Special Articles | Special Reports | Special Interest News | News Comment | Science News | TV Shows news | General News

இது உங்கள் இடம்

பதிவு செய்த நாள் : பிப் 25, 2018
Advertisement

ஜாதி, பேதம் உள்நாட்டில் மட்டும் ஏன்?

அ.அப்பர்சுந்தரம், மயிலாடுதுறை, நாகை மாவட்டத்திலிருந்து அனுப்பிய, 'இ - மெயில்' கடிதம்: தமிழகத்தில், வெளிநாட்டினருடனான, கலப்பு திருமணம் நடந்ததாக அடிக்கடி செய்திகள் வெளியாகின்றன. தமிழகத்தில் கலப்பு திருமணம் என்றால், உள்நாட்டு மணமகளோ, மணமகனோ தான் இருப்பர்.இன்று, அயல்நாட்டு மணமகன் அல்லது மணமகளுக்கு, தமிழகத்தை சேர்ந்தோருடன் திருமணம் நடக்கிறது; இது, மிகவும் வியப்பாக உள்ளது!நம்மோடு பிறந்து, வளர்ந்து, இதே காற்றை சுவாசித்து, பல்வேறு ஜாதியினர் வாழ்கின்றனர். கலாசாரம், பண்பாடு, உடை, உணவு, நாகரிகம் என, எந்த சமூகத்தை சேர்ந்தவராக இருந்தாலும், 90 சதவீதம் ஒத்துப் போகிறது.ஆனால், ஜாதி மாற்றி, காதல் செய்தால், பெற்றோர் ஏற்றுக் கொள்வதில்லை. அதிலும், தாழ்த்தப்பட்ட ஜாதியை சேர்ந்த பெண்ணோ, ஆணோ இருந்தால், பெரும் குற்றம் போல் கருதப்படுகிறது.
தமிழ் சமுதாயத்தில், உணவில் சைவம், அசைவம் என, மாற்றம் இருக்கும். உடல் நிறத்தில் கூட, மாறுதல் காணப்படும். ஆனால், வெளிநாட்டினருடன், தமிழர்களை ஒப்பிட்டால், மொழி, உணவு, உடை, கலாசாரம், பண்பாடு, பழக்க வழக்கம் என, முற்றிலும் மாறுபடும்.காதல் வயப்படுவதால், அத்தனையும் மறந்து திருமணம் செய்து கொள்கின்றனர் போலும். மணமகனோ, மணமகளோ, ஒருவருக்கொருவர், எதாவது ஒரு பண்பாட்டை பின்பற்றியே தீர வேண்டும்.இன்று, மாற்று ஜாதியைச் சேர்ந்த காதலர்களை இணைத்து வைப்பதில், கவுரவம் பார்க்கப்படுகிறது. வெளிநாட்டில் வேலைக்கு சென்றோரின் காதலை மட்டும், சிவப்பு கம்பளம் விரித்து வரவேற்கின்றனர், பெற்றோர்... அதை, கவுரவம் பார்ப்பதோ, பாதிக்கப்பட்டதாகவோ கருதி வருத்தப்படுவதில்லை. அவர்களின் மணவிழாவை, தடபுடல் ஏற்பாடுகளுடன் நடத்துகின்றனர்.
வெளிநாட்டிலும், உள்நாட்டில் - வெளிநாட்டுனருடனான காதல் திருமணத்தை ஏற்றுக் கொள்ளும் சமுதாயம், ஜாதி, பேதம் பார்க்காமல் மற்ற காதலர்களுக்கும், பச்சை கொடி காட்டினால், சமூக பிரச்னைகள் வெகுவாக குறையும்!
வீடு தேடி'ஓசி' பிரியாணி வந்தாலும் வரும்!
