Latest Tamilnadu, Indian Political News, Headlines, Information Online
Advertisement
அரசியல் செய்திகள்
அரசு நிதியை தவறான வழியில் செலவழிக்கவில்லை : தணிக்கை குழு அறிக்கை குறித்து முதல்வர் தகவல்
ஜனவரி 16,2010,00:00  IST

Latest indian and world political news information

சென்னை : "மத்திய தணிக்கைக் குழு அறிக்கையில், அரசு நிதியை, தவறான வழிகளில் செலவழித்து விட்டோம் எனக் குறிப்பிடப்படவில்லை' என்று முதல்வர் கருணாநிதி தெரிவித்துள்ளார்.அவர் வெளியிட்டுள்ள கேள்வி-பதில் அறிக்கை:மத்திய தணிக்கைக் குழு  அளித்த அறிக்கையில், தமிழக வளர்ச்சித் திட்டங்களுக்காக ஒதுக்கப்பட்ட, 121 கோடி ரூபாய், தமிழக அரசின் இலவச திட்டங்களுக்காக செலவழிக்கப்பட்டுள்ளது என்று தான் குறிப்பிடப்பட்டுள்ளது.



தவறான வழிகளில் செலவழித்து விட்டோம் என்று கூறவில்லை. இந்த செலவழிப்பு முரண்பாடானதோ, தவறானதோ அல்ல. திரைப்பட நகருக்கு ஜெயலலிதா தனது பெயரை வைத்துக்கொண்டது பற்றியும், அதற்கு கூடுதலாக எத்தனை லட்சம் ரூபாய் செலவழிக்கப்பட்டது என்பது பற்றியும், ஆதாரங்களோடு நான் எழுதியிருக்கிறேன். பல்கலைக் கழகத்திற்கு வேந்தராக தன்னையே நியமிக்கும் உத்தரவை பிறப்பிக்கவில்லை என ஜெயலலிதா கூறியுள்ளார்.  இதற்கான முன்வடிவு, எந்தத் தேதியில் நிறைவேற்றப்பட்டது என்பதை நான் புள்ளி விவரத்தோடு சொல்லியிருக்கிறேன். தகவல் பெறும் உரிமைச் சட்டம், தனது ஆட்சியிலேயே கொண்டுவரப்பட்டதாக ஜெயலலிதா தெரிவித்திருந்தார்.



அதுவும் தவறு; அது தி.மு.க., ஆட்சியில் கொண்டுவரப்பட்டது. சட்டசபையில் வணக்கம் செலுத்திய போது, சபாநாயகர் வணக்கம் தெரிவிக்கவில்லை என்று ஜெயலலிதா குற்றம் சாட்டியிருந்தார். சபை துவங்கிய பிறகு,  உறுப்பினர்கள் அவைக்கு வருவதும், நடுநடுவே எழுந்து சென்று திரும்புவதும் உண்டு. அப்போது, சபாநாயகர்  இருக்கையை நோக்கி வணக்கம் செலுத்திவிட்டு உறுப்பினர்கள் அமர்வார்கள்.  அவர்களை ஒவ்வொருமுறையும்  சபாநாயகர் கவனித்து வணக்கம் தெரிவிக்க முடியாது. அந்த வகையில், எதிர்க்கட்சித் தலைவர் வந்த போதும், சபாநாயகர் வணக்கம் தெரிவிக்காமல் இருந்திருக்க கூடும்.



போலீஸ் அதிகாரி வெற்றிவேல் கொலை செய்யப்பட்ட இடத்தில், அமைச்சர் வேடிக்கை பார்த்துக் கொண்டிருந்தனர் என்று ஜெயலலிதா கூறுகிறார். அவர்கள் வேடிக்கை பார்க்கவில்லை; உடனடியாக முதல் உதவி செய்து காரில் மருத்துவமனைக்கு அனுப்பி வைத்துள்ளனர். அதை ஜெயலலிதா மறைத்து சபையிலே பேசியதால், மகாமகக் குளத்தில் நடந்த சம்பவம் பற்றி அமைச்சர் தெரிவிக்க வேண்டி வந்தது.



சுனாமியின் போது, நான் மருத்துவமனையில், ஓடி ஒளிந்து கொண்டார் என்று ஜெயலலிதா குறை கூறுகிறார். எனக்கு சிகிச்சை அளித்த டாக்டரை கேட்டால், என் நிலை தெரியும்.சுனாமி தாக்குதலில் பாதிக்கப்பட்டவர்களுக்கு, ஒரு கோடி ரூபாய் நிதி வழங்கினேன். சினிமா கதை, வசனம் எழுதியதற்காக கிடைத்த, 21 லட்சம் ரூபாயும் சுனாமி நிவாரணத்திற்கு, ஸ்டாலின் மூலம் ஜெயலலிதாவிடம் கொடுக்கச் சொன்னேன். சட்டசபையில் ஜெயலலிதா குறிப்பிட்ட, "என்னதான் நடக்கும் நடக்கட்டுமே' பாடலை  நான் திருத்தி கூறிவிட்டதாக, ஜெ., கூறியுள்ளார். 



எம்.ஜி.ஆர்., ஜெயலலிதாவை பற்றி, என்ன சொன்னார் என்பதை, 1989ம் ஆண்டு, "மக்கள் குரல்' இதழின் ஆசிரியர் டி.ஆர்.ராமசாமி எழுதியுள்ளதை படித்தால் தெரியும்.இவ்வாறு முதல்வர்  தெரிவித்துள்ளார்.

Post Your Comments for the Article

 

  Your Name  :
Initial : Name :
  Your Email Id :  
  Your city (or) location  :  
  Your country  :  
  Your Comment:
(Press Ctrl+g or click this   to toggle between English and Tamil)



மேலும் அரசியல் செய்திகள்
» தினமலர் முதல் பக்கம்
Advertisement
  இ-பேப்பர்