சென்னையின் அடையாளம்!

மே தின நினைவாகவும், உழைப்பை போற்றும் விதத்திலும் சென்னை, மெரீனா கடற்கரையில் நினைவுச்சிலை எழுப்பப்பட்டது. இது, உழைப்பாளர் சிலை என அழைக்கப்படுகிறது. சென்னையின் முக்கிய அடையாளமாக திகழ்கிறது. தமிழகத்தில் பொதுவுடமை இயக்க தலைவர் சிங்காரவேலர், தொழிலாளர் பெற்ற உரிமையை நினைவுகூறும் வகையில், சென்னை, மெரீனா கடற்கரையில், 1923ல் பொதுக்கூட்டம் நடத்தினார். இதுவே, மே தினத்தையொட்டி இந்தியாவில் நடந்த முதல் கூட்டமாக மதிக்கப்படுகிறது.வரலாற்று சிறப்பு மிக்க இந்த நிகழ்வின் நினைவாக, தமிழக முதல்வராக இருந்த காமராஜர், தன் ஆட்சி காலத்தில் ஒரு சிலை எழுப்ப உத்தரவிட்டார். கடினமான உழைப்பில், நான்கு தொழிலாளர்கள் ஈடுப்பட்டிருப்பது போல் அந்த சிலை உருவாக்கப்பட்டது. சென்னை, அரசு கவின்கலைக் கல்லுாரி முதல்வராக இருந்த தேவி பிரசாத்ராய் சவுத்திரி இதை வடிவமைத்தார். கவின்கலைக் கல்லுாரியில் அப்போதைய காவலாளி ஸ்ரீனிவாசன் மற்றும் மாணவர் ராமு ஆகியோர் சிலைக்கான மாடலாக இருந்தனர். கருங்கல்லில் இது செதுக்கப்பட்டுள்ளது. இந்த சிலையை, சென்னை மாகாணத்தின் அப்போதைய ஆளுனர் பீஷ்னுராம் மேதி, ஜனவரி 25, 1959ல் திறந்து வைத்தார்.