ஏ.அஸ்மாபாக் அன்வர்தீன், தலைவர், மாவட்ட தொழில் வர்த்தக சங்கம், ராமநாதபுரத்திலிருந்து எழுதுகிறார்: தமிழகத்தில், 1967க்கு பின், திராவிட கட்சிகளின் ஆட்சியில் துவங்கிய இலவசங்கள், இன்று வரை தொடர்கிறது.டாஸ்மாக் வருமானம், ஒருபுறம் அரசுக்கு கொட்டுகிறது. மற்றொரு புறம், ஓட்டு வங்கிக்காக, மக்கள் வரிப்பணத்தை, அரசு தாறுமாறாக இலவசங்களுக்காக செலவிடுகிறது.இன்று, தமிழக அரசுக்கு, மூன்று லட்சம் கோடி ரூபாய்க்கு மேல் கடன் சுமை எகிறி விட்டது.இந்த வரிசையில், பணிபுரியும் பெண்களுக்கு, மானிய விலையில், டூ - வீலர் வழங்கும் திட்டத்தை, தமிழக அரசு அறிவித்துள்ளது. இதன் மூலம் ஆண்டிற்கு, 250 கோடி ரூபாய்
செலவாகுமாம்!அடுத்த தேர்தலில், 'வாரம் ஒருமுறை வீடு தேடி மதுபாட்டில் வரும்; ஒவ்வொரு ஞாயிற்றுக்கிழமையும், வீட்டிலுள்ள அனைவருக்கும் இலவச பிரியாணி கிடைக்கும்' என்று கூட வாக்குறுதி கொடுப்பர்!மாநிலத்தின் பொருளாதாரத்தை சீரழித்து, ஒவ்வொரு தமிழனையும் கடனாளியாக்கிய புண்ணியவான்கள், அரசியல்வாதிகள் தான்.
'வாழ்க ஜனநாயகம்; வளர்க இலவசங்கள்' என்பதோடு நிற்காமல், 'எத்தனை கோடி இலவசம் வைத்தாய், எங்கள் இறைவா... இறைவா...' என, பாடத் தோன்றுகிறது!

மற்ற துறைக்கும்ரயில், 'ராக்கெட்'பாய வேண்டும்!
சொ.செல்வராஜ், மண்டல மேலாளர், கோ - ஆப்டெக்ஸ் (பணி நிறைவு), சென்னையிலிருந்து எழுது கிறார்: சர்வதேச அளவில் இந்தியன் ரயில்வே துறை, இரண்டாமிடம் வகிக்கிறது.ஆசியாவின் மிகப்பெரிய ரயில்வே நிர்வாகம் என்ற பெருமையையும், இந்தியன் ரயில்வே பெற்றுள்ளது.'ரயில்வே துறையில், 13 லட்சம் ஊழியர்கள் பணிபுரிகின்றனர். நாள் ஒன்றுக்கு, 12 ஆயிரம் ரயில்கள் இயக்கப்படுகின்றன; அவற்றில், 7,000 ரயில்கள், பயணியருக்காக இயங்குகின்றன. தினமும், 2.30 கோடி பேர், ரயில்களில் பயணிக்கின்றனர்' என, ரயில்வே துறையின் ஆய்வறிக்கையில் தெரிவிக்கப்பட்டுள்ளது.ரயில் சேவையில் காலதாமதம், ரயில் நிலையங்களின் சுகாதாரமின்மை, பராமரிப்பு குறைபாடு, ரயில் பயணியரிடம் பாதுகாப்பு குறைபாடு, பயணியர் உடமைக்கான பாதுகாப்பு குறைபாடுகள் இருக்கத் தான் செய்கின்றன.ரயில்களில் கொள்ளை சம்பவங்களும் அடிக்கடி நிகழ்கின்றன. தீ விபத்திலும், தடம் புரண்டும் ரயில்கள் விபத்துகளில் சிக்கி, பயணியர் பலர் உயிர் இழக்க நேரிடுகிறது.அதற்கு, போதிய ஊழியர்கள் இல்லாததும், நிர்வாக சீர்கேடும் காரணம் என, கூறப்படுகிறது; அதுமட்டுமல்ல காரணம் என, சமீபத்தில் தெரியவந்துள்ளது.ரயில்வே துறையில் பணியாற்றிய ஊழியர்களில், 13 ஆயிரம் பேர், உயர் அதிகாரிகளின் அனுமதியின்றி, தொடர் விடுப்பில் சென்று விட்டனர்.சிலர் வருகைப் பதிவேட்டில் கையெழுத்திட்டு, அவர்களது பணியை சரிவர செய்யவில்லை; சிலர் காலதாமதமாக பணிக்கு வருவதை வழக்கமாக
