Special Articles | Special Reports | Special Interest News | News Comment | Science News | TV Shows news | General News

சிறப்பு பகுதிகள் செய்தி

பேச்சு, பேட்டி, அறிக்கை

பேச்சு, பேட்டி, அறிக்கை

பதிவு செய்த நாள் : ஜூலை 22, 2018 | கருத்துகள் (1)
Advertisement
 பேச்சு, பேட்டி, அறிக்கை

'நல்ல யோசனை...' என, சொல்லத் தோன்றும் வகையில், த.மா.கா., தலைவர் வாசன் அறிக்கை: காவிரியில் தண்ணீர் திறக்கப்பட்டு உள்ளதால், தண்ணீர் கடைமடை பகுதி வரை சென்று, விவசாய தொழிலுக்கு பயனுள்ளதாக இருக்க, தொடர் கண்காணிப்பு நடவடிக்கைகளை, தமிழக அரசு மேற்கொள்ள வேண்டும். மேட்டூர் அணையிலிருந்து திறக்கப்படும் தண்ணீரை நம்பி, 17 லட்சம் ஏக்கரில், விவசாயிகள் பாசனம் செய்கின்றனர். எனவே, குடிமராமத்து பணிகளை தற்காலிகமாக தள்ளி வைத்து, 2019 ஜனவரியில் மேற்கொள்ளலாம்.

தமிழக வேளாண்மைத் துறை அமைச்சர் துரைக்கண்ணு பேட்டி:
மேட்டூர் அணை திறக்கப்பட்டதை அடுத்து, கல்லணையில் இருந்து, காவிரி டெல்டா விவசாயிகளுக்கு இன்று தண்ணீர் திறக்கப்பட உள்ளது. காவிரி நீர், கடைமடைப் பகுதி வரை செல்வதற்கு நடவடிக்கை எடுக்கப்பட்டுள்ளது. தற்போதுள்ள சூழ்நிலையில், முறைபாசனம் இல்லாமல், தண்ணீர் திறப்பதற்கு வாய்ப்பு இருக்கிறது. துார்வாரும் பணியில், 80 சதவீத பணிகள் நடந்து விட்டது. தண்ணீரை, விவசாயிகள் சிக்கனமாக பயன்படுத்தி, நல்ல முறையில் உற்பத்தியை பெருக்க வேண்டும்.

தமிழக உள்ளாட்சி துறை அமைச்சர் வேலுமணி பேட்டி: மத்தியில், காங்கிரஸ் ஆட்சியோ, பா.ஜ., ஆட்சியோ, யாராக இருந்தாலும், தமிழர்களின் உரிமைகளை நாங்கள் விட்டு தர மாட்டோம். காவிரி விவகாரத்தில், பா.ஜ., எந்த துரோகமும் செய்யவில்லை. எந்த திட்டங்களை கொண்டு வந்தாலும், எதிர்க்கட்சிகள் எதிர்க்கின்றன. எதிர்ப்புகளை மீறியும், பல்வேறு வளர்ச்சி திட்டப் பணிகளை, முதல்வர் பழனிசாமி செய்து வருகிறார்.

'துண்டு போடுற பாணியோ...' என, கேட்கத் தோன்றும் வகையில், விடுதலை சிறுத்தைகள் தலைவர் திருமாவளவன் பேட்டி:
வருமான வரிச் சோதனை மூலம், மத்திய அரசு, தங்களை எதிர்க்கும் கட்சிகளை அச்சுறுத்தி வருகிறது. திடீரென, தமிழக முதல்வருக்கு நெருக்கமானவர்களின் இல்லம், அலுவலகங்களில் சோதனை நடத்தியது அதிர்ச்சி அளிக்கிறது. அது, முதல்வரை மாற்றும் செயலா அல்லது அ.தி.மு.க., அரசை, கலைக்கும் முயற்சியா என்ற கேள்வி எழுந்துள்ளது. தமிழகத்தில் குழப்பம் செய்து, பா.ஜ., அரசியல் ஆதாயம் தேடுகிறதோ என்ற அச்சத்தை ஏற்படுத்துகிறது.

'எலெக் ஷன் வருதுங்கோ... 'சேம் சைடு கோல்' போடணுமுங்கோ...' என, ஜாடைமாடையாய் கட்சியினருக்கு அறிவுறுத்தும் வகையில், அகில இந்திய சமத்துவ மக்கள் கட்சியின் நிறுவனர் சரத்குமார் அறிக்கை: கர்நாடகாவில், தென்மேற்கு பருவமழையால், தமிழக அணைகளும் நிரம்புகின்றன. முதன்முறையாக முதல்வர் பழனிசாமி, மேட்டூர் அணையில் இருந்து நீர் திறந்து இருக்கும் நிகழ்வு, மிகவும் மகிழ்ச்சி அளிக்கிறது. விளைச்சலை பன்மடங்கு பெருக்கும் வகையில், விவசாயிகளுக்கு தேவையான மற்ற அனைத்து உதவிகளையும் தாய் மனதோடு, தமிழக அரசு மேற்கொள்ள வேண்டும்.

