்ட் கிளாஸ்' நடைமுறைப்படுத்தப்படும் என்ற அறிவிப்பெல்லாம் வெளி வருகின்றன.ஆனால், மேல்நிலைப் பள்ளி மாணவர்களுக்கு, கணினி அறிவியல் என்ற, ஒரு பாடப் புத்தகம் இருப்பதை, கல்வித் துறை அதிகாரிகள், மறந்து விட்டனர். தமிழக மாணவர்களுக்கு, கணினி அறிவியல் பாடப் பிரிவு முக்கியமில்லை என, அரசுக்கு தோன்றினால், அந்தப் பாடப் பிரிவை, எடுத்து விட வேண்டியது தானே... அத்துடன், கணினி அறிவியல் பி.எட்., பட்டத்தையும், துாக்கி விடலாமே!பள்ளி கல்வித் துறையில், பல்வேறு புரட்சி அறிவிப்புகளை வெளியிடும், கல்வித் துறை அமைச்சர், செங்கோட்டையன், கணினி அறிவியல் ஆசிரியர்களின் கோரிக்கைகளை கனிவுடன் பரிசீலிக்க வேண்டும்!---பாரபட்சம் காட்டுவது பாமரனிடம் தான்...!எஸ்.ராமு, சென்னையிலிருந்து அனுப்பிய, 'இ - மெயில்' கடிதம்: 'குற்றப்பத்திரிகை தாக்கல் செய்யப்பட்டாலே, தேர்தலில் கிரிமினல்கள் போட்டியிட தடை விதிக்க வேண்டும்' என, பொது நல வழக்கு தொடரப்பட்டது. வழக்கை, ஐந்து நீதிபதிகள் கொண்ட, உச்ச நீதிமன்ற அமர்வு விசாரித்து, 'குற்றப் பின்னணி கொண்டோர், தேர்தலில் போட்டியிடுவதை, நீதிமன்றத்தால் தடுக்க முடியாது. ஆர்வம் இருந்தால், பார்லி.,யில் விவாதம் நடத்தி, அரசு, சட்ட வடிவமாக்கிக் கொள்ளட்டும்' என, உத்தரவிட்டது.சட்டசபை, லோக்சபாவிற்கு, குற்றப் பின்னணி கொண்டோரை தேர்ந்தெடுத்து, அனுப்பி விட்டு, அவர்களுக்கு எதிராகவே, எப்படி சட்டம் கொண்டு வர முடியும்... எந்த கட்சி வேட்பாளர் கிரிமினல் நடவடிக்கைகளில் ஈடுபடுகிறாரோ, அவரை தான், ஓட்டுக்காக பணம் வாங்கி, மக்கள், எம்.எல்.ஏ., மற்றும் எம்.பி.,யாக அனுப்பி வைக்கின்றனர்.'கிரிமினல் குற்ற வழக்குகளில், நீதிமன்றத்தால் தண்டிக்கப்பட்டிருந்தாலும் கூட, அவர்கள் தேர்தலில் போட்டியிடுவதற்கோ, மக்கள் பிரதிநிதிகளாக, அமைச்சர்களாக அமர்வதற்கோ, எந்த தடையும் இல்லை' என, நீதிமன்றங்கள் சொல்லாத வரை, நிம்மதி தான்...வருமானத்திற்கு அதிகமாக சொத்து குவித்த வழக்கில், முன்னாள் முதல்வர் ஜெயலலிதா, அவரது தோழி சசிகலா உள்ளிட்ட நால்வருக்கு, நான்காண்டு சிறை தண்டனையும், 100 கோடி ரூபாய் அபராதமும் விதிக்கப்பட்டிருந்தது. நீதிபதி குமாரசாமி உத்தரவால், ஜெயலலிதா உள்ளிட்ட நால்வரும் விடுவிக்கப்பட்டனர். 2016 சட்டசபை தேர்தலில், ஆர்.கே.நகரில் போட்டியிட்ட ஜெயலலிதா வெற்றி பெற்று முதல்வரானார்.மீண்டும் நடந்த சொத்து குவிப்பு வழக்கில் தீர்ப்பு வருவதற்கு முன், ஜெயலலிதா மரணமடைந்தார். இல்லாவிடில், அவர் இன்று, சிறையில் இருந்திருப்பார். சாமானியனுக்கு மட்டும் பொருந்தும் வகையில், சட்டங்கள் இருக்கக் கூடாது. கோடீஸ்வரனாக இருந்தாலும், அரசியல்வாதியாக இருந்தாலும், சட்டம் தன் கடமையை செய்ய வேண்டும். அதை விடுத்து, கிரிமினல் அரசியல்வாதிகள் தேர்தலில் போட்டியிட தடையில்லை என்றால், சட்டம் பாரபட்சம் காட்டுவதாக தான் எடுத்து கொள்ள வேண்டும்!

Advertisement




We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X