கொண்டிருக்கின்றனர்.கடந்த நவம்பரில், ரயில்வே அமைச்சக மனிதவள மேம்பாட்டு பிரிவு மேற்கொண்ட அதிரடி நடவடிக்கையால், 13 ஆயிரம் ஊழியர்கள் நிரந்தர பணி நீக்கம் செய்யப்பட்டுள்ளனர்.ரயில்வே துறையின் செயல்திறனை மேம்படுத்தவும், பயணியருக்கு உரிய பாதுகாப்பு வழங்கவும், தாமதத்தை தவிர்க்கவும், ரயில்வே துறை முனைப்பு காட்டி வருகிறது.அதன் துவக்கமாக, ரயில்வே துறையில், 62 ஆயிரத்து, 767 காலிப் பணியிடங்களை நிரப்புவதற்கான அறிவிப்பு வெளியாகியுள்ளது.'பணி நீக்கம் செய்யப்பட்டுள்ள ஊழியர்களுக்கு பதிலாக, புதிதாக ஊழியர்கள் நியமனம் செய்யப்படுவர்' என, ரயில்வே நிர்வாகம் கூறியுள்ளது.அதை கருத்திற்கொண்டு தான், 2018 - 19ல் மத்திய பட்ஜெட்டில், ரயில்வே துறைக்கு மட்டும், 1.48 லட்சம் கோடி ரூபாய் நிதி ஒதுக்கீடு செய்யப்பட்டுள்ளது.
ரயில்வே துறையில் ஒழுங்கீனமான செயல்களில் ஈடுபட்ட ஊழியர்களை எல்லாம் களையெடுத்தது போல், மாநில அரசின் வருவாய், போக்குவரத்து, மின் வாரியம் உள்ளிட்ட மற்ற துறைகளிலும் நடவடிக்கை பாய்ந்தால், சிறப்பான சேவையை மக்கள் பெறுவர்!
வளர்ச்சிக்கு கடன் வாங்கினால் தப்பே கிடையாது!

வீ.சுந்தரமகாலிங்கம், திருவனந்தபுரம், கேரள மாநிலத்திலிருந்து எழுதுகிறார்: நாட்டின் மொத்த வெளிநாட்டு கடன், 33 லட்சம் கோடி ரூபாய். இதன்படி, ஒவ்வொருவர் இந்தியன் தலையிலும், 26 ஆயிரம் ரூபாய் கடன் சுமை உள்ளது. கடன்கார நாடு பட்டியலில், 26வது இடத்தில், இந்தியா உள்ளது.பொதுத் துறை வங்கிகளின் வாராக் கடன், 1.5 லட்சம் கோடி ரூபாயாம். நாட்டின் வளர்ச்சிக்காக தான், கடன் வாங்குகிறோம் என்றால் சரி; ஆனால், அதை வட்டியுடன் எவ்வாறு, எப்போது திருப்பி செலுத்துவது... இனி பிறக்கும் குழந்தைகளும், இந்த கடன் சுமையோடு தான் பிறக்க வேண்டுமா...கடந்த, 1959 - 1960களில், நேரு அமைச்சரவையில், உணவு அமைச்சராக இருந்த, சி.சுப்ரமணியம், 'ஒவ்வொரு நாளும் அதிகாலையில் எழுந்ததும், நான், அன்று பிறந்த, 10 லட்சம் குழந்தைகளுக்கும் பதில் சொல்லியாக வேண்டுமே என, சிந்திப்பேன்' என்றாராம்; அன்று, நாட்டை பற்றியும், மக்களை பற்றியும் சிந்தித்த அமைச்சர்கள் இருந்தனர்.கடன் வாங்க அச்சப்பட்ட அமைச்சர்களும், நேரு அமைச்சரவையில் இருந்தனர். நீர்வள துறை அமைச்சராக பணியாற்றிய, கே.எல்.ராவ், நீர்வள நிபுணர் மட்டுமின்றி, பொறியாளரும் கூட. அன்று, கங்கை - காவிரி நதி நீர் இணைக்கும் திட்டத்துக்கு, 30 ஆயிரம் கோடி ரூபாய் தேவைப்பட்டது.அப்போதே, உலக வங்கியிடம் இருந்து கடனாக பெற்றிருந்தால், அத்திட்டத்தை நிறைவேற்றி இருக்கலாம். ஆனால், கடன் வாங்க அமைச்சர், கே.