அரசியலில் களம் இறங்க ரஜினிக்கு சரியான தருணம்! | Special Articles | Special Reports | Special Interest News | News Comment | Science News | TV Shows news | General News

அரசியலில் களம் இறங்க ரஜினிக்கு சரியான தருணம்!

பதிவு செய்த நாள் : டிச 12, 2018 | கருத்துகள் (2)
Advertisement
அரசியலில் களம் இறங்க ரஜினிக்கு சரியான தருணம்!

அ.குணசேகரன், வழக்கறிஞர், புவனகிரி, கடலுார் மாவட்டத்திலிருந்து எழுதுகிறார்: தமிழகத்தில், 1967க்கு பின், காங்கிரசால் இன்று வரை, ஆட்சியை பிடிக்க முடியவில்லை. திராவிட கட்சிகளின் பிடியில் சிக்கி, தமிழக மக்கள் மீள முடியாமல் தவிக்கின்றனர். எம்.ஜி.ஆர்., ஆண்ட காலத்தில், துவக்கத்தில், லஞ்சம், ஊழல் இல்லாத ஆட்சியாக தான் இருந்தது. அவர், சுகவீனம் அடைந்த பின், அமைச்சர்கள் ஊழலில் புகுந்து விளையாடினர்.கருணாநிதி ஆட்சிக் காலத்தில், கட்டப் பஞ்சாயத்து, ரவுடியிசம் போன்றவற்றால், மக்கள் வெறுப்படைந்தனர். அந்த ஆட்சியை அகற்றி, ஜெயலலிதாவை ஆட்சி கட்டிலில் அமர்த்தினர். ஆரம்ப காலத்தில், ஜெயலலிதாவும் ஊழல், லஞ்சம் இல்லாத வகையில், மிக கடுமையாக நடந்து கொண்டார். அதன் பின், அவரே, ஊழல் வழக்குகளில் சிக்கி சிறை சென்றார்.அவர் மறைவிற்கு பின், அ.தி.மு.க., அமைச்சர்கள், ஊழல் வழக்குகளில் சிக்கி வருகின்றனர். 1967க்கு பின், திராவிட கட்சிகளுக்கு எதிராக, மக்கள் திரும்பியுள்ளனர். ஆனால், மாற்றத்தை எதிர்பார்க்கும் அவர்களுக்கு, சரியான தலைவர் கிடைக்கவில்லை. 'நடிகர் ரஜினி அரசியலுக்கு வர வேண்டும்' என, எதிர்பார்ப்பு உள்ளது. அவரும், 'விரைவில் அரசியலுக்கு வருவேன்' என உறுதியாக கூறியுள்ளார். லோக்சபா தேர்தலுக்கு முன், அவர் அரசியல் கட்சியை துவக்கினால், திராவிட கட்சிகளுக்கு பேரிடியாக அமையும்.எம்.ஜி.ஆர்., -ஜெயலலிதா, போன்ற தலைவர்களுக்கு நிகரானவராக, ரஜினி இல்லாவிட்டாலும், மக்கள் மத்தியில் மிகப் பிரபலமானவர். திரையுலகிலும், இன்னும், 'சூப்பர் ஸ்டார்' என்ற அந்தஸ்து உள்ள நடிகராக, வலம் வருகிறார். அவரது, 2.0 என்ற படம், வசூலில் சாதனை படைத்து வருகிறது. இன்னும் காலதாமதம் செய்யாமல், அரசியல் களத்தில், ரஜினி இறங்கினால், தமிழகத்தின் அரசியல் சூழ்நிலை தலைகீழாக மாறும்!***


அரசு ஊழியரை குறை சொல்ல கூடாது!

எஸ்.வசந்த மீனாட்சி, ஓய்வு பெற்ற ஆசிரியை, விழுப்புரத்திலிருந்து எழுதுகிறார்: நான், ஓய்வு பெற்ற, இடைநிலை ஆசிரியை; என் மூத்த சகோதரி, ராஜம் என்பவரும், மயிலாடுதுறை தாலுகா, மங்கைநல்லுாரில் உள்ள தனியார் உயர்நிலைப் பள்ளியில், இடைநிலை ஆசிரியையாக பணியாற்றி, ஓய்வு பெற்றவர்.மயிலாடுதுறை கருவூலம் மூலம், ஓய்வூதியம் பெற்று வருகிறார். தற்போது, அவருக்கு வயது, 84. அவர், சில ஆண்டுகளாக, விழுப்புரத்தில் வசித்து வருகிறார். அவர், தன் ஓய்வூதியம் பற்றிய, ஐயப்பாடுகளை களைய, உயிருடன் இருப்பதை, வங்கியில் பதிவு செய்ய, ஒவ்வொரு ஆண்டும், மயிலாடுதுறை செல்ல வேண்டி இருந்தது.ஆனால் தற்போது, பயணம் செய்யக்கூடிய நிலையில், அவர் உடல் இல்லை. அவரது ஓய்வூதியத்தை, மயிலாடுதுறையிலிருந்து, விழுப்புரம் கருவூலக அலுவலகத்திற்கு மாற்றி தரும்படி விண்ணப்பித்து இருந்தோம்; இப்போது விழுப்புரத்திற்கு மாற்றப்பட்டு விட்டது. இதற்காக, அவரோ, அவரைச் சார்ந்த எவருமோ ஒருமுறைகூட, மயிலாடுதுறை, நாகை செல்லவில்லை. யாரும் சிபாரிசும் செய்யவில்லை. எல்லாம் கடிதம், தொலைபேசி உரையாடல் மூலமே நடந்து விட்டது. அனைத்து பணியாளரும் கனிவுடன் பேசினர்.கடுமையான, 'கஜா' புயல் தாக்கத்திலும், கடமை தவறாமல், நாகை கருவூலத்தில் இருந்து, என் சகோதரியின் அனைத்து பதிவுகளும், விழுப்புரம் அனுப்பப்பட்டுள்ளன. ஒரு மாதம் கூட, அவரது ஓய்வூதியம் நிறுத்தி வைக்கப்படவில்லை. இது போன்று கடமையை உணர்ந்து பணியாற்றுபவரை, நிச்சயம் பாராட்ட வேண்டும். நாகை, மயிலாடுதுறை, விழுப்புரம் கருவூல பணியாளர்களின் கனிவான பேச்சும், கரைபடாத கைகளையும், கால தாமதமின்றி கடமையைச் செய்யும் திறனையும், நான் மிகவும் மதிக்கிறேன்; பாராட்டுகிறேன்.இதுபோன்று, மற்ற துறைகளும் நியாயமாகவும், நேர்மையாகவும், துரிதமாகவும் பணியாற்றினால், ஊழல், லஞ்சம் இல்லாத மாநிலமாக, தமிழகம் தலை நிமிரும்!***