'சிண்டு முடியாமல், மக்கள் பிரச்னைக்கான தீர்வை கோர்ட்டுகள் சொல்வது உங்களுக்குப் பிடிக்கவில்லையா...' எனக் கேட்கத் தோன்றும் வகையில், பா.ஜ., தேசிய செயலர், எச்.ராஜா பேச்சு: சமீபகாலமாக, 'நீட்' விவகாரத்தில், நீதிமன்றங்களின் செயல்பாடுகள் ஏற்றுக்கொள்ளக் கூடியதாக இல்லை. மத்திய அரசிற்கு, தமிழக அரசோடு சுமுக உறவு நீடித்து வருகிறது. ஆனால், அரசியல் ரீதியாக, அ.தி.மு.க.,வோடு கூட்டணி கிடையாது.

ம.தி.மு.க., பொதுச்செயலர் வைகோ பேட்டி:
கர்நாடகாவில் அணைகள் நிரம்பி, வெள்ளம் பெருக்கெடுத்து ஓடுவதால், வேறு வழியின்றி, காவிரியில் தண்ணீர் திறக்கப்பட்டுள்ளது. இதை வைத்து, தமிழகத்திற்கு உரிய தண்ணீரை முறைப்படி, கர்நாடகா திறந்துவிடும் என, கருத வேண்டாம். கர்நாடக முதல்வர் குமாரசாமி, எதிர்ப்பாக செயல்பட்டு வருகிறார். தற்போது கர்நாடகா தண்ணீர் திறந்து விட்டுள்ளதை வைத்து, காவிரி விவகாரத்தில், எந்த முடிவிற்கும்
வரமுடியாது.

இஸ்ரோ செயற்கைக்கோள் மையத்தின் இயக்குனர் மயில்சாமி அண்ணாதுரை பேச்சு: சைபர் குற்றங்களுக்கு எதிராக முன்னெச்சரிக்கையுடன் செயல்படுவது மிகவும் அவசியம். பாதுகாப்பு உள்ளீடுகளை நாம், அதிகம் பயன்படுத்த வேண்டும். உள்நாட்டு பாதுகாப்பு போல், விண்வெளி பாதுகாப்பிலும் பல்வேறு சாவல்கள் உள்ளன. அதை சமாளிக்கும் வகையில், இஸ்ரோ தொடர்ந்து சைபர் பாதுகாப்பு விஷயங்களுக்கு முக்கியத்துவம் கொடுத்து வருகிறது. பெங்களூரு போன்ற பெரு நகரங்களில், சைபர் குற்றங்கள் அதிகரித்துள்ளன. அதை கட்டுப்படுத்தும் வகையில், முன்னெச்சரிக்கை நடவடிக்கைகள் எடுக்கப்பட வேண்டும்.

தமிழக வாழ்வுரிமை கட்சி தலைவர் வேல்முருகன் பேட்டி:
என்னை போன்றவர்களை கைது செய்வதன் மூலமாக, தமிழகத்தின் வாழ்வுரிமை பிரச்னைகளுக்கான போராட்டங்களை ஒடுக்கிவிடலாம் என, அரசு நினைத்திருக்கலாம். அவர்கள் எண்ணத்தின் மூலம் இந்த, 40 நாட்கள் வேண்டுமானால், என்னை முடக்கியிருக்கலாம்; அது, நீண்டகாலம் நிலைக்காது. நான் வெளிவந்தவுடன், முதல் நாளே வழக்கறிஞர் பிரசாந்த் பூஷன் உள்ளிட்ட தேசிய ஆளுமைகளை ஒருங்கிணைத்து, மத்திய அரசுக்கு எதிராக, தேசம் முழுவதும் போராட்டங்களை, பிரசாரத்தை துவங்க உள்ளோம்.

'என்னடா இது... இந்த பிரச்னையை யாரும் பெரிதுபடுத்த மாட்டேங்குறாங்க...' என்ற ஆதங்கத்தில், மத்திய இணை அமைச்சர், பொன்.ராதாகிருஷ்ணன் பேட்டி:
பரிகாரத்துக்காக ஸ்ரீரங்கம் கோவிலுக்கு சென்ற ஸ்டாலின், தன் நெற்றியில் தெய்வ சின்னத்தை இடுவதற்கு அனுமதி அளித்து, அதை உடனே அழித்து, தெய்வத்தையே அவமரியாதை செய்கிறார். இதே தவறை வேறு யாராவது செய்திருந்தால், கோவில் நிர்வாகம் - ஹிந்து அறநிலையத் துறையை கையில் வைத்திருக்கும், அ.தி.மு.க., அரசு, அவர்களை சும்மா விட்டிருக்குமா... இப்படி, தி.மு.க., - அ.தி.மு.க., இடையிலான இந்த அனுசரிப்புக்களுக்கான பின்னணி என்ன?

Advertisement