எல்.ராவ் தயங்கினார்.அன்று தயங்காமல், கடன் வாங்கியிருந்தால், நாடு செழிப்பாக இருந்திருக்கும். நாட்டின் வளர்ச்சி திட்டங்களுக்கு, கடன் வாங்குவதால் பிரச்னை கிடையாது. இலவச திட்டங்களுக்காக, கடன் வாங்கினால் தான், நாடு உருப்படாமல் போகும்!கடன் வாங்கி இலவச திட்டங்களை நிறைவேற்றி, தமிழகத்தில் ஓட்டு வங்கிக்கு அலையும் அரசியல் கட்சிகளை போல், எதுவும் செய்யக் கூடாது. இன்று, கங்கை - காவிரி நீர் இணைக்கும் திட்டத்தை நிறைவேற்ற, 35 லட்சம் கோடி ரூபாய் தேவைப்படுகிறது; இதற்கு, பிரதமர் மோடி
தலைமையிலான, மத்திய அரசு தயங்கக் கூடாது.இத்திட்டத்தை நிறைவேற்றினால், வட மாநிலங்களில் ஏற்படும் வெள்ள அழிவை தடுக்க முடியும்; தென் மாநிலங்களில் நிலவும், வறட்சியை சமாளிக்க முடியும்; வருங்கால சந்ததி வளமாக வாழ முடியும்!
ஒப்பிட்டுஒரு பயனும்இல்லை!
சி.துரைராஜ், நெல்லித்தோப்பு, புதுச்சேரி மாநிலத்திலிருந்து எழுதுகிறார்: அக்கால அரசியல் தலைவர்களுடன், இக்கால அரசியல் தலைவர்களை ஒப்பிட்டு, இதே பகுதியில் வாசகர்கள் பலர் கடிதம் எழுதி வருகின்றனர்; அது, முற்றிலும் தவறானது!அன்று, மக்களுக்கு சேவை செய்யவும், அறவழியில் நடக்கவும், அரசியல் தலைவர்கள் பாடுபட்டனர்.கிராமங்களில் நல்ல மனிதர்களை தலைவர்களாக தேர்ந்தெடுத்து, பல நல்ல காரியங்களை நடத்தி, ஊரை மக்கள் அழகு பார்த்தனர். அதே போல், நாட்டிற்கும் நல்ல தலைவனை தேர்வு செய்தனர்.கிராம கோவில்களுக்கு வசதி படைத்தோரை, தர்மகர்த்தாவாக தேர்வு செய்தனர். பொறுப்புகள் அனைத்தையும் அவரிடம் ஒப்படைத்து, மூன்று கால பூஜைகளை செவ்வனே நடத்தினர்.கோவில் கும்பாபிஷேகம் மற்றும் திருவிழா என, களை கட்டியது; அதை பொற்காலம் எனக் கூறலாம்!இன்று, போட்டியும், பொறாமையும் நிறைந்த உலகம். அரசியல் கட்சி தலைவர்கள், 'சொத்து சேர்க்க வேண்டும்' என்ற வெறியுடன் களம் இறங்குகின்றனர். மனித
நேயம், தொண்டு செய்யும் மனப்பான்மை அறவே கிடையாது.அரசியலுக்கு வருவோர், ஆதாயம் தேடி தான் வருகின்றனர்; பணம் கொடுத்து, துணைவேந்தர் கணபதி போன்றோரிடம், பேராசிரியர் பதவிகளை சிலர் வாங்குகின்றனர். வசதி படைத்த பலர் அரசியலுக்கு வருகின்றனர்.அக்கால அரசியல் தலைவர்களுடன், இக்கால அரசியல்வாதிகளை ஒப்பிட்டு பார்க்காதீர்கள்.காந்தி, காமராஜர், அண்ணாதுரை, ராஜாஜி, எம்.ஜி.ஆருக்கு, வேறு யாரும் நிகராக மாட்டார்கள். இவர்கள் எல்லாம் மீண்டும் பிறந்து வர
மாட்டார்களா என, ஏங்குகிறது, மனம்!'மனிதனின் பிறப்பு எப்படி வேண்டுமானாலும் இருக்கலாம்; இறக்கும் போது ஊர் பேச வேண்டும்' என, மறைந்த முன்னாள் ஜனாதிபதி அப்துல் கலாம் உணர்த்தியதை, ஒவ்வொரு இந்தியனும் நினைத்து பார்க்க வேண்டும்!

