Special Articles | Special Reports | Special Interest News | News Comment | Science News | TV Shows news | General News

டீ கடை பெஞ்ச்

பதிவு செய்த நாள் : செப் 21, 2018
Advertisement
 டீ கடை பெஞ்ச்

திருச்சி மாநகராட்சிக்கு சென்னை அதிகாரி குறி!''தலைக்கு, 500 ரூபாய் குடுத்து, 'அரியர்' தொகையை வாங்கியிருக்காவ வே...'' என்றபடியே, பெஞ்சில் சங்கமித்தார் பெரியசாமி அண்ணாச்சி.''யாரைச் சொல்றீங்க...'' என, விசாரித்தார் அந்தோணிசாமி.''கோவை அரசு கலை கல்லுாரி பேராசிரியர்களுக்கு, ஏழாவது ஊதியக்குழு விகிதப்படி, 11 மாசத்துக்கான, 'அரியர்' தொகையை சமீபத்துல குடுத்தாவ... 250 பேராசிரியர்களுக்கு இத்தொகையை வழங்க, கருவூலத் துறை அதிகாரிகள், தலைக்கு, 500 ரூபாய் லஞ்சமா வாங்கியிருக்காவ வே...''ஊழலுக்கு எதிரா குரல் கொடுக்குற பேராசிரியர் சங்க நிர்வாகிகளே, கமுக்கமா மீட்டிங் போட்டு, 'லஞ்ச பணத்தை குடுத்துரலாம்'னு முடிவு எடுத்திருக்காவ... ''ஊதிய உயர்வு, தர ஊதியம்னு எந்த தொகையை கருவூலத்துல வாங்கணும்னாலும், 'கட்டிங்' குடுத்தா தான் காரியம் ஆவுது வே...'' என்றார் அண்ணாச்சி.''ராமா, ராமா...'' என, அலுத்துக் கொண்ட குப்பண்ணா, ''ஜெயலலிதா பாணியில, 'மீட்டிங்'கை நடத்தி முடிச்சுட்டார் ஓய்...'' என, அடுத்த விஷயத்திற்கு வந்தார்.''முதல்வர் பழனிசாமியா பா...'' எனக் கேட்டார் அன்வர்பாய்.''இல்லை... தஞ்சாவூர் மாவட்ட காங்கிரஸ் செயல்வீரர்கள் கூட்டத்துக்கு, ரெண்டு தடவை ஏற்பாடு பண்ணியும், மாநில தலைவர் திருநாவுக்கரசரால கலந்துக்க முடியாம, தள்ளி வச்சுட்டார் ஓய்...''சமீபத்துல, மூணாவது முறையா, கூட்டத்துக்கு ஏற்பாடு பண்ணியிருந்தா... திருச்சிக்கு விமானத்துல போய், அங்க இருந்து தஞ்சைக்கு, கார்ல போறதா, அரசர், 'பிளான்' பண்ணியிருந்தார் ஓய்...''ஆனா, சென்னை ஏர்போர்ட்டுக்கு போறச்ச, 'டிராபிக் ஜாம்'ல சிக்கி, விமானத்தை தவற விட்டுட்டார்... ''அதனால, ஜெயலலிதா பாணியில, வீட்ல இருந்தபடியே, 'வீடியோ கான்பரன்சிங்'ல தஞ்சை தொண்டர்களிடம் பேசி, கூட்டத்தை முடிச்சுட்டார் ஓய்...'' என, நடந்த சம்பவத்தை விளக்கினார் குப்பண்ணா.''திருச்சிக்கு குறி வச்சுட்டு இருக்காரு பா...'' என, கடைசி விஷயத்திற்கு வந்த அன்வர்பாயே தொடர்ந்தார்...''திருச்சி மாவட்ட செய்தி துறையில, அதிகாரியா இருந்த ஒருத்தரை, வசூல் புகார் காரணமா, சென்னைக்கு துாக்கி அடிச்சுட்டாங்க... திருச்சியில நல்ல வருமானம் பார்த்தவருக்கு, சென்னையில சும்மா இருக்க முடியலையாம் பா...''திருச்சி மாநகராட்சியில, அவர் அந்தஸ்துக்கு ஏத்த பணியிடம் காலியா இருக்குன்னு கேள்விப்பட்டு, அதுக்கு காய் நகர்த்திட்டு இருக்காரு... ''இதுக்காக லீவு எடுத்துட்டு, பார்க்க வேண்டியவங்களை பார்த்துட்டு இருக்கார்... 'லீவு முடிஞ்சு, திருச்சியில தான் வேலைக்கு சேர்வேன்'னு பழைய நண்பர்களிடம் சவால் விட்டுட்டு இருக்காரு பா...'' என்றார் அன்வர்பாய்.''பாண்டியன் வரார்... மலாய் டீ போடும் நாயர்...'' என, குரல் கொடுத்தபடியே குப்பண்ணா கிளம்ப, மற்றவர்களும் எழுந்தனர்.

Advertisement




We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X