வக்கீல் பீஸ் கட்டுவதில் தகராறு அண்ணனை கொன்ற தம்பி கைது

கோலார்: கொலை வழக்கில் வக்கீலுக்கு 'பீஸ்' கொடுப்பது தொடர்பாக எழுந்த தகராறில், தாயிடம் சண்டையிட்ட இரண்டாவது அண்ணனை, தம்பி அரிவாளால் வெட்டிக் கொலை செய்தார். அவரை போலீசார் கைது செய்தனர். கோலார் நகரின் பிரசாந்த் நகரை சேர்ந்தவர் பரானா. இவருக்கு சாதிக், 32, சல்மான், 30, சாஜித், 26, ஆகிய மூன்று மகன்கள் உள்ளனர். 10 ஆண்டுகளுக்கு முன்பு, இவர்களின் தந்தை இறந்து போனார். பரானா, கூலி வேலை செய்து குடும்பத்தை பராமரித்து வந்தார். மூத்த மகன் சாதிக், மூன்றாவது மகன் சாஜித் ஆகியோர் கிடைக்கும் வேலையை செய்து வந்தனர். இரண்டாவது மகன் சல்மான், போதைக்கு அடிமையாகி, வேலைக்கு செல்லாமல் ஊரை சுற்றி வந்தார். இவர் மீது ஏற்கனவே கொலை வழக்குப் பதிவாகி இருந்தது. இவ்வழக்கு விசாரணை, நேற்று முன்தினம் நடந்தது. வக்கீலுக்கு 'பீஸ்' கொடுப்பது தொடர்பாக, சல்மானுக்கும், சாஜித்திற்கும் இடையே நேற்று முன்தினம் சண்டை ஏற்பட்டது. இதனால் கோபமடைந்த சல்மான், வீட்டிற்கு சென்று தாயிடம் சண்டை போட்டார். அன்றிரவு வீட்டுக்கு சென்ற சாஜித்திடம், சல்மான் வந்து சென்ற விஷயத்தை தாய் பரானா கூறி வருத்தப்பட்டார். கோபமடைந்த சாஜித், வீட்டின் அருகில் உள்ள டீ கடையில் இருந்த சல்மானிடம் வாக்குவாதத்தில் ஈடுபட்டார். தான் வைத்திருந்த அரிவாளால் சல்மானை சாஜித் சரமாரியாக வெட்டிக் கொலை செய்துவிட்டு தப்பியோடிவிட்டார். தகவலறிந்து வந்த கல்பேட்டை போலீசார் தப்பியோடிய சாஜித்தை கைது செய்தனர்.