எந்த கட்சியையும்யாராலும் ஒழித்துவிட முடியாது!
ஏ.எம்.ஏ.ராஜேந்திரன், காளையார்கோவில், சிவகங்கை மாவட்டத்திலிருந்து எழுதுகிறார்: 'காங்கிரசை எழவே முடியாமல் செய்து விடலாம்' என, வாசகர் ஒருவர், இதே பகுதியில் கடிதம் எழுதி இருந்தார்.காங்கிரஸ் பாரம்பரிய கட்சி; இதுவரை, ஜனநாயக ரீதியாக நடந்து வருகிறது. 'தேர்தல் பாதை திருடர்கள் பாதை' என, சில சமூக அமைப்புகள் கூறுகின்றன; அது சரியான கருத்து!சம்பல் பள்ளத்தாக்கு கொள்ளைக்காரியான, பூலான்தேவி கூட, லோக்சபா, எம்.பி.,யானார்.சென்னை, ஆர்.கே.நகர் இடைத்தேர்தலில், சுயேச்சையாக களம் இறங்கிய, தினகரன் வெற்றி பெற்றார்; தி.மு.க.,விற்கு டிபாசிட் பறிபோனது. இது தான், ஜனநாயகத்தின் கோட்பாடு, கூட்டாட்சி தத்துவம்!
நாட்டை ஒரே கட்சி தான் ஆட்சி செய்ய வேண்டும் என்று சட்டம் கிடையாது. மேற்கு வங்கத்தில், 33 ஆண்டுகள் கம்யூனிஸ்ட் ஆட்சியில் இருந்தது; மம்தாவிடம் தோற்ற, அக்கட்சி இன்று வரை, ஆட்சி கட்டிலில் ஏற முடியவில்லை.டில்லியில் நடந்த சட்டசபை தேர்தலில், 70 தொகுதிகளில், மூன்று இடங்களில் மட்டுமே, பா.ஜ., வெற்றி பெற முடிந்தது. ஆம் ஆத்மி கட்சி, 67 தொகுதிகளில் வெற்றி பெற்று, ஆட்சியை பிடித்தது.'மத்தியிலும், 19 மாநிலங்களிலும், நாங்கள் தான் ஆட்சியில் உள்ளோம்' எனக் கூறிய, பா.ஜ.,வினர், ஆர்.கே.நகர் இடைத்தேர்தலில், சொற்ப ஓட்டுகளையே பெற முடிந்தது.தமிழகத்தில், 1967ல் ஆட்சியை இழந்த காங்கிரஸ், 51 ஆண்டுகள் சென்ற பின்னும், தமிழகத்தில் ஆட்சியை பிடிக்க முடியவில்லை.கடந்த, 2014ல் நடந்த, லோக்சபா தேர்தலில், தி.மு.க., ஒரு இடத்தில் கூட வெற்றி பெறவில்லை. அ.தி.மு.க.,வும் சட்டசபை தேர்தலில் தோல்வி அடைந்திருக்கிறது.வெற்றி, தோல்வி அரசியல் கட்சிகளுக்கு சகஜம் தான். இன்றைய எதிர்க்கட்சி, நாளைய ஆளும் கட்சி ஆகலாம்; ஆளும் கட்சி எதிர்க் கட்சியாகலாம். எனவே, 'காங்கிரஸ் கதை முடிந்தது' எனக் கூற வேண்டாம்!

Advertisement