Special Articles | Special Reports | Special Interest News | News Comment | Science News | TV Shows news | General News

இது உங்கள் இடம்

பதிவு செய்த நாள் : செப் 20, 2018 | கருத்துகள் (2)
Advertisement
இது உங்கள் இடம்

'தமிழர் தலைவர்' சீர் செய்யலாமே!பி.அஜித் சாஜி, மதுரையிலிருந்து அனுப்பிய, 'இ - மெயில்' கடிதம்: தமிழகத்தில், 1996 - 2001 வரை நடந்த, தி.மு.க., ஆட்சியின் போது, அனைத்து சமூக மக்களும் ஒரே இடத்தில் குடியிருக்கும் வகையில், அனைத்து மாவட்டங்களிலும், 'சமத்துவபுரம்' எனும் திட்டம் துவக்கப்பட்டது. 1998ல், முதல் சமத்துவபுரம், மதுரை மாவட்டம், திருமங்கலம் அருகே, மேலக்கோட்டையில் ஏற்படுத்தப்பட்டது.இந்த குடியிருப்புப் பகுதியில், வணிக மையங்கள், விளையாட்டு மைதானங்கள், பொது இடங்கள், பூங்காக்கள், படிப்பகங்கள் என, பல்வேறு வசதிகள் செய்யப்பட்டன.சமத்துவபுரம் குடியிருப்பு பகுதியில், அனைத்து ஜாதியினருக்கும் இலவசமாக வீடுகள் ஒதுக்கித் தரப்பட்டன. இந்த திட்டம் வரவேற்பை பெற்றது. ஆட்சி மாற்றம் ஏற்பட்டு, அ.தி.மு.க., பதவிக்கு வந்த பின், தி.மு.க., ஏற்படுத்திய, உழவர் சந்தை திட்டம், சமத்துவபுர திட்டங்கள் கண்டுகொள்ளப்படவில்லை.'தமிழகத்தில், பல இடங்களில் சமத்துவபுர குடியிருப்புகள் சேதமடைந்துள்ளன. சாலைகள் சரிவர இல்லை. அ.தி.மு.க., அரசு பராமரிக்காமல் விட்டு விட்டது' என, தமிழர்களின் தலைவன் என, தன்னைத் தானே சொல்லிக் கொள்ளும், தி.க.,வின் தலைவர் வீரமணி, தன், 'விடுதலை' நாளிதழில் கூறியுள்ளார்.ஈ.வெ.ரா., கண்ட சமத்துவத்தை, முதல்வராக பதவியில் இருந்த கருணாநிதி வாயிலாக, சமத்துவபுரம் குடியிருப்புகளாக பார்த்தீர்கள். தமிழகத்தில் ஆட்சி மாற்றம் ஏற்பட்டதால், அ.தி.மு.க., அரசு, சமத்துவபுர குடியிருப்புகளை கண்டுகொள்ளவில்லை என, குற்றம் சாட்டுகிறீர்கள்.வேண்டாம்... விடுங்கள்... தி.க.,வில் கோடி கோடியாக பணம் கொட்டி கிடக்கிறதே! தமிழர்களுக்காக வாழ்வதாக கூறிக் கொள்கிறீர்களே... எந்தெந்த ஊரில், சமத்துவபுர குடியிருப்புகள் சேதம் என, உங்கள் இயக்கத்தினரை கணக்கெடுக்க செய்யுங்கள்.ஈ.வெ.ரா., கண்ட இயக்க பணத்தை அங்கெல்லாம் செலவு செய்து, ஜாதி, மத, பேதமின்றி சந்தோஷமாக மக்கள் வாழ வழி செய்யுங்கள். அப்படி செய்தால், சமத்துவபுர மக்கள் மட்டுமின்றி, மற்றவர்களும், உங்களையும், உங்கள் இயக்கத்தையும் போற்றி பாராட்டுவர்.அதை விடுத்து, மற்ற அரசியல் கட்சியினர் போல், வாய் கிழிய பேசுவதை நிறுத்திக் கொண்டால், உங்களுக்கும், உங்கள் இயக்கத்திற்கும் நல்லது!அரசியல் தலையீடு இல்லாவிட்டால்'தலை'கள் சிக்கும்!கா.பக்கீர் மைதீன், சென்னையிலிருந்து அனுப்பிய, 'இ - மெயில்' கடிதம்: குடியிருப்போரிடம், தாங்கள் வாங்கும் வாடகை பணத்திற்கு, ரசீது கொடுக்க மாட்டார்கள், வீட்டு உரிமையாளர்கள்.அது போல், ஆளும் கட்சியினர், தாங்கள் முடித்து தரும் காரியங்களுக்காக, லஞ்சம் பெறுவதற்கு ரசீது தர மாட்டார்கள்; லஞ்சம் தருவோரும், ரசீது கேட்க மாட்டார்கள்!'குட்கா' ஊழல் வழக்கு சற்று வித்தியாசமானது. 'குட்கா' வியாபாரி, ஒவ்வொரு நாளும், லஞ்சம் கொடுத்ததை, வரவு- - செலவு கணக்காக எழுதி வைத்துள்ளான்.அமைச்சர்கள் முதல், ஏரியா காவல் நிலைய அலுவலர்கள் வரை, யார் யாருக்கு எவ்வளவு தொகை கொடுக்கப்பட்டுள்ளது என்பதை, தேதி குறிப்பிட்டு எழுதி வைத்து இருக்கிறான்.