இணையம் வராத அந்த 400 கோடி பேர்
Advertisement
 
 
 
Advertisement
dinamalar-advertisement-tariff-2018
 
Advertisement
 
எழுத்தின் அளவு:
Advertisement

பதிவு செய்த நாள்

14 மார்
2016
00:00

இன்றைய வாழ்வியல் நடைமுறையில், இணையம் நம் வாழ்க்கையோடு இணைந்த ஒரு தவிர்க்க முடியாத அம்சமாக இருந்தாலும், உலக அளவில், இன்னும் 400 கோடி பேர், இணயம் பக்கம் வராமலேயே தங்கள் வாழ்க்கையை நடத்திக் கொண்டுள்ளனர். அண்மையில் பேஸ்புக் நிறுவனம், “2015 ~ இணைய இணைப்பின் நிலை” என்ற 56 பக்க அறிக்கையை வெளியிட்டது. அதில், ஏன் இந்த மக்கள் இணையம் தேவை என்று தெரிந்திருந்தும், அதன் பக்கமே வராமல் உள்ளனர் என்பதற்கான காரணங்களை ஆய்வு செய்து முடிவுகளைத் தந்துள்ளது. அவற்றைத் தெரிந்து கொள்வதன் மூலம், அந்த காரணங்களை நிவர்த்தி செய்து, அவர்களையும் இணையத் தொடர்பில் கொண்டு வரலாம். இதையே அந்த அறிக்கையும் சுட்டிக் காட்டியுள்ளது. அதனை இங்கு காணலாம்.
இணைய வழி சேவைகளை மக்கள் பயன்படுத்தத் தொடங்கி, 46 ஆண்டுகள் ஆகிவிட்டன. மக்கள் தாங்களாக, முதன் முதலில், என்.சி.எஸ்.ஏ. மொசைக் (NCSA Mosaic) பிரவுசரைப் பயன்படுத்தி, உலக வைய விரிந்த இணையத்தைப் பயன்படுத்த ஆரம்பித்து 23 ஆண்டுகள் கடந்துவிட்டன. ஆனால், உலக மக்கள் தொகையில் 401 கோடி மக்கள் இன்னும் இணையத்தைப் பயன்படுத்துவதில்லை.
சென்ற பத்து ஆண்டுகளாக, ஒவ்வொரு ஆண்டும், இணையத்தில் இணையும் மக்கள் தொகை 20 கோடி முதல் 30 கோடி வரை உள்ளது. இந்த வேகத்தில் போனால், உலகில் உள்ள மக்கள் அனைவரும், இணையத்தில் இணைய 15 முதல் 20 ஆண்டுகள் வரை ஆகலாம். ஏன், இன்னும் அதிக ஆண்டுகள் ஆகலாம் என்று இந்த பேஸ்புக் அறிக்கையில் கூறப்பட்டுள்ளது. இதற்கு முக்கியமாக நான்கு காரணங்கள் தரப்பட்டுள்ளன. அவை: 1. இணையத் தொடர்பு கிடைக்காத நிலை, 2. நிதி வசதி இல்லாமை, 3. இணையம் தேவைப்படாத வாழ்க்கை முறை மற்றும் 4. மக்களின் தயார் நிலை.