இப்படி இருந்தால் உலக தர பட்டியலில் இடம் கிடைக்குமா?

சுப்பு.லட்சுமணன், சென்னையிலிருந்து எழுதுகிறார்: கல்வித் துறையில், பள்ளிக் கல்வி என்றும், உயர்கல்வி என்றும், இரு துறைகள் உள்ளன. தனித் தனியாக இருந்தால், வளர்ச்சியும், செயல் திட்டங்களும் சிறப்படையும் என, எதிர்பார்க்கப்பட்டது. உயர் கல்வித் துறைக்கு தனி அமைச்சகம் ஏற்படுத்தி, உயர் கல்வியின் வேந்தராக, கவர்னர் இருக்கிறார். ஆனால், உயர் கல்வித் துறை மந்தமாக செயல்படுகிறது.பல அரசு கல்லுாரிகளில், முதல்வர் பணியிடம் காலியாக உள்ளது. உதவிப் பேராசிரியர், பேராசிரியர்களின் குறைகள் தீர்க்கப்படவில்லை; அரசுக் கல்லுாரிகளின் கட்டமைப்பு, அடிப்படை தேவைகள் நிறைவேற்றப்படவில்லை. கல்லுாரி மாணவர்களிடையே நிகழும், சண்டை சச்சரவுகளுக்கு, தீர்வு எட்டப்படவில்லை. தேர்வுத் துறையில், குழப்பங்கள் நிலவுகின்றன. விடைத்தாள்கள் திருத்துவதில், தில்லுமுல்லு, ஊழல் தலைவிரித்தாடுகிறது. உயர் கல்வி என்ற பெயருக்கேற்ப, ஊழலும், கோடிகளில் தான் உள்ளது. கல்விச் செயலரோ, உயர்கல்வி அமைச்சரோ, இதன் ஒட்டு மொத்த உயர் அலுவலரான, கவர்னரோ, இதை தட்டிக் கேட்க முடியவில்லை. பல்கலைகளின் நிர்வாகத்தில், துணைவேந்தர் பணியிடம், மிகவும் இன்றியமையாதது. ஆனால் இன்று, ஐந்து பல்கலைக் கழகங்களில், துணைவேந்தர்கள் இல்லை. ஒரு துணைவேந்தர் பணி ஓய்வு பெற, ஆறு மாதங்கள் இருக்கும் போதே, அடுத்த துணை வேந்தரைத் தேர்வு செய்ய, தேடல் குழு அமைத்து, தகுதியான ஒருவரை தேர்வு செய்ய வேண்டும்.இதில் குழப்பம் ஏற்பட்டு, நீதிமன்றத்தில் வழக்கு நடைபெறுகிறது. தேடல் குழு உறுப்பினர் பட்டியலை, உயர் கல்வித் துறை பரிந்துரை செய்கிறது. கவர்னர், அதில் மூவரை தேடல் குழு உறுப்பினராக தேர்ந்தெடுக்க வேண்டும். அவர்கள், துணைவேந்தர் பொறுப்பிற்கு, மூன்று பேரை தேர்ந்தெடுத்து, கவர்னரிடம் கொடுப்பர். நேர்முகத் தேர்வு நடத்தி, தகுதியின் அடிப்படையில் ஒருவரை, கவர்னர் நியமனம் செய்வார். இதில் என்ன சிக்கல் என்பது தான், மூடு மந்திரமாக உள்ளது.பேராசிரியராக, 10 ஆண்டுகள் பணியாற்றியிருக்க வேண்டும் என்பது, துணைவேந்தர் தேர்வில், முதல் அடிப்படை விதி; இதையே, சரிவர பின்பற்றுவதில்லையாம்! துணைவேந்தரை நியமிப்பதை விட, வேறு பெரிய பணி அரசுக்கு என்ன இருக்கிறது? இப்படி இருந்தால், உலக தர வரிசை பட்டியலில், எப்படி நம் பல்கலைக் கழகங்கள் இடம்பெறும்?

Advertisement




We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X