தமிழக சுற்றுச்சூழல் துறை அமைச்சர் கருப்பண்ணன், 'அ.தி.மு.க., மீது, வீண்பழி சுமத்துகிறார், எதிர்க் கட்சித் தலைவர், ஸ்டாலின். சுகாதாரத் துறை அமைச்சர், விஜயபாஸ்கர் இல்லத்தில், சி.பி.ஐ., சோதனை மட்டுமே நடந்தது.'எந்தக் குற்றச்சாட்டும் இல்லை; ஆதாரமும் இல்லை. அமைச்சரை பதவி நீக்கம் செய்ய வேண்டும் என, ஸ்டாலின் சொல்வதை, நாங்கள் ஏற்க முடியுமா?' என, கூறியுள்ளார்.சி.பி.ஐ., சோதனை நடந்தது என்பதையாவது, அமைச்சர் ஒப்புக் கொண்டுள்ளாரே! நல்லவேளை... சி.பி.ஐ., அதிகாரிகள், அமைச்சர் வீட்டில், பிஸ்கட், காபி சாப்பிட வந்தனர் என கூறாமல் இருந்தாரே...இவரை போல் அமைச்சரை, எங்கு தேடினாலும் கிடைக்க மாட்டார்கள். அமைச்சர் விஜயபாஸ்கர் மீது எந்த குற்றச்சாட்டும் இல்லையாம்; ஆதாரமும் இல்லையாம். ஆனால், சி.பி.ஐ., சோதனை மட்டும் நடந்ததாம்!தமிழக தலைமை செயலகத்திலிருந்து, 'குட்கா' முக்கிய கோப்புகள் மாயமானதாக தகவல் வெளியானது. அதற்கு, அமைச்சர் கருப்பண்ணனிடம் இருந்து சரியான பதில் இல்லை.லஞ்சம் கொடுத்தோர், சி.பி.ஐ., பிடியில் சிக்கியுள்ளனர். இனி, லஞ்சம் வாங்கியோர் மட்டுமே பிடிபட வேண்டும்.அரசியல் தலையீடு இல்லாமல், சி.பி.ஐ., விசாரணை சுதந்திரமாக நடந்தால், எத்தனை பேர், லஞ்ச வழக்கில் சிக்கி சிறை செல்வர் என்பதை பொறுத்திருந்து தான் பார்க்க வேண்டும்!அவலங்களைமாற்றும் சக்திபெண்கள் கையில்...!ந.தேவதாஸ், சென்னையில் இருந்து எழுதுகிறார்: 'சுகப்பிரசவம் அடையாததற்கு காரணம் பெண்களே' என்ற தலைப்பில், வாசகர் ஒருவர் எழுதியிருந்தார். அவரது கருத்துகள் ஏற்கத்தக்கது!அன்று, பள்ளி முடிந்து, மாலையில் வீடு திரும்பும் பெண்களுக்கு, வீட்டு வேலைகளை கற்றுத் தருவது, தாய் தான். இன்று, பெரும்பாலான தாய்மார்கள், அந்த பழக்கத்தை, அடியோடு நிறுத்தி விட்டனர்.'பின் துாங்கி, முன்னெழுவாள் பத்தினி' என்ற சொலவடை, தற்போது பெரும்பாலான குடும்பங்களில் தலைகீழாகி விட்டது.அன்று, சகிப்புத் தன்மை என்ற சக்தி வாய்ந்த ஆயுதத்தை, மனதில் ஏந்தியதால் கூட்டுக் குடும்பத்தை மிகச் சிறப்பாக வழி நடத்தினர், பெண்கள்!இன்று, பெரும்பாலான பெண்களுக்கு, சகிப்புத்தன்மை முற்றிலும் அழிந்ததால், கூட்டுக் குடும்பமே, சிதறி, சின்னாபின்னமாகி விட்டது.பெரும்பாலான குழந்தைகளுக்கு, தங்கள் தாத்தா, பாட்டி யார் என தெரியாத அளவிற்கு உறவுகள் முறிந்துள்ளன.அன்று, வீடு, வயல் மற்றும் மாட்டுத் தொழுவங்களில், பெண்கள் கடுமையாக உழைத்தனர். இதனால், உள்ளமும், உடலும் மிகவும் திடகாத்திரமாக இருந்தது. சுகப் பிரசவத்தை தவிர, 'சிசேரியன்' என்ற வார்த்தைக்கே இடமில்லாமல் இருந்தது.இன்று வாசகர் கூறுவது போல, வாய் கொப்பளிக்காமல், 'பெட் காபி' அருந்தும் அவல நிலை எப்போது வந்ததோ, அப்போதே சுகப் பிரசவமும் ஓடி ஒளிந்து விட்டது.ஒரு காலத்தில், 'புலியை முறத்தால் அடித்து விரட்டிய வீரப் பெண்மணிகள் வாழ்ந்த நாடு நம் பாரதம்' என, வரலாறு கூறுகிறது.இன்று, பெண் குழந்தைகளுக்கு, 'குட் டச், பேட் டச்' சொல்லிக் கொடுக்கும், மிக அவல மான சூழ்நிலையில் வாழ்ந்து கொண்டிருக்கிறோம்.இந்த அவலங்களை எல்லாம் மாற்றக்கூடிய சக்தி, பெண்களின் கைகளில் தான் உள்ளது. அவர்கள் நினைத்தால் வீரப்பெண்மணிகள் வாழ்ந்த பழைய வரலாற்றை திருப்ப முடியும்!

Advertisement




We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X