இணையத் தொடர்பு கிடைக்காத நிலை: பலர் இன்னும் இணையத்துடன் தொடர்பு கொள்ளாமல் இருக்க, தொடர்பு கிடைக்காத நிலையே முதன்மைக் காரணமாக உள்ளது. தற்போது, 3ஜி மற்றும் 4ஜி மொபைல் ஸ்மார்ட் போன்கள் தான் எங்கும் இடம் பெற்றுள்ளனவே. அவற்றின் வழியாக இணைய இணைப்பினைப் பெறலாமே என்றுதான் நாம் எண்ணுவோம். பல நாடுகளில் இந்நிலை ஏற்படவில்லை. மொபைல் பிராட்பேண்ட் தொடர்பு கிடைக்காத இடங்களில் இன்னும் 160 கோடி பேர் வாழ்ந்து வருகின்றனர். இவர்களில், 9-0 சதவீதம் பேர், தென்கிழக்கு ஆசியா, பசிபிக் நாடுகள் மற்றும் ஆப்பிரிக்காவின் ஒரு பகுதியில் வாழ்கின்றனர். இவர்களில், பெரும்பாலான்வர்கள், இந்த நாடுகளின் கிராமப் புறங்களில் வாழ்பவர்கள்.
இந்த இடங்களில் இணைப்பு தர இயலாமையை, நெட்வொர்க் சேவையை வழங்கும் நிறுவனங்கள் கடுமையாகவே எதிர் கொள்கின்றனர். நகர்ப்புற ஊர்களுடன் ஒப்பிடுகையில், இந்த கிராமங்களில், மிகக் குறைவான எண்ணிக்கையிலேயே மக்கள் வாழ்கின்றனர். ஆனால், இவர்களுக்கு இணைய இணைப்பு கொடுப்பதற்கான, கட்டமைப்பினை ஏற்படுத்த, நகர்ப்புறங்களில் ஆகும் செலவினைப் போல இரண்டு அல்லது மூன்று மடங்கு நிதி செலவாகிறது. அந்த செலவினை ஈடு கட்டும் வகையில், இந்தக் கிராம மக்களிடம் கட்டணம் வசூலிக்க முடியாது.
இந்த கட்டுப்படியாகாத நிலை, இந்தியக் கிராமப்புறம் அல்லது ஆப்பிரிக்க நாடுகளில் மட்டுமில்லை. வளர்ந்த நாடுகளான பிரிட்டன் மற்றும் அமெரிக்காவிலும் உள்ளது. இதில் முதலில் கூறப்பட்ட இந்திய மற்றும் ஆப்பிரிக்க நாட்டின் பகுதிகளில், மின் இணைப்பே இன்னும் தரப்படாமல் உள்ளது. அதனால் தான், பேஸ்புக் மற்றும் கூகுள் நிறுவனங்கள், தங்களின் பலூன்கள் மற்றும் ஆளில்லா பறக்கும் சிறிய விமானங்கள் மூலமாக, இங்கு வாழும் மக்களுக்கு இலவச இணைய இணைப்பு வழங்கும் திட்டங்களை சோதனை முறையில் மேற்கொண்டு வருகின்றன.

நிதி வசதி இல்லாமை: இந்த மக்களில், பெரும்பாலானவர்களிடம், இணைய இணைப்பிற்கென செலவழிக்கும் அளவிற்கு நிதி இல்லாமை, அடுத்த முதன்மை காரணமாக உள்ளது. வளர்ந்த நாடுகளில் கூட, 30% மக்கள், வறுமைக் கோட்டுக்கும் கீழாக வாழ்கின்றவர்களாக உள்ளனர் என்று இந்த அறிக்கையில் கூறப்பட்டுள்ளது. 200 கோடி மக்கள், மாதத்திற்கு 500 எம்.பி. டேட்டா கூட வாங்க இயலாத நிலையில் உள்ளனர். பிரிட்டனில், சராசரியாக, ஒரு நபர் தன் மொபைல் இணைய இணைப்பிற்குத் தன் வருமானத்தில் 1% பணத்தைச் செலவழிக்கிறார். அமெரிக்காவில் இது 2% ஆக உள்ளது. இந்தியாவில், இது 4% க்கும் சற்று அதிகமாக உள்ளது. நைஜீரியாவில், இது 7%க்கும் அதிகமாக உள்ளது. இதனுடன், இதற்கான சாதனங்களுக்கான செலவு, கூடுதல் தகவல் பெற்று அனுப்பும் செலவினை இணைத்தால், மேலே குறிப்பிட்ட சராசரி செலவினத்தைக் காட்டிலும் இரண்டு அல்லது மூன்று மடங்கு பணத்தை இவர்கள் செலவழிக்க வேண்டியதுள்ளது.
உயரும் பொருளாதார நிலை மற்றும் இணைய இணைப்பு கட்டணக் குறைப்பு ஆகியவற்றினால், கூடுதலான மக்கள் இணைய இணைப்பினைப் பெறும் சூழ்நிலை வளர்ந்து வரும் நாடுகளில் உருவாகி வருகிறது. அதனால், 50 கோடி பேருக்கு, 500 எம்.பி. டேட்டா பெறுவது எளிதான ஒன்றாக மாறி வருகிறது. இருப்பினும், பலர் இன்னும் ஒரே மொபைல் போனை தங்களுக்குள் பகிர்ந்து பயன்படுத்துகின்றனர். இன்னும் பலர் அது கூட இல்லாமல் உள்ளனர்.

