Advertisement

புதிய கல்வி கொள்கை - சூர்யா பேசினாலும் மோடி கேட்பார் : ரஜினி

கே.வி.ஆனந்த் இயக்கத்தில் சூர்யா நடித்துள்ள, ‛காப்பான்' படத்தின் பாடல் வெளியீட்டு விழா நேற்று(ஜூலை 22) இரவு நடந்தது. சூர்யா புதிய கல்வி கொள்கை குறித்து தெரிவித்த கருத்துக்கள் பரபரப்பை கிளப்பிக் கொண்டிருக்கும் நேரத்தில் இந்த விழா நடப்பதும், அதில் ரஜினி கலந்து கொள்வதும் மிகுந்த எதிர்பார்ப்பை ஏற்படுத்தியது.

சூர்யாவின் கருத்தை கமல்ஹாசன் வரவேற்றதோடு அவருக்கு துணையாக நிற்பேன் என்றும் அறிவித்து விட்டார். ரஜினி சூர்யாவின் கருத்தை ஆதரிப்பாரா? என்ற கேள்விக்குறியுடன் விழா நடந்தது. எதிர்பார்த்தபடியே சூர்யாவின் கருத்தை ஆதரிப்பதாக அறிவித்தார் ரஜினி. விழாவில் அவர் பேசியதாவது:

சூர்யா விடா முயற்சியில் முன்னேறி இருக்கிறார். நேருக்கு நேர் படத்தில் அவர் நடிப்பை பார்த்து விட்டு இவர் நடிகராக தேறுவாரா என்றுதான் நினைத்தேன். அதன் பிறகு நந்தா, பிதாமகன் படங்களில் மிரட்டினார். இன்றைக்கு சிறந்த நடிகராக வளர்ந்து நிற்கிறார். தன்னை தானே செதுக்கி உயர்ந்த இடத்திற்கு வந்திருக்கிறார். சூர்யாவையும், கார்த்தியையும் ஒழுக்கமான பிள்ளைகளாக சிவகுமார் வளர்த்திருக்கிறார்.

சமீபத்தில் புதிய கல்வி கொள்கை பற்றி சூர்யா கூறிய கருத்துகள் சர்ச்சை ஆனது. இங்கே பேசியவர்கள் இதே கருத்தை ரஜினிகாந்த் பேசியிருந்தால் மோடி கேட்டிருப்பார் என்றார்கள். சூர்யா பேசினாலும் மோடி கேட்பார். சூர்யாவின் கருத்தை நான் ஆதரிக்கிறேன்.

அகரம் பவுண்டேஷன் மூலம் நிறைய உதவிகள் செய்து வருகிறார். மாணவர்களின் கஷ்டங்களை நேரில் பார்த்த அனுபவம் அவருக்கு இருக்கிறது. அவர் பேசும் கருத்துக்கள் வரவேற்கதக்கவை. எதிர்காலத்தில் அவரின் சேவை நாட்டுக்கு தேவையாக இருக்கும்.

இவ்வாறு ரஜினி பேசினார்.

விழாவில் நடிகர்கள் மோகன்லால், சிவகுமார், ஆர்யா, இயக்குனர் ஷங்கர், தயாரிப்பாளர் சுபாஷ்கரன், நடிகை சாயிஷா, இசை அமைப்பாளர் ஹாரிஸ் ஜெயராஜ் உள்பட பலர் கலந்து கொண்டனர்.

Advertisement
 

வாசகர் கருத்து

    முதல் நபராக கருத்து தெரிவியுங்கள்!

கருத்தைப் பதிவு செய்ய

Advertisement