ஹரிபிரசாத் - முனியப்பா சந்திப்பு: அரசியல் வட்டாரத்தில் பரபரப்பு

பெங்களூரு: காங்கிரசின் மூத்த தலைவர் ஹரிபிரசாத், உணவுத்துறை அமைச்சர் முனியப்பாவை சந்தித்து, ஆலோசனை நடத்தியது, அரசியல் வட்டாரத்தில் பெரும் பரபரப்பை ஏற்படுத்தியுள்ளது. கர்நாடகாவில் சில மாதங்களாக, 'பவர் ஷேரிங்' விஷயத்தில், காங்கிரசில் சூறாவளி வீசி வருகிறது. இது மட்டுமின்றி, அமைச்சர் பதவியை பெறும் முயற்சியிலும் சிலர் ஈடுபட்டுள்ளனர். இதில், மூத்த தலைவர் ஹரி பிரசாத்தும் ஒருவர். இவர் டில்லி மேலிடம் அளவில், செல்வாக்கு மிக்கவர். கடந்த 2023ல் காங்கிரஸ் பெரும்பான்மையுடன் ஆட்சிக்கு வந்தபோது, ஹரிபிரசாத் அமைச்சராவார் என, எதிர்பார்க்கப்பட்டது. ஆனால் அவருக்கு பதவி கிடைக்கவில்லை. எரிச்சலடைந்த அவர், முதல்வர் சித்தராமையா மீது, பகிரங்கமாகவே அதிருப்தி தெரிவித்து, கடுமையாக விமர்சித்தார். பிடிவாதம் முதல்வரே, ஹரிபிரசாத்தின் வீட்டுக்கு சென்று சமாதானம் செய்தார். அதன்பின் இருவரும் சேர்ந்தனர். தற்போதைய நிலையில், இந்த விஷயத்தில் சித்தராமையாவுக்கு ஆதரவாக, ஹரிபிரசாத் நிற்கிறார். நேற்று காலை அவர், உணவுத்துறை அமைச்சர் முனியப்பாவுடன் சிற்றுண்டி சாப்பிட்டு, ஆலோசனை நடத்தியது, அரசியல் வட்டாரத்தில் பரபரப்பை ஏற்படுத்தியது. இது மரியாதை நிமித்தமான சந்திப்பு என கூறிக்கொண்டாலும், இரு தலைவர்களும் முதல்வர் பதவி உட்பட முக்கியமான விஷயங்கள் பற்றி ஆலோசித்திருக்கலாம் என, கூறப்படுகிறது. காங்கிரஸ் மேலிடம் சித்தராமையாவை, முதல்வர் பதவியில் இருந்து மாற்ற முற்பட்டால், அவருக்கு ஆதரவாக நிற்க பிற்படுத்தப்பட்ட பிரிவுகளின் தலைவர்களை தயாராக்குவதாக கூறப்படுகிறது. மருமகனுக்கு 'சீட்' கடந்த 2013 முதல் 2018ம் ஆண்டு வரை சித்தராமையா முதல்வராக இருந்தபோதும், அவருக்கு ஆதரவாக முனியப்பா இருந்தார். அப்போதும் முதல்வர் மாற்றத்துக்கு முயற்சி நடந்தது. 2024ல் லோக்சபா தேர்தலின்போது, கோலார் தொகுதியில் தன் மருமகனுக்கு 'சீட்' கேட்டார். ஆனால் இதற்கு சித்தராமையாவுக்கு நெருக்கமான ரமேஷ்குமார், முதல்வரின் அரசியல் செயலர் நஜீர் அகமது உட்பட, பலர் முட்டுக்கட்டை போட்டனர். இதனால் சித்தராமையா மீது, முனியப்பா கோபமடைந்தார். அந்த கோபம் இப்போதும் அவர் மனதில் உள்ளது. இவரை சமாதானம் செய்து வைக்கும் முயற்சியில், ஹரிபிரசாத் ஈடுபட்டுள்ளார். சித்தராமையாவுக்கு பக்க பலமாக நிற்கும்படி, முனியப்பாவின் மனதை கரைக்க, முயற்சி நடக்கிறது.