சென்னை : "தமிழகத்தின் கடலோர மாவட்டங்கள் மற்றும் புதுச்சேரியில் இன்று இடியுடன் கூடிய பலத்த மழை பெய்யும்' என, சென்னை வானிலை ஆய்வு மையம் தெரிவித்துள்ளது. வடகிழக்கு பருவமழை தீவிரமடைவதால், தமிழகத்தின் கடலோர மாவட்டங்கள் மற்றும் உள்மாவட்டங்களில் பரவலாக மழை பெய்து வருகிறது. சென்னை மற்றும் புறநகர் பகுதியில் நள்ளிரவு முதல் விடிய விடிய மழை கொட்டியது. அதிகபட்சமாக சென்னை, செம்பரம்பாக்கத்தில் 4 செ.மீ., மழை பதிவாகியது. தமிழகத்தில் கள்ளக்குறிச்சி, பொள்ளாச்சியில் 4, உத்தரமேரூர், பட்டுக்கோட்டை, திருத்துறைபூண்டி, திருமயம், காரைக்குடியில் 3, ஸ்ரீபெரும்புதூர், பூந்தமல்லி, தாமரைபாக்கம், சேத்தியாதோப்பு, அறந்தாங்கியில் 2 செ.மீ., மழை பெய்தது.

இது குறித்து, சென்னை வானிலை ஆய்வு மைய இயக்குனர் ரமணன் கூறுகையில், "தென்மேற்கு வங்கக் கடலில் உருவான குறைந்த காற்றழுத்த தாழ்வு நிலை இலங்கைக்கும், தமிழகத்திற்கும் இடையே தொடர்ந்து நிலை கொண்டிருக்கிறது. இதன் காரணமாக, இன்று தமிழகத்தின் கடலோர மாவட்டங்கள் மற்றும் புதுச்சேரியில் இடியுடன் கூடிய பலத்த மழை பெய்யும். தமிழகத்தின் உள்மாவட்டங்களிலும், சென்னை நகரில் ஒரு சில இடங்களிலும் இடியுடன் கூடிய மழை பெய்யக் கூடும்' என்றார்.