இணையம் தேவைப்படாத வாழ்க்கை: மூன்றாவதான முக்கிய காரணம், பலர், இணையம் தேவைப்படாத வாழ்க்கையை மேற்கொண்டு வருகின்றனர். ஆனால், இதனை உறுதி செய்வது சற்று சிரமமான செயல்பாடாகும். இந்நிலைக்கு முதல் காரணம், இணையத்தில் பெரும்பாலான மக்கள் புரிந்து கொள்ளும் மொழி இல்லாமையே. பன்னாட்டளவில், ஏறத்தாழ 7,000 மொழிகள் புழக்கத்தில் உள்ளன. ஆனால், 56% இணைய தளங்கள், ஆங்கில மொழியில் மட்டுமே உள்ளன. மிகப் பிரபலமான 10 மொழிகள், 89% இணைய தளத்தை ஆக்கிரமித்துள்ளன. எனவே, நூறு கோடி மக்களுக்கும் மேல், தங்கள் மொழிகளில், தங்களுக்குத் தேவையான தகவல்களைப் பெற முடியாதவர்களாகவே உள்ளனர்.
இந்த அறிக்கையில் தெரிவிக்கப்பட்டுள்ள தகவல்களின்படி, கூகுள் ஆண்ட்ராய்ட் இயக்கம் 76 மொழிகளில் இணையத்தைத் தருகிறது. பேஸ்புக்கில், 139 மொழிகளை மட்டுமே கையாள முடிகிறது. இந்த மொழிகள் 89% பேரின் முதல் அல்லது இரண்டாவது மொழியாக உள்ளதால், பேஸ்புக் 83% மக்களைச் சென்றடைய முடிகிறது. ஆனால், 98% மக்களைச் சென்றடைய, 800 மொழிகளைக் கையாளும் கட்டமைப்பினை, பேஸ்புக் ஏற்படுத்த வேண்டும்.

