சிறப்பு பகுதிகள் செய்தி

பேச்சு, பேட்டி, அறிக்கை

பேச்சு, பேட்டி, அறிக்கை

பதிவு செய்த நாள் : பிப் 25, 2018
Advertisement
  பேச்சு, பேட்டி, அறிக்கை


எந்த கட்சியிலாவது, தனக்கும் பதவி வேண்டும் என்ற எண்ணத்தில், 'துண்டு' போடும் வகையில், நடிகர் பார்த்திபன் பேட்டி:
'அரசியலுக்கு வரக்கூடாது' எனச் சொல்வதற்கு, நடிகர்கள் ஒன்றும் தீண்டத்தகாதவர்கள் அல்ல. இவ்வளவு வயதாகிவிட்ட ரஜினியும், கமலும், ஓய்வெடுக்கும் நேரமிது. ஆனால், அப்படி இருக்காமல், மக்களுக்கு ஏதாவது செய்ய வேண்டும் என்று புறப்படுகின்றனரே... இதற்காகவே அவர்களை பாராட்ட வேண்டும். வெற்றி - தோல்வி என்பது வேறு; களத்தில் இறங்குவது தான் முக்கியம். அரசியல் ஒன்றும் அவர்களுக்கு மகிழ்ச்சியானது அல்ல; கூடுதல் வலி தான்!



'நிஜமாவா சொல்றீங்க?' என, கேட்கத் தோன்றும் வகையில், தமிழக, காங்., - எம்.எல்.ஏ., விஜயதாரணி பேட்டி:
தமிழக, எம்.எல்.ஏ.,க்களின் சம்பளம், வெறும், 7,000 ரூபாய் தான்; மீதியெல்லாம் போக்குவரத்து படிகள் தான். 7,000 ரூபாயைத் தான், தற்போது, ௩௦ ஆயிரம் ரூபாயாக உயர்த்தி உள்ளனர். இந்த சம்பள உயர்வு வசதியற்ற, எம்.எல்.ஏ.,க்களுக்கு நிச்சயம் உதவும். பென்ஷன் வாங்கும் முன்னாள், எம்.எல்.ஏ.,க்களுக்கும் பேருதவியாக இருக்கும்.

தினகரன் ஆதரவாளர் என்பதை மறைமுகமாகச் சொல்லும், நாட்டுப்புற இசைக் கலைஞர், புஷ்பவனம் குப்புசாமி பேட்டி:
ஜெயலலிதா உயிருடன் இருந்திருந்தால், எனக்கு தான் இசை பல்கலைக்கழக துணைவேந்தர் பதவியை கொடுத்திருப்பார். அவரே, இது பற்றி, என் மனைவியிடம் சொன்னதோடு, என், 'பயோ - டேட்டா'வையும் கொடுக்கச் சொன்னார். ஜெ., இறந்த பின், சசிகலாவிடமும், தினகரனிடமும் கொடுத்தோம். அவர்கள் பதவியில் இருந்திருந்தால், என்னை தான் தேர்வு செய்திருப்பர்.

ரஜினி மக்கள் மன்றத்தின் மாநில செயலர், ராஜு மகாலிங்கம் பேட்டி: அரசியலில் யார் யாரையோ, 'தலைவர்' என்கின்றனர். உண்மையில், அந்த வார்த்தைக்கு இலக்கணமாக திகழ்பவர், ரஜினி மட்டுமே. ரசிகர் மன்றத்தில், யார் யாரெல்லாம் விசுவாசத்துடன் உழைத்தனரோ, அவர்களுக்கு முக்கியத்துவம் கொடுத்து, பதவி தரப்படுகிறது. பல்வேறு கட்டங்களாக, வடிகட்டித் தான் தேர்ந்தெடுக்கப்படுகின்றனர். முழுக்க முழுக்க நடுநிலைத் தன்மையுடன் தேர்வு நடக்கிறது. இதில், பேரம் நடக்க வாய்ப்பே இல்லை.
தேசிய தென்னிந்திய நதிகள் விவசாய சங்கத் தலைவர், அய்யாக்கண்ணு பேட்டி: காவிரி விவகாரத்தில், 2007ல், நடுவர் மன்றத்தின் இறுதி உத்தரவையும், உச்ச நீதிமன்றத்தின் இறுதி தீர்ப்பையும் கூட, கர்நாடக அரசு மதிக்கவில்லை. மறுபடியும், பேச்சு, உடன்பாடு என்றெல்லாம், புதிதாக கட்சி துவங்கியுள்ள, கமல் கூறுவது, கன்னித்தீவு கதை போல் ஆகிவிடும். உச்ச நீதிமன்றத்தின் உத்தரவை, விரைவில் அமல்படுத்த வேண்டும் என வலியுறுத்தி, தமிழக விவசாயிகளுக்கு கமல் உதவ வேண்டும்.



