கேளுங்க சொல்கிறோம்!

ப.அண்ணாமலை, ஒட்டன்சத்திரம், திண்டுக்கல்.*சந்திராஷ்டமம் என்றால்...நம் மனதை இயக்கும் கிரகம் சந்திரன். ஒருவரின் பிறந்த ராசிக்கு எட்டாம் இடத்தில் சந்திரன் இருக்கும் காலத்தில் மனப்பிரச்னை, கோபம், வாக்குவாதம் ஏற்படும். உதாரணமாக அசுவினி நட்சத்திரத்தில் பிறந்தவர் மேஷ ராசிக்காரர். இதற்கு எட்டாவதான விருச்சிகத்தில் சந்திரன் இருக்கும் காலம் (இரண்டரை நாள்) மேஷத்திற்கு சந்திராஷ்டமம். கே.துரைராஜ், கேளம்பாக்கம், செங்கல்பட்டு.*கரு முதல் திரு வரை என்றால் என்ன? கருவில் இருந்து பிறந்த மனிதன் நல்ல முறையில் வாழ்ந்து, கடவுளின் திருவடியை அடைவதே பிறவியின் நோக்கம். இதையே 'கரு முதல் திரு வரை' என்பர். வி.ரஞ்சனி, திருவட்டாறு, கன்னியாகுமரி.*அன்பின் பிறப்பிடம் எது?அன்பின் பிறப்பிடம் தாய். அவரால் தானே தந்தை, ஆசிரியர், தெய்வங்கள் என அனைவர் மீதும் அன்பு செலுத்த கற்றோம். கே.புஷ்பா, கல்யாண்புரி, புதுடில்லி.*தோஷமுள்ளவர் தான் பரிகார பூஜை செய்யணுமா?ஆம். பரிகார பூஜையின் போது மந்திரங்களைக் கேட்பதும், அப்போது வெளியாகும் தெய்வீக அலைகள் அவர் மீது படுவதும் அவசியம். சுப.சிவராமச்சந்திரன், ராமநாதபுரம், கோயம்புத்துார். *சுயசரிதை எழுதுவது எதற்காக?சாதனையாளர்கள் தங்களின் அனுபவங்களை, இளம் தலைமுறையினர் பின்பற்ற வேண்டும் என்ற நோக்கத்தில் சுயசரிதையை எழுதுகின்றனர். எஸ்.ராதா, பெங்களூரு*கிரகணத்தின் போது கர்ப்பிணி வெளியில் செல்வதில்லையே...கிரகணத்தின் போது வெளி வரும் கதிர்வீச்சால் தாய்க்கும், குழந்தைக்கும் பாதிப்பு ஏற்படும் என்பதால் அனுமதிப்பதில்லை. பி.வாசுகி, காட்டுமன்னார்கோயில், கடலுார். *சுவாமிக்கு சாத்திய பூக்களை குப்பையில் கொட்டலாமா?இந்த பூக்களை 'நிர்மால்யம்' என்பர். இதை காலில் மிதிபடும் விதத்தில் குப்பையில் கொட்டக் கூடாது. கு.மாலதி, திருச்செந்துார், துாத்துக்குடி.*பசி வந்தால் பத்தும் பறந்திடும் என்கிறார்களே...உண்மை தான். பசி வந்தால் மானம், குலம், கல்வி, வாய்மை, அறிவு, தர்ம சிந்தனை, தவம், நல்ல எண்ணம், ஊக்கம், பெண்நாட்டம் ஆகியவை ஒருவரை விட்டு நீங்கும் என்கிறார் அவ்வையார்.