மக்களின் தயார் நிலை: இறுதியாக, இணையத்தைப் பயன்படுத்த மக்களின் ஆயத்த நிலை. இதனை அறிவது மிகவும் கடினம். இந்நிலை என்பது மக்களின் கம்ப்யூட்டர் மற்றும் இணையத் தொடர்பு குறித்த அறிவு, இணையத்தில் செயல்படுவதால் கிடைக்கும் நன்மைகளை உணர்ந்திருப்பது மற்றும் கலாச்சாரம் மற்றும் சமூக ரீதியாக, இணையத்தை ஏற்றுக் கொள்வது. இறுதியாகக் குறிக்கப்படுள்ள சமூக ரீதியாக ஏற்றுக் கொள்ளல் குறித்து இதுவரை எந்த ஆய்வும் மேற்கொள்ளப்படவில்லை. ஆனால், பன்னாட்டளவில், பெண்களுக்கு இது ஒரு பெரும் சவாலான சங்கதியாகவே உள்ளது.
“இணையத் தொடர்பில் இல்லாதவர்களில், மூன்றில் இரு பங்கு மக்கள் இணையம் என்றால் என்னவென்றே அறியாமல் உள்ளனர். நைஜீரியாவில் வாழும் பெரும்பகுதி மக்கள், “இணையம்” என்ற சொல்லை இதுவரை கேட்டறியாதவர்களாகவே உள்ளனர்.
இதனை உடனடியாக நிவர்த்தி செய்திட இயலாது. படிப்படியாக, இந்த நோக்கில் மக்களைக் கற்றவர்களாக, இதனைத் தெரிந்தவர்களாக மாற்றுவதே தீர்வாகும். குறிப்பாக, பள்ளி சிறுமியர்கள் மற்றும் பெண்களிடம் இது விரைவாகச் சென்றடைய வேண்டும். பப்புவா நியு கினியா நாட்டில், எஸ்.எம்.எஸ். வழி கதைகளை அம்மக்கள் மொழியில் அனுப்பி, மக்களை டிஜிட்டல் சாதனங்களுக்குத் தயார்ப்படுத்தி வருகின்றனர். இதற்கான பயன்களும் தற்போது தெரியவந்துள்ளன.
400 கோடி மக்களுக்கு இணையத்தைக் கொண்டு செல்வது என்பது, மிகப் பெரிய சவாலான பணியாகும்.
இந்த சவால் தொடர்ந்து தீவிரமாகிக் கொண்டு தான் செல்கிறது. வறுமையில் வாழும் மக்கள், அடிப்படை தொழில் நுட்பம் கூட அறியாத நிலை, மொபைல் போன் போன்ற சாதாரண சாதனங்களைக் கூட தெரியாத நிலை எனப் பல நிலைகள் இந்த சவாலுக்கு எதிரான இயக்கத்தினை மந்தப்படுத்தி வருகின்றன. இருப்பினும் நாம் அந்த 400 கோடி பேரை நம்முடம் அழைத்துச் செல்ல முயற்சிப்பதே, இந்த உலகத்தின் அனைத்து மக்களும் இணையாக உயர்வதற்கான வழிகளைத் தரும்.

Advertisement

 



Advertisement
வாசகர்களுக்கு ஓர் அன்பான வேண்டுகோள்.
1.செய்திகள் குறித்த கருத்துக்களைப் பதிவு செய்யும்போது, எவருடைய மனதையும் புண்படுத்தாத வகையில், நாகரிகமான முறையில் உங்கள் கருத்துகள் இருக்க வேண்டும் என்று எதிர்பார்க்கிறோம்.
வாசகர் கருத்து
முதல் நபராக கருத்து தெரிவியுங்கள்!
உங்கள் கருத்தைப் பதிவு செய்ய :
Login :
New to Dinamalar ?
வாசகர்கள் கருத்துப் பகுதியில் வெளியாகி இருக்கும் கருத்துக்கள், உரிய முறையில் தணிக்கை செய்யப்பட்டே வெளியி‌டப்படுகின்றன.
(Press Ctrl+g or click this   to toggle between English and Tamil)
அன்புள்ள வாசகர்களே!,
நீங்கள் கருத்துப் பதிவு செய்ய LOGIN செய்ததும், My Page என்ற பட்டனை கிளிக் செய்து. அதில் உங்கள் புகைப்படம், மெயில் முகவரி, ஊர், நாடு ஆகியவற்றைப் பதிவு செய்ய புதிய வசதி செய்யப்பட்டுள்ளது. ஏற்கனவே பதிவு செய்த புகைப்படத்தை நீக்கவும் வசதி உள்ளது. மேலும் இதுவரை நீங்கள் தெரிவித்த கருத்துக்களைத் தொகுப்பாக பார்த்துக் கொள்ளலாம். இந்த புதிய வசதியை வாசகர்கள் முழுமையாக பயன்படுத்திக் கொள்ள விரும்புகிறோம். உங்களுடைய புகைப்படத்தை மட்டுமே பதிவு செய்யவும்; வேறு எந்த புகைப்படத்தையும் பதிவு செய்ய வேண்டாம்.

We use cookies to understand how you use our site and to improve user experience. This includes personalising content and advertising. By continuing to use our site, you accept our use of cookies, revised Privacy Policy.

Learn more I agree X