தினகரன் பிடியில் இருந்து தப்பி வந்தவர் போல் பேசும் வகையில், தமிழக வருவாய் துறை அமைச்சர் உதயகுமார் பேட்டி:
எங்களிடம் பிரிந்து சென்ற தினகரன், மூளைச்சலவை செய்தபடி உள்ளார். அவர் வலையில் யாரும் சிக்கவில்லை. அந்த மூளைச்சலவையில் சிக்கியோர், உண்மை தெரிந்தவுடன், மீண்டும் எங்களுடன் வந்து விடுவர்; எம்.எல்.ஏ., - பிரபுவும் வந்து விடுவார். பிரபுவின் தொகுதி மக்களின் பிரச்னைகளுக்காக வைக்கப்பட்ட கோரிக்கைகள் அனைத்தும், முதல்வர் பழனிசாமி நிறைவேற்றி தந்துள்ளார்.

மத்திய கப்பல் மற்றும் நிதித் துறை இணை அமைச்சர், பொன்.ராதாகிருஷ்ணன் பேட்டி
: புதுவை துறைமுகத்தில், ஆண்டுக்கு நான்கு லட்சம் சரக்குகளை கையாளும் வகையில், துறைமுகத்தின் முகத்துவாரத்தை ஆழப்படுத்தும் பணிகள் நடந்து வருகின்றன; 95 சதவீத பணிகள் நிறைவடைந்துள்ளன. லோக்சபாவில் நடைபெறும், பட்ஜெட் கூட்டத் தொடருக்கு பின், இந்த துறைமுகம் சரக்கு போக்குவரத்திற்கு திறக்கப்படும்.உப்பு சப்பில்லாத விஷயத்துக்கே, வன்முறையைத் துாண்டி விடும் காலம் உள்ள இந்த வேளையில், பா.ம.க., நிறுவனர் ராமதாஸ் அறிக்கை: அரசு ஊழியர்கள், தங்கள் கோரிக்கைகளை வலியுறுத்தி போராட்டம் நடத்தும்போது, அவர்களை அழைத்து, அரசு பேச்சு நடத்துவது தான் சரியான அணுகுமுறை. மாறாக, போராட்டம் நடத்தும் பணியாளர்களை கைது செய்வது, எந்த வகையிலும் பயனளிக்காது. எனவே, அடக்குமுறைகளை கைவிட்டு, அரசு ஊழியர் சங்க பிரதிநிதிகளை அழைத்து பேசி, அவர்களின் கோரிக்கைகளை, தமிழக அரசு நிறைவேற்ற வேண்டும்.
காங்., மூத்த தலைவரும், லோக்சபா, எம்.பி.,யுமான சசிதரூர் பேட்டி: மத்தியில் ஆட்சிக்கு வந்து, மூன்றரை ஆண்டுகளாகியும், பா.ஜ., எதுவும் பெரிதாக செய்து விடவில்லை. முந்தைய, காங்கிரஸ் தலைமையிலான, ஐக்கிய முற்போக்கு கூட்டணி ஆட்சியில் முன்னெடுக்க திட்டமிட்டிருந்த, பல திட்டங்களின் பெயர்களை மட்டும் மாற்றி, இந்த ஆட்சியில் சில திட்டங்கள் அறிமுகப்படுத்தப்பட்டுள்ளன.


'இளங்குறுத்துன்னு சொல்லி, நீங்கள் சார்ந்திருந்த கட்சியில ஒருத்தரு, தலைமை ஏத்துக்கிட்டிருக்காரு... அவருக்கு அறிவுரை சொல்லிப் பாருங்களேன்... அதன் பிறகு, சபைகள் எப்படி நடக்குதுன்னு பார்ப்
போம்...' எனச் சொல்லத் தோன்றும் வகையில், முன்னாள் ஜனாதிபதி பிரணாப் முகர்ஜி பேச்சு: லோக்சபா மற்றும் மாநில சட்டசபைக்கான தேர்தலை, ஒரே நேரத்தில் நடத்தும் வகையில் அரசியலமைப்பு சட்டத்தில் திருத்தம் மேற்கொண்டாலும், அதுபோன்று தேர்தலை நடத்துவது சிரமமான விஷயம். 1950களில் லோக்சபா அமர்வுகள், ஆண்டு ஒன்றுக்கு, 127 நாட்கள் நடந்தன; ராஜ்யசபா அமர்வுகள், 93 நாட்கள் நடந்தன. தற்போது, இரு சபைகளின் அமர்வுகளும், ஆண்டுக்கு, 75 நாட்களாக குறைந்து விட்டன; நாட்களை அதிகப்படுத்த வேண்டும்.

Advertisement

இதையும் தவறாமல் படிங்க ...



Advertisement

வாசகர் கருத்து

முதல் நபராக கருத்து தெரிவியுங்கள்!

உங்கள் கருத்தைப் பதிவு செய்ய

(Press Ctrl+g or click this   to toggle between English and Tamil)
Login :
New to Dinamalar ?
கருத்து விதிமுறை